Ehokora 11

Mambangi edi

1Ngou na piwire dimbungu dyo ku anekethzithsa dyo kupitura eci muramu no ku amberiwa ci: “O thze o ka anekethze Tembere thza Nyambi no katara, karo o ka tare akwakurombera awa a dimo.#Ezek 40—42. 2Uno honi wa ka anekethza dirapa dyo pora thzo Tembere. Wa ka di anekethza, inene di na piwa kwAnukenge, kenge a ku dyatadyata thsikuña thso shokenu thsa Yerusalema maonda o makumi ane na edi. 3Kenge na ku pa okoro ku mambangi ange edi aa a ku vata mathsaka. Kenge a ku kethza mwao mayuwa o 1,260.”

4Aa mambangi edi po etondo yo miywera idi no imeko yo tumbarambara idi eyi i nemana pa rupara rwa Fumu o kaye.#Zak 4.1-14. 5Ngeci munu ayepo fota ku kurura aa mambangi edi, mudiro waa tunda mu tunwa twao mambangi no ku ñotora akwethzimbo yo. Edi dya na roera ku fa wahe awa na foto ku wepithsa. 6Awo a di nokoro o ku yanthzera diwiru ci mvura a roka mu thsikati ethsi a ku kethza. Karo a di nokoro o ku pirura marware no mawate onyinga, nokoro o ku fura kaye ko makarara oahe ko thsikati thsothsihe ethsi a na shimi.

7Ao mambangi ou a ku mana ku pa ombangi wo, thsikondwama thso mu dikwina dyo kupira ondanda kenge thsa ku keya ku na wa rwithsa no ku wa othza no ku wepaa. 8Ethzimbi yo kenge ya kwikara pa mbanthza thzo thsikuña thsoshokuru omu ambiwerire Fumu wo pa mbinda. Ethso thsikuña aa thsi tendanga mathsierekethzi ci Sodoma na Egepita. 9Mu mayuwa ahatu no kaci ko diyuwa mambunga oahe, mishovo thzothzihe, no manjimi oahe no matunga oahe kenge a ku kenga ethzimbi yo no ku kana ku wa vumbeka. 10Anu o kaye kenge a ku nyanyukera kufa kowa akwakukethza aidi, no ku kwama thsidika apa a ku cipera ekunda, inene awa akwakukethza aidi na nyandithsa nene anu o kaye.

11Unone munyima thzo mayuwa ahatu no kaci ko diyuwa, Nyambi wa wa puyerire mwoyo awopo emana kedyato yo, wahe awa a wa monine a yapire nene. 12Awo akwakukethza aidi ngou a yuvire diywi dyodikuru ku tunderera ku wiru o ku di wa ambera ci: “Mu keye kuno.” Ngou a thzinine mu wiru mu divui, akwethzimbo yo o kwa na tanekera.

13Kethsiya thsikati kwekarire kungangama kokukuru ko kaye, thso mudikumi ku thsikuña thsa wire. Tukore to mutanu na twidi twanu a fire oko ku kungangama ko kaye. Awa a parire a yapire nene no ku shangara okuru wa Nyambi o ku wiru.

14Dikarara dyo muthsidi di na piti, dyo muthsihatu dyaa keya popano.

Torombita thzo muthsitanu na edi

15Kangeru ko muthsitanu na twidi ka shikire torombita thzako. Kwekarire maywi oakuru aa a kuererire mu wiru ci:

“Kutumina ko kaye,

ku nekara honi kutumina kwa Fumu wetu na Krisitu wenthzi,

karo kenge a ku tumina

diyere na diyere!”

16Ngou akuru o makumi edi nane awa ekarire pa mangunja a furumanine ku rombera Nyambi. 17A ambire ci,

“Fumu Nyambi Shokoro Ouhe,

oyu diko, karo oyu wekarako!

Twaa kanderera ku koe,

inene o na shimbi okoro woe,

karo o na tateka ku tumina!

18Matunga a anthzipire,

unone thsikati thsoanthzi woe thsi na kumu,

thsikati thsi na kumu thso ku ratura afu,

no ku pa miyambo kwapikoe akwakukethza,

nanuoe owakenu wahe,

owakuru mu thsivaka nowa owaonye,

akwakutawa wahe awa na yapa dithzina dyoe.

Thsikati thsi na kumu thso ku thzirithsa

awa epithsa kaye!”

19Tembere thza Nyambi thzo mu wiru thza yanthzururiwire, pongithsi thzo thsiyuvano thza monaharire mu Tembere thzenthzi. Kwekarire kwethsa ko mvura, mivumo, mishika no kungangama ko kaye no mbwe thzothzikuru.

Currently Selected:

Ehokora 11: mho

Highlight

Copy

Compare