Marcos 1

1Ida nee mak novidade diak kona ba Jesus Kristu, Nai Maromak nia Oan.#1:1:Dokumentu antigu ho lian Gregu barak loos. Balu hakerek “Maromak nia Oan”. Balu la hakerek. Nia istoria komesa nunee:

João Sarani Nain loke dalan ba Nai Jesus

(Mateus 3:1-12; Lucas 3:1-18; João 1:19-28)

2Molok Jesus halao Nia serbisu, Maromak haruka ema ida mai uluk tiha ona. Ema nee naran João. João nee tenki mai uluk loke dalan hodi hein Nai Jesus. Hori uluk liu, Nai Maromak haruka tiha ona Nia profeta ida, naran Isaias. Nia hakerek ona nunee:

“Hotu-hotu rona mai!

Hau haruka Hau nia ema ida baa uluk, hodi loke dalan ba O.#Malaquias 3:1

3Ema nee sei baa iha rai fuik maran, i koalia ho lian makaas dehan:

‘Hotu-hotu tenki prepara aan, hamoos dalan hodi simu Nai atu mai!

Hadia dalan halo kabeer hodi simu Nia.’ ”#Isaías 40:3

4João nee baa iha rai fuik maran i foo sai makaas dehan, “Imi tenki husik ona imi nia sala hotu, i la bele halo tan, para Nai Maromak hamoos imi nia sala. Depois imi tenki sarani, hanesan sinal ida katak imi diak malu fali ona ho Maromak.”

5Iha tempu nee, ema barak mai hosi sidade Jerusalem, ho provinsia Judeia hotu. Sira mai foo sai sira nia sala, i João sarani sira iha mota Jordaun.

6Baibain ema bolu João nee, sarani nain. Nia hela iha rai fuik maran. Nia ropa halo hosi kuda kamelu nia fulun. I nia sintu halo hosi animal nia kulit. Nia hahaan mak gafanhotu ho bani been.#2 Liurai sira 1:8#1:6 João nia maneira moris hanesan Elias iha tempu uluk liu.

7Nia hatete, “La kleur tan, iha Ema ida sei mai, i Nia boot liu hau. Atu hakruuk hodi kore Nia sandalias talin deit mos, hau la serve. 8Hau sarani imi ho bee deit, maibee Nia sei halo liu fali hau. Nia sei sarani imi ho Maromak nia Espiritu Santu.”

João Sarani Nai Jesus

(Mateus 3:13-17; Lucas 3:21-22)

9Iha tempu nee, Jesus mai hosi aldeia Nazaré iha provinsia Galileia hodi hasoru João. Depois João sarani Nia iha mota Jordaun. 10Bainhira Jesus sai hosi bee laran nee mai, derepenti Nia haree lalehan nakloke. Maromak nia Espiritu tuun ba Jesus, hanesan manu pombu ida. 11I Maromak nia lian tuun mai hosi lalehan, hatete nunee,

“O mak Hau nia Oan Doben;

O sempre halo Hau nia laran haksolok.”#Jenesis 22:2; Salmu sira 2:7; Isaías 42:1; Mateus 3:17; 12:18; Marcos 9:7; Lucas 3:22

Diabu koko Jesus iha rai fuik maran

(Mateus 4:1-11; Lucas 4:1-13)

12Nee liu tiha, Maromak nia Espiritu lori kedas Jesus baa iha rai fuik maran ida. 13Nia hela iha nebaa, duranti loron haat-nulu. Iha nebaa, diabu mai koko Jesus. Nia hela hamutuk ho animal fuik sira i Maromak nia anju sira hosi lalehan mai serbii Nia.

Nai Jesus baa iha Galileia para hatudu Nai Maromak nia dalan

(Mateus 4:12-17; Lucas 4:14-15)

14Bainhira ema kaer tiha João Sarani Nain hatama ba kadeia, Jesus baa kedas iha provinsia Galileia hodi foo sai Maromak nia Novidade Diak. 15Iha nebaa Nia hatete dehan,

“Rona mai! Agora tempu too ona.

Ema hotu-hotu bele hatene katak Maromak nia reinu mai ona.

Tanba nee, imi tenki husik ona imi nia sala,

no fiar ba Nia Novidade Diak.”#Mateus 3:2

Nai Jesus bolu peskador hodi tuir Nia

(Mateus 4:18-22; Lucas 5:1-11)

16Iha loron ida, Jesus lao tuir tasi ibun Galileia. Nia haree ema peskador nain rua. Ida, naran Simão, ho nia alin, Andre. Sira nain rua soe hela redi hodi kaer ikan. 17Jesus bolu sira dehan, “Rona mai! Mai tuir Hau! Imi uluk buka ikan, maibee agora Hau hanorin imi atu buka ema hodi tuir Maromak.” 18Rona Jesus dehan nunee, sira husik tiha sira nia redi, i baa tuir kedas Jesus.

19Liu tiha nee, Jesus lao seidauk dook, Nia hetan tan Zebedeu nia oan sira. Maun, naran Tiago; nia alin, naran João. Sira nain rua prepara hela redi iha bero laran. 20Jesus bolu sira nain rua tan dehan, “Mai tuir Hau!” Rona nunee, sira husik kedas sira nia aman no ema nebee serbisu ho sira iha bero laran. I sira nain rua baa tuir kedas Jesus.

Nai Jesus duni sai espiritu aat hosi ema ida iha sidade Kafarnaum

(Lucas 4:31-37)

21Depois Jesus ho sira nain haat nee, lao too iha sidade ida, naran Kafarnaum. Iha loron sabadu, ema Judeu sira sempre baa harohan iha sira nia uma kreda.#1:21:Ema Judeu sira nia loron hodi harohan, ka loron deskansa, sira bolu ‘loron Sabadu’. I Jesus mos baa iha nebaa hodi hanorin sira. 22Rona Nia hanorin nee, ema hotu admira, tanba Nia hanorin ho kbiit boot. Nia hanorin la hanesan mestri relijiaun Judeu sira nia hanorin.#Mateus 7:28-29

23Iha momentu nee, ema ida iha espiritu aat tama ba iha uma kreda laran. I nia hakilar dehan, 24“Jesus, ema Nazaré! O mai atu harahun ami, ka? Hau konhese O! O Ema La Iha Sala. O mak Maromak promete ona hori uluk kedas atu haruka mai.”

25Maibee Jesus siak espiritu aat nee dehan, “Nonook! Sai hosi ema nee!”.

26I espiritu aat nee doko ema nee halo nia isin nakdedar makaas. I nia sai hosi ema nee ho hakilar makaas. 27Liu tiha nee, ema hotu iha uma kreda laran nee, admira. I sira husu ba malu, “Saida mak nee? Nia haruka espiritu aat sira sai, sira mos halo tuir Nia hakarak. Nee hanorin foun, ka? Nai nee nia liafuan iha kbiit duni.”

28Entaun ema hotu komesa konta baa-mai, hosi uma ba uma, too iha aldeia hotu iha provinsia Galileia tomak.

Nai Jesus kura Simão nia banin feto ho ema barak nia moras

(Mateus 8:14-17; Lucas 4:38-41)

29Bainhira sira sai hosi uma kreda nee mai, Jesus baa iha Simão ho Andre nia uma. Tiago ho João baa hamutuk ho sira. 30Simão nia banin feto isin manas, toba hela. Bainhira Jesus tama ba uma laran, ema foo hatene dehan, “Simão nia banin feto isin manas.”

31Entaun Jesus baa haree senhora nee, i Jesus kaer nia liman, foti halo hadeer. Nunee nia moras lakon kedas. Depois senhora nee sai ba liur hodi serbii sira.

32Loro atu besik monu ona, ema lori tan ema moras, ho ema nebee espiritu aat tama iha sira nia laran. Sira lori ba Jesus, hodi husu tulun. 33Ema hotu iha sidade laran mai hamutuk iha uma oin. 34Sira iha moras oi-oin, i Jesus kura tiha hotu. Nia mos duni sai espiritu aat barak hosi ema. Maibee Nia la foo lisensa ba espiritu aat sira koalia, tanba sira konhese see mak Nia.

Nai Jesus lao lemo aldeia iha rai Galileia, hodi foo sai Nai Maromak nia Novidade Diak

(Lucas 4:42-44)

35Loron tuir mai, dadeer-saan nakukun, Jesus hadeer ona. Nia sai tiha hosi uma, baa iha fatin hakmatek ida. Iha nebaa, Nia halo orasaun, koalia ho Nai Maromak.

36Bainhira Simão sira hadeer, sira la haree ona Jesus, i sira baa buka Nia. 37Bainhira sira hetan ona Nia, sira dehan, “Nai, mai ita fila ona, tanba ema barak buka Ita Boot.”

38Maibee Jesus hataan, “Nee mos diak. Maibee diak liu ita baa iha aldeia-aldeia nebee besik iha nee. Hau hakarak foo sai mos Novidade Diak ba sira. Tanba Hau nia serbisu mak nee duni.”

39Liu tiha nee, Nia lao lemo iha provinsia Galileia tomak, hodi hatoo Maromak nia Novidade Diak, hosi uma kreda ba uma kreda. I Nia mos duni sai espiritu aat hosi ema sira nia laran.#Mateus 4:23; 9:35

Nai Jesus kura ema moras lepra ida

(Mateus 8:1-4; Lucas 5:12-16)

40Iha tempu nee, iha ema moras lepra ida mai hasoru Jesus. Nia hakneak iha Jesus nia oin, hodi husu tulun ba Jesus dehan, “Senhor, tulun hau lai! Hau hatene Ita Boot bele halakon hau nia moras nee. Naran katak Senhor hakarak.”

41Entaun Jesus hadomi teb-tebes ema nee, i Nia lolo liman ba kona ema nee, hodi dehan, “Hau hakarak! Agora o diak ona!” 42Derepenti deit, ema nee nia moras lakon tiha, i nia diak kedas.

43Depois Jesus haruka ema nee fila i foo hanoin ba nia 44dehan, “Hanoin didiak! O diak ona, maibee o keta konta ba ema seluk. O tenki tuir Moisés nia lei hori uluk nian. Nunee o baa uluk nai-lulik Judeu, para nia haree didiak lai o nia moras nee, lakon tebes ka lae. Depois o tenki foo oferta hanesan sinal ida foo obrigadu ba Maromak, para ema hotu hatene katak o diak tebes ona.”#Levitiku 14:1-32

45Maibee ema nee sai, i nia baa konta iha fatin ba fatin. Depois ema barak baa buka Jesus, too Nia susar tama ba sidade. Nunee Nia hela iha fatin hakmatek ida, dook hosi sidade. Maibee ema hosi fatin-fatin, nadodon baa nafatin atu hasoru Nia.

Currently Selected:

Marcos 1: BTDT

Highlight

Copy

Compare