Tiago 5
5
Ema riku nebee la moris loos tenki kuidadu
1Imi ema riku sira, rona mai! Tanis halerik ona baa. Tanba imi sei hetan terus oi-oin. 2Imi nia rikusoin nabeen hotu ona. Imi nia hena diak sira mos, barata haan kuak hotu ona. 3Imi nia osan mean ho osan mutin ferujen tiha ona. Nee sai hanesan sasin hodi hatudu imi nia sala. I osan sira nee mak sei haan fali imi, hanesan ahi haan ai maran. Mundu atu besik remata ona, maibee imi sei fadigadu halibur rikusoin barak ba imi nia aan. 4Imi hamatak ema nebee serbisu mate aan halo toos ba imi. Agora sira nia kosar been haklalak ba Nai Maromak. I Maromak nebee Forsa teb-tebes rona ona sira nia halerik.#Deuteronomio 24:14-15
5Imi moris luxu ho goza tuun-sae iha mundu nee. Imi halo bokur imi nia aan rasik, hanesan karau bokur nebee prontu ona para oho. 6Imi kastigu no oho ona ema nebee la sala, i sira la iha kbiit atu kontra imi.#Mateus 6:19
Pasiensia iha terus nia laran
7Maun-alin sira, imi tenki pasiensia hodi hein Nai Jesus fila fali mai hosi lalehan. Haree ba toos nain sira, sira pasiensia hodi hein too udan monu rai foin bele kuda rai. Depois tenki hein tan too batar maran. 8Imi mos tenki pasiensia nunee, i laran metin nafatin, tan Nai Jesus besik fila ona.
9Maun-alin sira, keta murmura malu, se lae Maromak sei kastigu imi. Haree baa, Juis Boot hamriik ona iha odamatan oin!
10Maun-alin sira, profeta sira nebee koalia hodi Nai Maromak nia naran, foo ezemplu diak mai ita atu halo tuir. Maski sira hetan terus oi-oin, maibee sira pasiensia i aguenta nafatin. 11Ita gaba ema nebee aguenta ho pasiensia iha terus laran. Hanesan Jó, nia hetan terus oi-oin, maibee nia aguenta nafatin. Iha ikus mai, Maromak halo buat hotu-hotu sai diak ba nia. Maromak halo nunee, tanba Maromak laran diak i nakonu ho domin.#Jó 1:21-22; 2:10; Salmu sira 103:8; Tiago 1:2-3,12
La bele jura
12Maun-alin sira, hanoin didiak: la bele jura! La bele jura hodi Maromak iha lalehan nia naran, ka jura ba rai ka ba saida deit. Se loos, hataan “loos”. Se lae, hataan “lae”. Nunee deit too ona, para Maromak keta kastigu imi.#Mateus 5:34-37
Orasaun nebee iha poder
13Se hosi imi, ema balu hetan terus oi-oin, sira tenki halo orasaun. Se ema balu haksolok, sira tenki kanta hodi hahii Nai Maromak. 14Se iha ema ruma moras, nia tenki haruka bolu presbiteru sira atu sira mai halo orasaun ba nia, i kose mina hodi Nai Jesus nia naran.#Marcos 6:13 15Bainhira ita halo orasaun ba ema moras ho fiar teb-tebes ba Maromak, maka Maromak sei kura moras nee. I se ema moras nee halo sala ona, Maromak sei foo perdaun ba nia sala. 16Tanba nee, imi tenki foo sai imi nia sala ba malu, i halo orasaun ba malu, atu imi bele hetan kura.
Ema nebee moris loos, nia orasaun iha kbiit makaas hodi halo buat barak. 17Ita bele hola ezemplu hosi Maromak nia profeta Elias. Nia ema baibain hanesan ita, maibee bainhira nia harohan ho laran tomak para udan la bele mai, udan la mai duni durante tinan tolu fulan neen.#1 Liurai sira 17:1; 18:1 18Depois nia harohan fali husu udan mai, udan mai kedas, i toos sira foo fali ai haan.#1 Liurai sira 18:42-45
19Maun-alin sira, se hosi imi, ema ruma sees ona hosi dalan loos, depois iha ema nebee lori nia fila fali ba Maromak, nia halo buat diak ida. 20Rona didiak! Se imi lori ema sala nain hodi husik tiha dalan sala i fila ba Maromak, entaun imi salva ema nee hosi mate para nia moris nafatin ho Maromak. I Maromak sei hamoos nia sala barak nee.#Proverbiu sira 10:12; 1 Pedro 4:8
Hau nia liafuan too iha nee deit.
Hosi hau,
Tiago
Currently Selected:
Tiago 5: BTDT
Highlight
Copy
Compare
Share
Want to have your highlights saved across all your devices? Sign up or sign in
© 2024 Wycliffe Timor-Leste.
