ເອສະເທີ 6
6
ມໍເດໄກໄດ້ຮັບການຍົກຍ້ອງ
1ໃນຄືນນັ້ນກະສັດນອນບໍ່ຫລັບ; ດັ່ງນັ້ນ ເພິ່ນຈຶ່ງໄດ້ສັ່ງໃຫ້ນຳເອົາປື້ມບັນທຶກຂ່າວຄາວ, ເຊິ່ງໄດ້ບັນທຶກການປົກຄອງຂອງເພິ່ນມາ ແລະ ມາອ່ານສູ່ເພິ່ນຟັງ. 2ກໍພົບວ່າມີຕອນໜຶ່ງໄດ້ບັນທຶກວ່າມໍເດໄກໄດ້ເປີດເຜີຍແຜນການຂອງບິກທານາ ແລະ ເຕເຣເຊ, ທີ່ເປັນຂ້າລາຊະການສອງຄົນ ເຊິ່ງເປັນຄົນເຝົ້າຍາມປະຕູທາງເຂົ້າຂອງກະສັດ. ພວກເຂົາໄດ້ຮ່ວມຫົວກັນເພື່ອຈະລັກລອບສັງຫານກະສັດເຊເຊັດ.
3ກະສັດໄດ້ຖາມວ່າ, “ມໍເດໄກໄດ້ຮັບກຽດ ແລະ ໄດ້ຮັບການຍອມຮັບຢ່າງໃດໃນເລື່ອງນີ້?”
ບັນດາຄົນຮັບໃຊ້ຂອງເພິ່ນໄດ້ຕອບວ່າ, “ຍັງບໍ່ໄດ້ເຮັດອັນໃດໃຫ້ລາວເລີຍ?”
4ກະສັດໄດ້ເວົ້າວ່າ, “ມີຜູ້ໃດຢູ່ໃນເດີ່ນ?” ໃນທັນໃດນັ້ນ ຮາມານແມ່ນຫາກໍເຂົ້າມາທີ່ເດີ່ນຊັ້ນນອກຂອງວັງ ເພື່ອຂໍໃຫ້ກະສັດແຂວນຄໍມໍເດໄກຢູ່ເທິງເສົາໄມ້ທີ່ຕົນໄດ້ຕັ້ງຂຶ້ນ.
5ບັນດາຄົນຮັບໃຊ້ຂອງກະສັດໄດ້ຕອບວ່າ, “ຮາມານກໍາລັງຢືນຢູ່ໃນເດີ່ນ”.
ກະສັດສັ່ງວ່າ, “ຈົ່ງໄປນຳເອົາລາວເຂົ້າມາ”.
6ເມື່ອຮາມານເຂົ້າມາແລ້ວ, ກະສັດກໍໄດ້ຖາມລາວວ່າ, “ເຮົາຄວນເຮັດຫຍັງໃຫ້ຄົນທີ່ກະສັດພໍໃຈທີ່ຢາກຈະຍ້ອງຍໍໃຫ້ກຽດ?”
ຮາມານຄິດໃນໃຈວ່າ, “ນອກຈາກເຮົາແລ້ວຈະມີຜູ້ໃດອີກທີ່ກະສັດຢາກຈະຍ້ອງຍໍໃຫ້ກຽດ?” 7ດັ່ງນັ້ນ ຮາມານຈຶ່ງຕອບກະສັດວ່າ, “ສໍາລັບຄົນທີ່ກະສັດພໍໃຈທີ່ຢາກຈະຍ້ອງຍໍນັ້ນ, 8ຂໍໃຫ້ຄົນນຳເອົາເສື້ອຄຸມທີ່ກະສັດເຄີຍນຸ່ງ ແລະ ນຳເອົາມ້າໂຕໜຶ່ງທີ່ກະສັດເຄີຍຂີ່, ນຳມ້າທີ່ກະສັດຂີ່ ທີ່ມີເຄື່ອງປະດັບປະຈຳກະສັດຢູ່ເທິງຫົວນັ້ນອອກມາ. 9ຫລັງຈາກນັ້ນ ຂໍໃຫ້ມອບໝາຍເສື້ອຄຸມ ແລະ ມ້ານັ້ນໃຫ້ແກ່ຂຸນນາງຊັ້ນສູງສຸດຄົນໜຶ່ງຂອງກະສັດ. ໃຫ້ຄົນຈັດການແຕ່ງໂຕໃຫ້ບຸກຄົນທີ່ກະສັດພໍໃຈທີ່ຈະຍົກຍ້ອງນັ້ນ ແລະ ໃຫ້ຂຸນນາງຄົນນັ້ນຍ່າງນຳໜ້າມ້າທີ່ບຸກຄົນນັ້ນຂີ່ໄປຕາມຖະໜົນໃນເມືອງ, ພ້ອມກັບປະກາດວ່າ, ‘ຜູ້ທີ່ກະສັດພໍໃຈຢາກຈະຍ້ອງຍໍກໍສົມຄວນໄດ້ຮັບສິ່ງນີ້!’ ”
10ກະສັດໄດ້ສັ່ງຮາມານວ່າ, “ຈົ່ງໄປທັນທີ. ຈົ່ງນຳເອົາເສື້ອຄຸມກັບມ້າ ແລະ ໄປເຮັດຢ່າງນັ້ນຕາມທີ່ເຈົ້າສະເໜີໃຫ້ແກ່ມໍເດໄກຄົນຢິວ, ຜູ້ທີ່ນັ່ງຢູ່ທີ່ປະຕູວັງ. ຈົ່ງເຮັດຕາມທີ່ເຈົ້າໄດ້ສະເໜີມານັ້ນ ຢ່າໃຫ້ຂາດແມ່ນແຕ່ສິ່ງດຽວ”.
11ດັ່ງນັ້ນ ຮາມານຈຶ່ງໄດ້ນຳເອົາເສື້ອຄຸມ ແລະ ມ້າ. ລາວໄດ້ສວມເສື້ອຄຸມນັ້ນໃຫ້ມໍເດໄກ ແລະ ໃຫ້ລາວຂຶ້ນນັ່ງເທິງຫລັງມ້າ ແລ້ວຈູງໄປຕາມຖະໜົນໃນເມືອງ, ພ້ອມກັບຮ້ອງປະກາດຕໍ່ໜ້າລາວວ່າ, “ຄົນທີ່ກະສັດພໍໃຈຢາກຈະຍ້ອງຍໍກໍສົມຄວນໄດ້ຮັບສິ່ງນີ້!”
12ຫລັງຈາກນັ້ນ ມໍເດໄກກໍກັບຄືນໄປທີ່ປະຕູທາງເຂົ້າວັງ. ແຕ່ຮາມານກໍຟ້າວກັບຄືນເມືອເຮືອນ ພ້ອມກັບຄຸມຫົວຂອງຕົນດ້ວຍຄວາມໂສກເສົ້າ, 13ແລະ ໄດ້ເລົ່າເຫດການທີ່ເກີດຂຶ້ນທັງໝົດໃຫ້ນາງເຊເຣເຊເມຍຂອງຕົນ ແລະ ໝູ່ເພື່ອນທຸກຄົນຟັງ.
ບັນດາທີ່ປຶກສາຂອງລາວ ແລະ ນາງເຊເຣເຊເມຍຂອງລາວໄດ້ເວົ້າກັບລາວວ່າ, “ເພາະວ່າມໍເດໄກເປັນຄົນຢິວຕັ້ງແຕ່ເກີດ, ດັ່ງນັ້ນ ການທີ່ທ່ານໝົດອຳນາດລົງຕໍ່ໜ້າລາວ ທ່ານກໍຈະສູ້ລາວບໍ່ໄດ້ ຄືທ່ານຈະຕ້ອງຈິບຫາຍຢ່າງແນ່ນອນ!” 14ໃນຂະນະທີ່ ພວກເຂົາຍັງກຳລັງລົມກັນກັບມໍເດໄກຢູ່ນັ້ນ ບັນດາຂັນທີຂອງກະສັດກໍມາຮອດ ແລະ ຟ້າວພາຮາມານໄປໃນງານກິນລ້ຽງຂອງລາຊີນີເອສະເທີທີ່ໄດ້ຈັດຕຽມໄວ້ແລ້ວ.
Holy Bible, Lao Contemporary Version™| © 2023, 2025 by Biblica, Inc.|
Used with permission. All rights reserved worldwide.© 2023, 2025 by Biblica, Inc.