Mateus 28

Nai Jesus moris fila fali

(Marcos 16:1-10; Lucas 24:1-12; João 20:1-10)

1Iha aban fali, loron primeiru iha loron Domingu, dadeer-saan nakukun, Maria Madalena ho Maria ida seluk baa vizita rate. 2Derepenti rai nakdoko makaas tanba Nai Maromak nia anju ida tuun mai hosi lalehan hodi duir tiha fatuk nebee taka rate nee. I nia tuur iha fatuk nee nia leten. 3Anju nee nia oin nabilan hanesan rai lakan, i nia hena mutin loos. 4Haree nunee, soldadu sira nebee hein rate nee tauk teb-tebes too sira nakdedar i monu ba rai hanesan ema mate.

5Depois anju hatete ba senhora nain rua nee dehan, “La bele tauk. Hau hatene imi buka hela Jesus, Ida nebee ema prega tiha ona ba krus nee. 6Nia la iha nee ona, tanba Nia moris fali ona, tuir buat nebee uluk Nia hatete tiha ona. Mai haree fatin nebee ema tau Nia mate isin nee. 7Haree tiha, imi baa lalais foo hatene ba Nia eskolanti sira katak, Nia moris fali ona hosi mate. Nia sei baa uluk imi iha Galileia hodi hein imi, i imi sei haree Nia iha nebaa. Ida nee mak hau nia lia menon ba imi.”

8Nunee senhora nain rua husik kedas rate nee. Sira tauk maibee sira mos haksolok teb-tebes. Sira halai lalais baa foo hatene ba Jesus nia eskolanti sira.

9Iha dalan klaran, derepenti Jesus hasoru sira i kumprimenta sira dehan, "Shalom." Entaun sira baa besik Nia i hakruuk hakuak Nia ain hodi adora Nia. 10I Jesus hatete ba sira, “La bele tauk. Baa foo hatene Hau nia maun-alin sira para sira baa iha Galileia. I iha nebaa sira sei haree Hau.”

Soldadu sira nebee hein iha rate hatoo lia falsu

11Bainhira senhora sira nee lao dadauk, soldadu balu baa iha sidade Jerusalém. Too iha nebaa, sira konta ba nai lulik nia xefi sira kona ba buat hotu-hotu nebee akontese iha rate. 12Entaun nai lulik nia xefi sira hasoru malu ho katuas lia nain sira hodi halo planu. Sira foti desizaun hodi foo osan barak ba soldadu sira nebee hein rate nee. 13I sira hameno dehan, “Imi tenki foo sai dehan, ‘Iha kalan boot bainhira ami toba dukur tiha, Nia eskolanti sira mai naok tiha Nia mate isin.’ 14Se governador rona karik, ami mak baa koalia ho nia atu nunee imi la bele hetan kastigu.”

15Entaun soldadu sira simu tiha osan nee i hatoo lia falsu nebee hameno tiha ona ba sira. I istoria bosok nee namkari iha ema Judeu sira too agora nee.

Nai Jesus foo orden para foo sai Novidade Diak

(Marcos 16:14-18; Lucas 24:36-49; João 20:19-23; Apostolu sira nia Istoria 1:6-8)

16Depois Jesus nia eskolanti nain sanulu resin ida baa sae foho ida iha provinsia Galileia, tuir buat nebee Jesus hameno tiha ona ba sira.#Mateus 26:32; Marcos 14:28 17Bainhira sira haree Jesus, sira adora Nia. Maibee sira balu sei duvida hela.

18Entaun Jesus baa besik sira hodi dehan, “Maromak foo tiha ona kbiit tomak mai Hau hodi ukun buat hotu-hotu iha lalehan ho rai. 19Tanba nee, baa hanorin ema iha nasaun hotu-hotu atu sira sai Hau nia eskolanti. Foo sarani sira hodi Aman, Oan no Espiritu Santu sira nia naran.#Apostolu sira nia Istoria 1:8 20I hanorin sira atu halo tuir buat hotu-hotu nebee mak Hau hatete ona ba imi. Keta haluha, Hau sempre hamutuk ho imi too mundu nee remata.”

Currently Selected:

Mateus 28: BTDT

Highlight

Copy