Mateus 27

Ema lori Nai Jesus ba iha governador Pilatus

(Marcos 15:1; Lucas 23:1-2; João 18:28-32)

1Iha dadeer-saan, xefi relijiaun Judeu sira ho katuas lia nain sira halibur hodi foti desizaun para kastigu mate Jesus. 2Depois sira futu Nia, i lori Nia ba entrega iha governador Pilatus.#27:2:Iha tempu nebaa, ema Judeu la iha direitu atu foo kastigu mate ema. Tanba nee sira lori Nai Jesus ba iha estadu Roma atu tesi tan Nia lia.

Judas tara aan

(Apostolu sira nia Istoria 1:18-19)

3Bainhira Judas, eskolanti nebee faan Jesus nee, hatene katak sira atu kastigu mate Jesus, nia mos arepende. Depois nia lori fali osan mutin tolu-nulu nee hodi baa entrega iha nai lulik Judeu nia xefi sira ho katuas lia nain sira. 4Nia hatete, “Hau halo sala ona! Hau faan Ema ida nebee la iha sala ba ema oho.” Maibee sira hataan, “Ami la interese. Nee o nia problema.”

5Entaun Judas soe osan mutin sira nee ba iha uma kreda laran. Depois nia sai baa tara aan mate tiha.

6Xefi relijiaun Judeu sira hili tiha osan sira nebee Judas soe nee hodi dehan, “Osan nee la bele hatama fali ba hamutuk ho osan oferta Uma Kreda nian. Tanba Osan nee folin hosi ema nia raan.” 7Nunee sira desidi uza osan nee hodi sosa rai pedasuk nebee ema temi "Rai badaen sanan rai". I sira foo rai nee para sai fatin hodi hakoi ema estranjeiru. 8Tanba nee, rai nee too agora ema bolu ‘Rai Raan nian’.#Apostolu sira nia Istoria 1:18-19

9Nunee sira halo tuir liafuan nebee profeta Jeremias hakerek hori uluk dehan, “Sira uza osan mutin tolu nulu nee hodi sosa rai. Tanba osan nee folin hodi sosa ema, tuir saida mak ema Israel sira desidi ona. 10Rai nee sosa hosi badaen halo sanan rai, tuir Nai Maromak nia orden nebee foo mai hau.”#Zacarias 11:12-13; Jeremias 18:2-4; 19:1-11; 32:6-15

Nai Jesus iha governador Pilatus nia oin

(Marcos 15:2-5; Lucas 23:3-5; João 18:33-38)

11Bainhira Jesus hamriik iha governador Pilatus nia oin, governador husu ba Nia, “O mak ema Judeu sira nia Liurai ka?”

Jesus hataan, “Ita rasik mak dehan nunee.”

12Maibee bainhira nai-lulik nia xefi sira ho katuas lia nain sira duun Jesus iha Pilatus nia oin, Jesus la hataan buat ida.

13Entaun Pilatus hatete ba Jesus dehan, “O la rona ka? Ema sira nee foo sasin oi-oin kontra O!”

14Maibee Nia la hataan liafuan ida. Nunee halo governador Pilatus admira loos.

Governador Pilatus hamonu kastigu mate ba Nai Jesus

(Marcos 15:6-15; Lucas 23:13-25; João 18:39—19:16)

15Tin-tinan, bainhira ema Judeu halo festa Paskua, governador sempre hasai ema dadur ida tuir povu nia hakarak. 16Iha tempu nebaa, iha ema dadur ida naran Barabás, ema hotu konhese nia nudar kriminozu boot ida. 17Bainhira ema barak halibur hamutuk ona, Pilatus husu ba sira dehan, “See mak imi hakarak hau husik? Barabás ka Jesus nebee ema bolu Kristu?” 18Pilatus koalia nunee tanba nia hatene katak sira entrega Jesus ba nia tanba sira laran moras.

19Bainhira Pilatus tuur iha kadeira juiz nian atu tesi Jesus nia lia, nia feen haruka lia menon dehan, “La bele envolve iha Ema nee nia problema, tanba Ema nee la sala ida. Horikalan hau mehi kona ba Nia nebee halo hau terus loos.”

20Maibee nai-lulik nia xefi sira ho katuas lia nain sira obriga ema barak nee husu ba Pilatus atu husik Barabás, i oho Jesus. 21Depois governador Pilatus husu fali dehan, “Hosi ema nain rua nee, imi hakarak hau husik ida nebee?”

Sira hataan, “Barabás!”

22Rona nunee Pilatus husu ba sira, “Se nunee, imi hakarak halo saida ba Jesus nebee ema bolu Kristu nee?”

Sira hotu hataan hakilar, “Prega tiha Nia ba krus!”

23Depois Pilatus husu, “Nia halo krimi saida?”

Maibee sira hakilar makaas liu tan, “Prega tiha Nia ba krus!”

24Pilatus haree katak ema barak nee atu halo rungu-ranga, i nia la bele halo buat ida. Entaun nia foti bee hodi fasi nia liman iha ema barak nee nia oin dehan, “Hau la sala kontra Ema nee. Ida nee imi mak lori todan rasik.”#Deuteronomio 21:6-9

25Sira hotu hataan, “Husik Ema nee nia raan, ami ho ami nia oan no beoan sira mak lori.”

26Nunee Pilatus hasai Barabás hosi kadeia. I nia haruka ema baku Jesus ho sikoti, depois entrega Nia ba soldadu sira hodi prega iha krus.

Soldadu sira hamoe Nai Jesus

(Marcos 15:16-20; João 19:2-3)

27Hotu tiha governador nia soldadu sira lori Jesus ba iha forsa sira nia kuartel. Iha nebaa, sira bolu sira nia kolega soldadu sira hotu mai haleu Nia. 28Sira kolu tiha Jesus nia hena i foo hatais fali batina kor mean ida. 29Sira mos dulas ai tarak halo kabuar hanesan koroa nebee tau iha liurai sira nia ulun, hodi tau iha Nia ulun. Sira tau ai sanak lotuk ida iha Nia liman loos hanesan ai tonka. Sira hakneak iha Nia oin hodi hamoe Nia dehan, “Viva, ema Judeu sira nia Liurai!” 30Sira mos tafui kabeen ba Nia i foti fali ai sanak nee hodi baku Nia ulun fila-fila. 31Sira hamoe Nia nunee, depois kolu tiha batina mean hodi foo hatais fali Nia hena rasik. Hotu tiha sira lori Nia sai hodi baa prega iha krus.

Ema prega Nai Jesus iha krus

(Marcos 15:21-32; Lucas 23:26-43; João 19:17-27)

32Bainhira sira lori Jesus sai, iha dalan klaran, soldadu sira nebee lori Jesus nee hetan ema ida hosi Sirene, naran Simão. Sira obriga nia lori Jesus nia krus. 33Sira too iha fatin ida naran Golgota, nee dehan katak “Fatin Ulun Ruin”. 34Iha nebaa sira kahur tua ho buat moruk ida hodi foo ba Jesus hemu. Nia koko tiha maibee lakohi hemu.#Salmu sira 69:22

35Tuir mai sira prega Jesus iha krus. I soldadu sira dada rifa atu hatene see mak bele hetan Jesus nia hena.#Salmu sira 22:19 36Hotu tiha sira tuur hodi hein Nia. 37Sira mos iha ai kabelak ida nebee hakerek nunee: “Ema nee Jesus, ema Judeu sira nia Liurai.” Nee hodi foo razaun tanba saa mak Jesus simu kastigu mate. I sira prega ai kabelak nee iha Nia ulun leten. 38Sira prega tan ema naok-teen boot nain rua iha krus, ida iha Jesus nia sorin kuana, ida iha sorin karuk.

39Ema sira nebee liu hosi fatin nee, sira doko ulun hodi hatete aat Jesus. #Salmu sira 22:8; 109:25 40Sira hatete, “Uluk O dehan atu halo rahun uma kreda boot, depois harii fali iha loron tolu nia laran. Se O Maromak nia Oan duni, entaun salva took O nia Aan hodi tuun hosi krus nee.”#Mateus 26:61; João 2:19

41Nai lulik nia xefi sira, mestri relijiaun sira ho katuas lia nain sira mos hatete aat Jesus dehan, 42“Ema seluk Nia bele salva, maibee Nia rasik Nia la bele salva. Nia dehan, Nia mak ema Israel nia Liurai, entaun diak liu agora Nia tuun hosi krus atu ita fiar. 43Nia laran metin ba Maromak. Se Maromak gosta Nia, entaun ita haree took Maromak mai salva Nia ka lae. Tanba Nia rasik hatete katak Nia Maromak nia Oan.”#Salmu sira 22:9

44Naok-teen nain rua nebee iha Jesus nia sor-sorin mos tarata aat Jesus nunee.

Nai Jesus mate

(Marcos 15:33-41; Lucas 23:44-49; João 19:28-30)

45Komesa tuku sanulu resin rua, nakukun taka metin rejiaun nee tomak too tuku tolu lokraik. 46Iha tuku tolu lokraik, Jesus hakilar ho lian makaas dehan, “Eli, Eli, lama sabaktani?” Nee dehan katak, “Hau nia Maromak! Hau nia Maromak! Tansaa mak Ita Boot husik Hau mesak?”#Salmu sira 22:2

47Rona nunee, ema balu nebee hamriik besik nebaa dehan, “Nia bolu profeta Elias.” 48Sira ida halai kedas baa foti esponza rohan ida habokon ho tua siin, tau ba ai naruk ida hodi lolo ba iha Jesus nia ibun para hemu.#Salmu sira 69:22

49Maibee sira seluk dehan, “Keta foo lai! Ita haree took, Elias mai salva duni Nia ka lae.”

50Depois Jesus hakilar dala ida tan ho lian makaas, i Nia iis kotu.

51Iha Uma Kreda Boot iha kortina boot ida hodi taka fatin santu. Kortina nee naklees hosi leten too kraik fahe tiha ba rua. Rai nakdoko makaas i fatuk boboot sira nakfera.#Ezodu 26:31-33 52Rate sira mos nakloke. I Maromak nia ema balu nebee mate tiha ona, Nia halo moris fali. 53Bainhira Jesus moris fila fali, sira ida-idak sai hosi sira nia rate i ba tama iha sidade santu Jerusalém, i ema barak haree.

54Bainhira komandante Roma ho soldadu sira nebee hein Jesus nee haree rai nakdoko ho buat seluk nebee akontese, sira tauk teb-tebes hodi dehan, “Loos duni! Ema nee Maromak nia Oan.”

55Iha nebaa iha senhora barak haree hosi dook deit. Sira nee tuir Jesus hosi Galileia too iha Jerusalém hodi serbii Nia. 56Hosi sira nee mak Maria Madalena, Maria nebee Tiago ho José nia inan, i Zebedeu nia feen.#Lucas 8:2-3

Ema hakoi Nai Jesus nia mate isin

(Marcos 15:42-47; Lucas 23:50-56; João 19:38-42)

57Loromatan atu monu ona, ema riku ida mai hosi sidade Arimateia, naran José. Nia mos tuir Jesus. 58Nia baa hasoru Pilatus hodi husu Jesus nia mate isin para hakoi. Entaun Pilatus haruka soldadu sira entrega Jesus nia mate isin ba José. 59Depois José simu Jesus nia mate isin, i falun ho hena mutin foun diak nian. 60Nia lori Jesus nia mate isin baa haloot iha rate nebee nia prepara tiha ona ba nia aan rasik. Fatin nee fatuk lolon nebee ema bahat tiha ona para sai rate. Depois nia duir fatuk boot ida hodi taka rate ibun nee. Hotu tiha nia fila.

61Maibee Maria Madalena ho Maria ida seluk tuur hela iha rate nia oin hodi hateke ba rate nee.

Soldadu sira hein metin iha Nai Jesus nia rate

62Iha aban fali, loron Sabadu, nai lulik nia xefi sira ho ema Farizeu sira baa hasoru Pilatus. 63Sira dehan, “Senhor, ami hanoin hela Ema bosok-teen nee nia liafuan. Uluk Nia sei moris, Nia dehan katak liu tiha loron tolu Nia sei moris fali.#Mateus 16:21; 17:23; 20:19; Marcos 8:31; 9:31; 10:33-34; Lucas 9:22; 18:31-33 64Tanba nee haruka ita boot nia soldadu sira baa hein iha rate too loron tolu. Keta halo be Nia eskolanti sira mai naok tiha Nia mate isin, depois sira dehan ba povu, 'Nia moris fali ona hosi mate'. Se ida nee mak akontese, entaun bosok-teen sira ikus nee aat liu fali sira nia Mestri.”

65Pilatus hataan ba sira, “Entaun lori soldadu balu ba iha rate hodi hein metin iha nebaa.”

66Nunee nai ulun Judeu sira hamutuk ho soldadu sira baa iha rate. Sira tau sinal ba rate nee nia odamatan atu ema keta tama. Depois soldadu sira hein metin nafatin iha nebaa para ema la bele mai foti mate isin.

Currently Selected:

Mateus 27: BTDT

Highlight

Copy