Apostolu sira nia Istoria 25

Governador Festu tesi Paulo nia lia

1Tempu nee, governador foun Festu muda ba Sezareia hodi komesa ukun. Liu tiha loron tolu, nia baa Jerusalém. 2Iha nebaa, nai-lulik nia xefi sira ho nai ulun Judeu sira baa hasoru nia hodi foo sala ba Paulo. 3Sira husu tulun, atu governador haruka lori fila fali Paulo mai Jerusalém, tan sira kombina tiha ona atu oho Paulo iha dalan.

4Maibee governador hataan, “Senhor sira, Paulo sei kastigu hela iha Sezareia i hau mos atu fila lalais ba iha nebaa. 5Tan nee, imi nain ulun sira balu tenki akompanha hau ba Sezareia hodi foo sala ba nia iha nebaa deit.”

6-7Liu tiha nee, Festu hela mais-ou-menus loron sanulu iha Jerusalém, foin nia fila ba Sezareia. Ema Judeu balu tuir nia too iha nebaa. Iha aban fali, governador komesa tesi Paulo nia lia.

Paulo foin tama ba tribunal, ema boot Judeu balu hamriik haleu nia, hodi foo sala todan oi-oin ba nia. Maibee sira la hatudu loloos nia sala saida.

8Paulo defende nia aan dehan, “Senhor governador, hau nunka halo buat aat ida. Hau nunka kontra relijiaun Judeu nia lei. Hau la halo foer Nai Maromak nia Uma Kreda Boot. I hau mos la kontra governu Roma.”

9Maibee governador Festu hakarak buka oin ho halo kontenti ema Judeu sira. Nee mak nia husu ba Paulo, “Se hau rezolve o nia lia nee iha Jerusalém, o simu ka lae?”

10Paulo hataan, “Senhor governador, hau ema sidadaun Roma. Hau agora hamriik iha tribunal governu Roma nian. Ida nee mak iha direitu para tesi hau nia lia. Tan nee, hau lakohi baa iha nebaa. Senhor rasik hatene ona, hau la halo sala ida kontra ema Judeu sira. 11Se hau halo duni sala ruma karik para bele hetan kastigu mate, hau prontu atu mate. Maibee se sira foo sala mai hau nee, la loos, la iha ema ida iha direitu atu entrega hau ba sira nia liman para oho. Tan nee, hau husu atu baa iha liurai boot César, para nia rasik mak tesi hau nia lia nee.”

12Rona Paulo husu nunee, governador husu sujestaun ba matenek nain sira. Depois nia hatete ba Paulo, “O husu ona atu baa César, o sei baa duni.”

Festu konta Paulo nia kazu ba liurai Agripa

13Nee hotu tiha, liurai Agripa#25:13:Liurai Agripa nee, ema mos bolu Erodes Agripa II. Nia aman liurai Erodes Agripa I oho Tiago, i ular haan nia isin too mate, tanba nia foti nia aan hanesan Nai Maromak. ho nia feton Berenise, mai vizita governador foun Festu iha Sezareia, hodi kumprimenta nia. 14Sira hela loron barak iha nebaa. Iha loron ida, governador Festu konta Paulo nia kazu ba liurai dehan, “Iha Sezareia nee, iha ema dadur ida nebee governador Félix uluk husik hela iha kadeia. 15Foin lalais nee, bainhira hau iha Jerusalém, nai-lulik nia xefi sira ho nai ulun Judeu sira, mai hasoru hau hodi foo sala ba ema nee. I sira mos husu para hau tesi nia lia hodi foo kastigu todan ba nia. 16Maibee hau hatete ba sira, ‘Tuir governu Roma nia lei, tenki tesi ema nia lia uluk, mak foin bele foo kastigu. Ema nebee halo lia ho nia tenki iha oin hodi foo sala ba nia, i ema nee mos iha direitu atu defende nia aan. Depois mak foin hau bele desidi lia i foo kastigu ba nia.’ 17Bainhira hau fila fali mai iha Sezareia, iha ema Judeu balu mos tuir. Aban fali, hau komesa kedas tesi lia nee. Hau haruka lori ema dadur nee mai iha tribunal. 18Ema Judeu sira hamriik hodi hatudu nia sala. Hau hanoin sira atu dehan nia halo sala boot ruma. Maibee saida mak foo sai mai hau nee, afinal la iha lia todan ida. 19Sira kontra nia tan deit sira nia hanoin mak la hanesan kona ba sira nia relijiaun, ho mos tanba ema ida naran Jesus. Tuir ema Judeu sira, Jesus nee mate tiha ona. Maibee ema dadur nee sempre hatete dehan, Nia moris fila fali ona. 20Hau la hatene atu hakotu lia nee, oinsaa. Nee mak hau husu ba nia, ‘Oinsaa se hau tesi o nia lia iha Jerusalém deit?’ 21Maibee nia lakohi. Nia husu atu lori lia nee baa tesi iha liurai boot César. Nee mak hau husik nafatin nia iha kadeia, too hau hetan tempu diak ida atu haruka nia ba liurai boot iha Roma.”

22Rona Festu konta nunee, liurai Agripa dehan, “Se bele, hau hakarak rona rasik hosi ema nee.”

Festu hataan, “Bele! Aban mak liurai rona rasik hosi nia.”

Governador aprezenta Paulo ba liurai Agripa

23Iha aban fali, liurai Agripa ho Berenise too mai iha salaun governador nian. Sira hatais hena liurai nian mesak kapaas deit. Komandante tropas sira ho mos ema boot sira hosi sidade Sezareia, akompanha sira tama ba salaun. Bainhira sira hotu iha laran ona, governador haruka ema bolu Paulo tama.

24I governador komesa koalia dehan, “Liurai Agripa, senhor sira, ho bainaka sira hotu mak hau respeita. Ema ida nee mak ema Judeu sira foo sala dehan, nia la merese atu moris tan. Iha Jerusalém mos hanesan, iha nee mos hanesan. 25Hau la hetan nia sala ida para nia bele hetan kastigu mate. Nia husu atu lori lia nee baa tesi iha liurai boot iha Roma, i hau mos hataan. 26Hau tenki hakerek surat ida foo ba liurai boot, maibee agora hau atu hakerek saida? Nee mak hau lori nia mai, para senhor sira rona nia koalia. Depois liurai Agripa bele foo liafuan ruma mai hau, para hau bele hakerek buat ruma ba liurai boot. 27Hau senti la diak, se hau haruka kazu nee ba liurai boot, bainhira la foo sai loloos ema nee nia sala.

Hau nia liafuan mak nee deit. Obrigadu.”

Currently Selected:

Apostolu sira nia Istoria 25: BTDT

Highlight

Copy