ເອສະເທີ 4
4
ມໍເດໄກຂໍຮ້ອງໃຫ້ເອສະເທີຊ່ວຍ
1ເມື່ອມໍເດໄກຮູ້ສິ່ງທີ່ຈະເກີດຂຶ້ນທັງໝົດ, ລາວກໍຈີກເຄື່ອງນຸ່ງຂອງຕົນ, ລາວກໍນຸ່ງຜ້າກະສອບເຂົ້າ ແລະ ເອົາຂີ້ເຖົ່າໂຮຍໃສ່ຫົວ ແລ້ວເຂົ້າໄປໃນເມືອງ, ຮ້ອງໄຫ້ສຽງດັງ ແລະ ຂົມຂື່ນ. 2ແຕ່ມໍເດໄກເຂົ້າໄປໄດ້ຮອດແຕ່ພຽງທີ່ປະຕູວັງເທົ່ານັ້ນ ເພາະຜູ້ໃດທີ່ນຸ່ງເຄື່ອງທີ່ເຮັດດ້ວຍຜ້າກະສອບເຂົ້າແມ່ນຈະບໍ່ໄດ້ຮັບອະນຸຍາດໃຫ້ຜ່ານເຂົ້າໄປ. 3ຢູ່ໃນທຸກແຂວງບ່ອນໃດທີ່ມີການປະກາດ ແລະ ຄໍາສັ່ງຂອງກະສັດໄດ້ມາເຖິງ, ກໍມີການໂສກເສົ້າຢ່າງໜັກໃນທ່າມກາງຊາວຢິວ, ມີການອົດອາຫານ, ຮ້ອງໄຫ້ ແລະ ຄ່ຳຄວນ. ມີຫລາຍຄົນນຸ່ງເຄື່ອງຜ້າກະສອບເຂົ້າ ແລະ ນອນຢູ່ໃນກອງຂີ້ເຖົ່າ.
4ເມື່ອບັນດາສາວໃຊ້ ແລະ ບັນດາຂັນທີຂອງເອສະເທີໄດ້ມາບອກນາງກ່ຽວກັບເລື່ອງມໍເດໄກ, ນາງກໍທຸກໃຈຫລາຍ. ນາງໄດ້ສົ່ງເຄື່ອງນຸ່ງໄປໃຫ້ມໍເດໄກໃສ່ແທນຜ້າກະສອບເຂົ້າ. ແຕ່ລາວບໍ່ຍອມຮັບເຄື່ອງນຸ່ງເຫລົ່ານັ້ນ. 5ແລ້ວເອສະເທີກໍໄດ້ເອີ້ນຮາທາກໃຫ້ມາພົບ, ເຊິ່ງເປັນຄົນໜຶ່ງໃນພວກຂັນທີຂອງກະສັດທີ່ໄດ້ຮັບມອບໝາຍໃຫ້ເປັນຄົນຮັບໃຊ້ຂອງນາງ ແລະ ສັ່ງໃຫ້ລາວອອກໄປພົບມໍເດໄກເພື່ອຖາມເຖິງສາເຫດ ແລະ ຄວາມເດືອດຮ້ອນຂອງມໍເດໄກ.
6ດັ່ງນັ້ນ ຮາທາກຈຶ່ງອອກໄປພົບມໍເດໄກຢູ່ທີ່ສີ່ແຍກກາງເມືອງໜ້າປະຕູທາງເຂົ້າວັງ. 7ມໍເດໄກໄດ້ບອກລາວທຸກສິ່ງທີ່ເກີດຂຶ້ນກັບຕົນ, ລວມທັງເລື່ອງຈຳນວນເງິນທີ່ຮາມານໄດ້ສັນຍາຈະມອບເຂົ້າຄັງຫລວງເພື່ອການທຳລາຍຊາວຢິວ. 8ມໍເດໄກຍັງໄດ້ມອບເນື້ອໃນສຳເນົາຂອງຄຳສັ່ງທີ່ໄດ້ປະກາດໃນເມືອງຊູຊາໃຫ້ແກ່ຮາທາດ, ເພື່ອເອົາໃຫ້ເອສະເທີເບິ່ງ ແລະ ອະທິບາຍເລື່ອງນີ້ສູ່ນາງຟັງ ແລະ ມໍເດໄກໄດ້ບອກລາວແນະນໍາໃຫ້ນາງໄປພົບກະສັດ ເພື່ອອ້ອນວອນຂໍຄວາມເມດຕາ ແລະ ຄວາມກະລຸນາກັບເພິ່ນສຳລັບພີ່ນ້ອງຮ່ວມຊາດຂອງນາງ.
9ຮາທາກໄດ້ກັບຄືນເມືອ ແລະ ໄດ້ລາຍງານແກ່ເອສະເທີເຖິງສິ່ງທີ່ມໍເດໄກເວົ້າ. 10ຫລັງຈາກນັ້ນ ເອສະເທີກໍໄດ້ສັ່ງລາວໃຫ້ບອກມໍເດໄກວ່າ, 11“ບັນດາຂ້າລາຊະການ ແລະ ປະຊາຊົນທັງໝົດຂອງແຂວງຕ່າງໆຍ່ອມຮູ້ກົດດີວ່າ ຜູ້ໃດກໍຕາມບໍ່ວ່າຈະເປັນຊາຍ ຫລື ຍິງທີ່ເຂົ້າມາໃນເດີ່ນດ້ານໃນໂດຍບໍ່ໄດ້ຖືກເອີ້ນໃຫ້ພົບກະສັດ ແຕ່ມີກົດໝາຍຂໍ້ໜຶ່ງຄື: ພວກເຂົາຈະຕ້ອງຕາຍ ເວັ້ນແຕ່ກະສັດຈະຍື່ນໄມ້ຄ້ອນເທົ້າຄຳຂອງເພິ່ນໃສ່ພວກເຂົາ ແລະ ຈະໄດ້ຮັບການໄວ້ຊີວິດ. ແຕ່ກະສັດບໍ່ໄດ້ເອີ້ນຂ້ອຍເຂົ້າໄປຫາເພິ່ນເປັນເວລາສາມສິບວັນແລ້ວ”.
12ເມື່ອຄໍາເວົ້າຂອງເອສະເທີໄດ້ຖືກລາຍງານໄປຫາມໍເດໄກ, 13ລາວກໍໄດ້ສົ່ງຄຳຕອບກັບຄືນມາດັ່ງນີ້: “ຢ່າຄິດວ່າເຈົ້າຢູ່ໃນວັງຂອງກະສັດແລ້ວ ເຈົ້າຈະເປັນຊາວຢິວຄົນດຽວທີ່ຈະລອດພົ້ນໄປໄດ້. 14ຖ້າເຈົ້າຍັງມິດງຽບຢູ່ໃນເວລານີ້, ຄວາມຊ່ວຍເຫລືອ ແລະ ການປົດປ່ອຍຊາວຢິວຈະມາຈາກບ່ອນອື່ນ, ສ່ວນເຈົ້າກັບຄອບຄົວຂອງພໍ່ເຈົ້າຈະຈິບຫາຍ ແລະ ບາງທີການທີ່ເຈົ້າມາຮັບຕຳແໜ່ງລາຊີນີກໍເພື່ອໃນເວລາເຊັ່ນນີ້ ຜູ້ໃດຈະຮູ້?”
15ດັ່ງນັ້ນ ເອສະເທີຈຶ່ງໄດ້ສົ່ງຄໍາຕອບນີ້ໄປຫາມໍເດໄກວ່າ: 16“ຈົ່ງໄປຮວບຮວມຊາວຢິວທັງໝົດໃນປ້ອມເມືອງຊູຊາ ແລະ ໃຫ້ພາກັນຖືສິນອົດອາຫານເພື່ອຂ້ອຍ. ຢ່າກິນ ຫລື ດື່ມອັນໃດຕະຫລອດເວລາສາມວັນ ຫລື ສາມຄືນ. ຂ້ອຍ ແລະ ບັນດາສາວໃຊ້ຂອງຂ້ອຍກໍຈະຖືສິນອົດອາຫານເຊັ່ນດຽວກັນ. ຫລັງຈາກນັ້ນແລ້ວ ຂ້ອຍຈະໄປຫາກະສັດ, ເຖິງແມ່ນວ່າຈະເປັນການຝ່າຝືນກົດໝາຍກໍຕາມ ແລະ ຖ້າຂ້ອຍຕ້ອງຈິບຫາຍ, ຂ້ອຍກໍຍອມ”.
17ດັ່ງນັ້ນ ມໍເດໄກກໍໄດ້ອອກໄປ ແລະ ປະຕິບັດຕາມຄໍາແນະນໍາຂອງເອສະເທີທຸກຢ່າງ.
Currently Selected:
ເອສະເທີ 4: LCV
Highlight
Copy
Compare
Share
Want to have your highlights saved across all your devices? Sign up or sign in
Holy Bible, Lao Contemporary Version™| © 2023, 2025 by Biblica, Inc.|
Used with permission. All rights reserved worldwide.© 2023, 2025 by Biblica, Inc.