Ehokora 10

Kangeru no kavukaana

1Ngou na monine kangeru kamweya koka koro o ku ka tunda ku wiru. Shime ka vatire divui no dikongoro peuru thzo mutwi wako. Rupara rwako rwethsire eci diyuwa, mauru ako a monaharire eci maunthzi o mudiro. 2Ka kwatererire kavukaana mu dyoko o ku ka na thsikuka. Thsidyato thsako thso rudyo thsa dyatererire pa diwate, thso rumoho thsa dyatererire pa kaye. 3Ngou ka kumbire ko diywi dyodikuru eci kuvuruma ko nyime. Ou ka kumbire, kwa yuvaharire mishika thzo mutanu na thzidi o ku thzi tawa. 4Popa thza ambire ethzo mishika thzo mutanu na thzidi, amepo ni fota ku ñora, unone na yuvire diywi edi dya ambire ku wiru ci: “Eyi thzi na amba mishika thzo mutanu na thzidi po ikare diano, wa i ñora!”

5Kaya kangeru na monine o ku ka nemana pa diwate no pa kaye ngou ka yerwerire dyoko dyo rudyo mu wiru. 6Kethzire ngoro ko dithzina dyoyu yoya diyere na diyere, oyu wombire diwiru neyi i dimo yoihe, kaye neyi i dimo yoihe, no diwate neyi i dimo yoihe. Kaya kangeru ka ambire ci: “Kwithsa karo ku thzihama! 7Uno honi mu mayuwa aa ka ku shika kangeru ko muthsitanu na twidi torombita thzako, diano dya Nyambi kenge dya ku maneneniwa eci dyodi a i hongire kapikenthzi akwakukethza.”

8Ngou na yuvire diya diywi dya tundire ku wiru, dya ambire karo nange ci: “O thze o ka shimbe kaya kavukaana ka na thsikuriwa, kaya ka di mu dyoko dyo kangeru kaya ka nemana pa diwate no pa kaye.”

9Ngou na thzire ko kaya kangeru no ku ka ka romba ci ka ni pe ako kavukaana. Ka ambire ci: “O ka shimbe o ka dye. Kenge ka wawata mu dira dyoe, unone mu kanwa koe kenge ka towara eci oki.”#Ezek 2.8—3.3. 10Ngou na shimbire ako kavukaana mu dyoko dyo kaya kangeru no ku ka dya. Ka towarire eci oki mu kanwa kange, unone ou na ka minine ka wawatire mu dira dyange. 11Ngou ka ni amberire ci: “Waa roera kukethza karo ku mambunga oangi, matunga no mishovo no mafumu.”

Currently Selected:

Ehokora 10: mho

Highlight

Copy

Compare