Yiib 10

1Ka Zugsɔb yɛl Moses ye, “Kem kpɛn' Faaro san'an ka m digilim on nɛ o kpɛɛmnam la wʋsa sʋnya, dinɛ na kɛ ka m tʋmmi m tʋʋmnyalima la ba san'an. 2Ka ya na ti yɛli ya biis nɛ ya yaas mam da mugus Egipt dim ka tʋm nyalima si'em la. Ala ka ya na baŋ ye manɛ an Zugsɔb la.”

3Ka Moses nɛ Aaron keŋ Faaro san'an yɛl o ye, “Nwa' ka Zugsɔb onɛ an Hibiru dim Wina'am la yɛl: ‘Nɔɔra ala ka fʋ na zan'as ye fʋ kʋ sie fʋ mɛŋ mam san'anɛ? Saŋkanɛ ka fʋ na kɛ ka m nidib la yi ka wɔ'ɔgi ma? 4Fʋ ya'a ye fʋ kʋ kɛ ka ba yii, m saa na mɔr na'azɔmnam bɛog na; 5ka ba na di'e teŋ la wʋsa ka fʋ kʋ nyɛ titan nɛ. Ba na ɔnb dinɛ ka sakuga san'am ka li kpɛlim fiin la, ka ɔnb tibanɛ bɛ mɔɔgin la wʋsa. 6Ka ba na pɛ'ɛl fʋn nɛ fʋ kpɛɛmnam nɛ Egipt dim wʋsa yaan. Bʋnkaŋa na an linɛ ka ya saamnam nɛ ya yaanam banɛ da pin'ili bɛ teŋin la ti paae zina nan zi' nyɛɛ.’” Ka Moses fɛndigi yi ka bas Na'ab Faaro.

7Ka Na'ab Faaro kpɛɛmnam la ye, “Dau kaŋa na namisi ti anwa paae wala bɛnnɛ? Kɛl ka nidib la yii keŋ ka pʋ'ʋsi ba Zugsɔb Wina'am la. Fʋ nam pʋ baŋ ye Egipt san'amnɛɛ?” 8Ka ba mɔr Moses nɛ Aaron n lɛb Na'ab Faaro san'an na. Ka o ye, “Yim keŋ pʋ'ʋsinɛ ya Zugsɔb Wina'am la. Amaa m lɛɛ ye m bu'osnɛ baŋ ye, anɔ'ɔnamɛ na keŋɛ?” 9Ka Moses lɛbis ye, “Tinam nɛ ti biis nɛ ti kpɛɛmnam nɛ ti biribis nɛ bipumis nɛ ti bʋnkɔnbid wʋsa na keŋ. Bɔzugɔ ti na keŋ maal di'ema malʋŋʋ tis Zugsɔb la.” 10Ka Na'ab Faaro ye, “Zugsɔb la sid na bɛ nɛ ya, amaa man kʋ siak ka yanam nɛ ya pu'ab nɛ ya biis la yii! Bɔzugɔ m pʋn mi' ye ya gban'anɛ bɛ'ɛd. 11Ayei! Kɛl ka dap la ma'aa keŋ pʋ'ʋs Zugsɔb la, mɛ fʋn pʋn bɔɔdin si'eli la?” Ka ba kad Moses nɛ Aaron n yis Na'ab Faaro san'an.

12Ka Zugsɔb yɛl Moses ye, “Tiesimi fʋ nu'ug teŋ la ni, ka na'azɔmnam na kena san'am si'el wʋsa dinɛ ka ba bʋd pɔɔdin la, nɛ banɛ ka sakuga pʋ san'am la.” 13Ka Moses ʋk o dansaar la ties Egipt, ka Zugsɔb kɛ ka sisi'em yi ya-nya'aŋ na gilig teŋ la wʋsa keŋ paae yʋ'ʋŋ. Ka bɛogʋ ti nie naae la ka teŋ la wʋsa di'e nɛ na'azɔmnam. 14#Nie 9:2-3 Ka ba di'e Egipt teŋ la wʋsa hali ka ka' kallɛɛ. Na'azɔmnam nan zi' kpɛn' teŋ la nii alaa, ka mɛ kʋ lɛn kpɛn' ya'asɛ. 15Ka ba pɛ'ɛl teŋ la wʋsa ka li sɔbig. Ka ba ɔnb la'abanɛ ka sakuga da pʋ san'am la, nɛ bʋmbʋta banɛ nan bɛ pɔɔdin, nɛ tiis wala la wʋsa. Ka vanma'asir baa yinne lɛn kae Egipt teŋin la ya'asɛ. 16Ka Na'ab Faaro buol Moses nɛ Aaron tɔ'ɔtɔ ka ye, “Mam maal taali tis Zugsɔb Wina'am nɛ fʋn. 17Kɛlli m taali bas, ka sɔs Zugsɔb Wina'am ka o yis namisʋg linɛ kʋʋdi ti la bas.” 18Ka Moses naan Na'ab Faaro san'anɛ yi ka sɔs Zugsɔb la 19ka o kɛ ka sisi'etita'ar yi ya-tuona na zi na'azɔmnam la wʋsa mɔri keŋ niŋ Atɛuk Zɛn'ug la ni, ka na'azɔm pʋ lɛn kpɛlim Egipt zin'isi'aa. 20Amaa ka Zugsɔb kɛ ka Na'ab Faaro sʋnf digilim ka o pʋ kɛ ka Israel dim la yii.

Lik tita'ari lu Egipt teŋin si'em

21Ka Zugsɔb yɛl Moses ye, “Tiesimi fʋ nu'ug la kpa' saŋgbana ni, ka Egipt wʋsa na an lik. Lik kan na mɔr dabiem.” 22Ka Moses nɔk o nu'ugʋ tiesi kpa' saŋgbana la ni, ka lik di'e Egipt teŋ la wʋsa daba atan', 23ka sɔ' pʋ nyɛt o tiraan bɛɛ on wa'ae zin'isi'a. Amaa Israel dim la bɛ zin'isi'a la wʋsa da mɔr nɛɛsim. 24Ka Na'ab Faaro buol Moses ka ye, “Yim keŋ pʋ'ʋsi nɛ ya Zugsɔb, yanam nɛ ya pu'ab nɛ ya biis, amaa basimini ya bʋnkɔnbid la.” 25Amaa Moses yɛl ye, “Asɛɛ ka fʋ basi ti ka ti mɔr bʋnkɔnbid la keŋ ka maal malima tisi ti Zugsɔb Wina'am. 26Ti bʋnkɔnbid la la'am kennɛ, hali ti pʋ ye ti bas tafɛɛgɔ; ti na nɔk sieba pʋ'ʋsi ti Zugsɔb Wina'am. Ka li ya'a ka' tinamɛ na paae nii, ti kʋ baŋ tinamɛ na nɔk bʋnkɔnbsi'a maal malʋŋ la tis Zugsɔba.” 27Amaa Zugsɔb digilim Na'ab Faaro sʋnf ka o pʋ siak ye Israel dim la yii keŋɛ. 28Ka Na'ab Faaro tans Moses ye, “Mɛlimi m tuon, m pʋ lɛm bɔɔd ye m nyɛɛf ya'asɛ! Daakanɛ ka m nyɛɛf, fʋ na kpi.” 29Ka Moses lɛbis o ye, “Nwɛnɛ fʋn yɛl si'em la, fʋ mɛ kʋ lɛn nyɛɛ ma!”

Currently Selected:

Yiib 10: kus_gh

Highlight

Copy

Compare