Yiib 9

Bʋnkɔnbidi kpiid Egipt la yɛla

1Ka Zugsɔb yɛl Moses ye, “Kem yɛl Na'ab Faaro ye Zugsɔb onɛ an Hibiru dim Wina'am la yɛl si'em nwa' ye, ‘Kɛl ka m nidib banɛ an Israel dim la yii keŋi pʋ'ʋs mam. 2Ka fʋ ya'a zan'as ka pʋ kɛ ka ba keŋɛ, 3Zugsɔb na kɛ ka ban'abɛ'ɛd gban'e ya bʋnkɔnbid banɛ an widi nɛ bʋmis nɛ yʋgʋma nɛ niigi nɛ pɛ'ɛs nɛ bʋʋs. 4Amaa Zugsɔb na bak Israel bʋnkɔnbid nɛ Egipt dim bʋnkɔnbid, ka Israel bʋnkɔnbʋg baa yinne kʋ kpii. 5Ka Zugsɔb tis saŋa ye li yimbɛog, on Zugsɔb na tʋm bʋnkaŋa teŋ la ni.’”

6Ka li yimbɛog ka Zugsɔb sid tʋm wʋʋ on yɛl si'em la, ka Egipt dim bʋnkɔnbid wʋsa kpi, amaa Israel bʋnkɔnbʋg baa yinne pʋ kpii. 7Ka Na'ab Faaro tʋm dap ye ba gɔs ye Israel dim bʋnkɔnbid on an wala, ka ba nyɛ ka baa yinne pʋ kpii. La'an nɛ wala ka o sʋnf digilim ka o zan'as ye ba kʋ keŋɛ.

Bʋmmɔta li Egipt teŋin la yɛla

8Ka Zugsɔb yɛl Moses nɛ Aaron ye, “Gbin'emi tampɛligim dan'aŋin, ka kɛ ka Moses yɛligi li bas pɛbisimin ka Faaro nyɛ. 9Ka li na kilim uusʋg Egipt teŋin, ka na kɛ ka bʋmmɔta sig teŋ la ni na gban'e saalib nɛ bʋnkɔnbid wʋsa Egipt teŋin.” 10#Nie 16:2 Ka ba gbin'e tampɛligim bugum la pʋʋgin zi'en Faaro tuon, ka Moses yɛlig tampɛligim la. Ka bʋmmɔta di'e teŋ la ka li kilim fɛn'ɛd saalib nɛ bʋnkɔnbid wʋsa ni. 11Ka banɛ tʋm nyalima la pʋ lɛn nyaŋi zi'e Moses tuon ya'asɛ, bɔzugɔ ba niŋgbina wʋsa da anɛ fɛn'ɛd nɛ mɔda ma'aa nɛ Egipt nidib la wʋsa. 12Amaa Zugsɔb da kɛ ka Faaro sʋnf digilim ka o pʋ wʋm tis Moses nɛ Aaron wʋʋ Zugsɔb la pʋn yɛl Moses si'em la.

Sakuga li Egipt teŋin la yɛla

13Ka Zugsɔb yɛl Moses ye, “Duom bɛkɛungʋ sia'al Na'ab Faaro ka yɛl o ye Zugsɔb onɛ an Hibiru dim Wina'am la yɛl ye, ‘Kɛl ka m nidib la yii keŋ pʋ'ʋsim. 14Ya'a ka' ala, m na kɛ ka namistita'ar lu fʋn nɛ fʋ kpɛɛmnam nɛ fʋ nidib la wʋsa zugin ka ya na baŋ ye sɔ' pʋ bɛ dunia nwa' ni nwɛnɛ mam. 15M naan tun'e kɛɛn ka ban'akpi'euŋ sigi ya teŋ nwa' ni na kʋ fʋn nɛ fʋ nidib la wʋsa ka hali baa ya nid yinne kʋ lɛm bɛɛn dunia nwa' nii. 16#Rom 9:17 Amaa nɛ'ɛŋa zug ka m kɛ fʋ an na'ab, ye m pa'alim paŋi zem si'em, ka li kɛ ka m yʋ'ʋr tiig dunia wʋsa. 17Fʋ nan kpɛn dʋ'ʋsidi fʋ mɛŋ ka zan'as ye mam nidib la kʋ yii keŋɛ. 18Dinzug, bɛog anwa win m na kɛ ka sakugtitada banɛ nam zi' lu Egipt teŋin lin yii li pin'ilʋgʋ ti paae zina la li na. 19Kɛl ka ba mɔri ya bʋnkɔnbidi kuli ya yaan, ka ya'a ka' ala sakuga la ya'a ye li kena, li na kʋ nidib nɛ bʋnkɔnbid banɛ wʋsa pʋ bɛ yinne.’” 20Ka Na'ab Faaro kpɛɛmnam banɛ zɔt Zugsɔb la keŋi mɔri ba yammis nɛ ba bʋnkɔnbidi kul na yɔ'. 21Amaa banɛ ki'is Zugsɔb nɔɔr la basi ba yammis nɛ ba bʋnkɔnbid la nɛ mɔɔgin.

22Ka Zugsɔb yɛl Moses ye, “Ʋkimi fʋ nu'ug agɔl ka sakuga na lu Egipt teŋin la wʋsa. Di na lu nidib nɛ bʋnkɔnbid nɛ mɔɔd wʋsa linɛ bɛ Egipt pʋʋgin.” 23Ka Moses ʋk o dansaar la agɔl, ka Zugsɔb tʋm satansʋg nɛ sakuga na, ka sa-ian'asʋg bugum paae teŋin na. Ka Zugsɔb kɛ ka sakuga di'e Egipt teŋ la wʋsa. 24Sakuga la da lutnɛ hali ka saa ɛɛn iank nya'aŋi gaad tuon. Nwa' da gaad sakuga sisi'em wʋsa din yi Egipt da pin'ili ti paae saŋkan la. 25Ka lin yi Egipt teŋ la wʋsa sakuga la da kʋnɛ nidib nɛ bʋnkɔnbid banɛ wʋsa bɛ pɔɔdin. Ka san'am mɔɔd, ka kɔ' tiis buudi wʋsa. 26Ka zin'ikanɛ ka sakuga la da bas anɛ Gosen ma'aa, bɔzugɔ teŋ kan ka Israel dim da bɛ.

27Ka Na'ab Faaro buol Moses nɛ Aaron ka ye, “Nannanna mam tʋm taal ka Zugsɔb on tʋm sʋm. Mam nɛ m nidib la tʋm bɛ'ɛd. 28Sɔsim Zugsɔb ye o kɛ ka satansʋg nɛ sakuga la bas ala ka li sia'al ya. M na kɛ ka ba yii keŋ ka kʋ lɛn kpɛlim kpɛla.” 29Ka Moses yɛl o ye, “M ya'a yi tempʋʋg nwa' ni, m na ʋki m nu'ug ka sɔs Zugsɔb ye o kɛ ka satansʋg nɛ sakuga la bas. Ka nwa' na kɛ ka fʋ baŋ ye dunia la wʋsa bɛ nɛ Zugsɔb nu'usin. 30Amaa m mi' sʋ'ʋŋa ye fʋn nɛ fʋ kpɛɛmnam la pʋ zɔt Zugsɔb Wina'am.”

31Saŋkan la ka ba gum puud ka mui mɛ bi'ig, amaa ba wʋsa da san'amnɛ. 32Amaa ki sieba banɛ kpɛlim la on da pʋ san'am, bɔzugɔ ban da nam pʋ bi'igɛ.

33Ka Moses bas Faaro ka yi tempʋʋg la yiŋ, ka ʋk o nu'us agɔla sɔs Zugsɔb la, ka satansʋg nɛ sakuga la bas ka saa la mɛ bas niib. 34Faaro nyɛ ka saa nɛ sakuga nɛ satansʋg la bas la, ka o lɛn tʋm bɛ'ɛd. Ka on nɛ o kpɛɛmnam digilimi ba sʋnya. 35Faaro digilimi o sʋnf ka zan'as ye Israel dim la kʋ keŋɛ, wʋʋ Zugsɔb la pʋn yɛl Moses si'em la.

Currently Selected:

Yiib 9: kus_gh

Highlight

Copy

Compare