Apostolu sira nia Istoria 24

Ema Judeu boot balu foo sala ba Paulo iha governador Félix nia oin

1Liu tiha loron lima, ema Judeu sira nebee hakarak halo lia ho Paulo nee too mai iha sidade Sezareia, atu foo sala ba nia iha governador nia oin. Sira nee mak nai-lulik boot Ananias, nai ulun balu, ho ema ida naran Tértulu nebee matenek koalia kona ba lei. 2-3Bainhira ema sira hotu halibur malu ona iha fatin tesi lia nian, governador haruka lori Paulo tama. Depois Tértulu foo sala ba Paulo dehan,

“Senhor governador mak hau respeita. Senhor ukun ami kleur ona ho diak, i halo mudansa diak barak, halo ami ema Judeu mos bele moris hakmatek. Nee duni, iha oras ida nee ami hatoo obrigadu barak ba senhor governador. See tan mak bele halo buat diak barak iha fatin-fatin hanesan ita boot. 4Atu habadak tempu para senhor la bele kole, hau husu tempu ituan atu foo sai lia nee nia huun.

5Tuir ami haree, ema nee hanesan moras aat ida ke daet iha fatin ida ba fatin seluk. Iha nebee-nebee deit nia sempre tau lia ba ema Judeu sira para halo rungu-ranga. Nia mos ulun ida hosi grupu relijiaun ida nebee ema bolu ‘ema Nazaré’. Sira nia hanorin la haan malu ho ami nia relijiaun Judeu nian. 6Ema ida nee atu halo foer Nai Maromak nia Uma Kreda Boot nebee santu. Nee mak ami kaer nia. [Ami hakarak atu tesi nia lia tuir ami nia lei. 7Maibee komandante Lísias mai hadau tiha nia hosi ami nia liman. 8I nia haruka ema sira nebee halo lia ho ema nee, mai iha nee atu senhor governador rezolve nia lia.]#24:8:Liafuan sira iha aspas (dalam kurung), iha dokumentu Gregu antigu liu la iha. Se senhor husu ba nia, senhor sei hatene rasik katak buat hotu nebee ami koalia ona nee, loos duni.

Mak nee deit, senhor. Obrigadu.”

9Tértulu koalia hotu nunee, ema Judeu sira seluk mos konkorda dehan, “Loos, senhor! Loos duni.”

Paulo defende aan iha governador Félix nia oin

10Governador foo sinal ba Paulo para koalia.

Paulo mos hataan, “Senhor governador, hau hatene katak senhor ukun iha ami nia nasaun kleur ona. I ita boot hatene ona ami ema Judeu nia kostumi. Nunee hau brani atu defende hau nia aan iha senhor governador nia oin. 11Senhor rasik bele hatene katak, foin loron sanulu resin rua liu ba kotuk, hau baa iha Jerusalém hodi halo orasaun iha Uma Kreda Boot. 12Ema Judeu sira nunka hetan hau haksesuk malu ho ema ida iha Uma Kreda Boot. Hau mos nunka kria problema iha uma kreda seluk ka iha sidade laran.

13Maski ema sira nee foo sala mai hau, maibee sira la hatudu katak, buat nebee sira dehan nee loos.

14Senhor governador, hau foo sai dehan hau tuir duni Nai Jesus nia Dalan. Hau adora ba Nai Maromak, hanesan ami nia bei-ala sira adora ba Nia. Hau mos fiar lei hotu-hotu nebee profeta Moisés hakerek, ho fiar teb-tebes saida mak Nai Maromak nia profeta sira hakerek rai hela ba ami. 15Hau laran metin ba Nai Maromak, hanesan mos ema sira nebee kontra hau nee. Ami hotu fiar katak, Nai Maromak sei halo ema mate hotu-hotu moris fali: ema diak, ho mos ema aat. 16Nee mak hau sempre hakaas aan atu bele moris ho laran moos iha Nai Maromak nia oin ho mos iha ema nia oin.

17Hau hela kleur ona iha rai liur, foin hau fila ba Jerusalém, lori oferta nebee ema foo hodi ajuda ema Judeu nebee susar. Depois hau baa iha Uma Kreda Boot para foo sakrifisiu ba Nai Maromak. 18Bainhira hau tuir ona serimonia hamoos aan tuir ami nia lisan, ema sira nebee foo sala mai hau nee, hetan hau iha nebaa. Maibee iha momentu nee, ema la barak iha Uma Kreda Boot laran nee, i la iha ema ida halo rungu-ranga.#Apostolu sira nia Istoria 21:17-28 19So iha, mak ema Judeu balu hosi provinsia Ázia. Nunee, se sira iha problema ho hau, tuir loos sira rasik tenki mai iha nee hodi hatete hau nia sala saida. Maibee sira la mai. 20Tan nee, senhor husu took ba ema sira iha nee, momentu sira tesi hau nia lia iha tribunal relijiaun nian, sira hetan hau nia sala saida? La hetan buat ida. 21So karik iha buat ida deit, mak halo sira foo sala mai hau. Hau koalia ho lian makaas dehan, ‘Imi atu kastigu hau, tanba hau fiar katak Nai Maromak bele halo ema mate moris fali.’ ”#Apostolu sira nia Istoria 23:6

22Governador Félix hatene ona kona ba Nai Jesus nia Dalan. I nia marka fali ba loron seluk dehan, “Hau sei hein too komandante Lísias mai, foin hau hakotu lia nee.” 23Depois nia haruka kapitaun ida lori Paulo baa hatama ba kadeia. Maibee nia foo orden para foo livre ituan ba Paulo, i foo lisensa ba nia belun sira mai serbii nia.

Paulo koalia ba Félix ho nia kaben Drusila

24Liu tiha loron ida-rua, governador Félix mai ho nia kaben, ema Judeu, naran Drusila. Nia haruka ema lori Paulo baa hasoru sira nain rua. Paulo foo hatene ba sira kona ba fiar ba Kristu Jesus. 25Nia mos foo hanoin, halo oinsaa ema bele moris loos, ho domina aan para la bele halo sala. I nia mos koalia kona ba Maromak halo justisa iha loron ikus.

Bainhira Félix rona buat sira nee, nia tauk teb-tebes hodi dehan, “Paulo, too iha nee deit ona! Bainhira iha tempu, mak hau sei bolu fali o.” 26Nia hein atu Paulo foo osan para bele hasai nia hosi kadeia. Tan nee, nia haruka bolu Paulo baa koalia bebeik ho nia.

27Liu tiha tinan rua, iha governador foun ida mai troka nia, naran Pórsiu Festu. Félix atu halo kontenti ema Judeu nia lider sira, nunee mak nia kastigu nafatin Paulo iha kadeia.

Currently Selected:

Apostolu sira nia Istoria 24: BTDT

Highlight

Copy