Fyrra Sámuelsbók 11
11
Sául vinnur sigur á Ammonitum
1Um hetta bilið fór Náhasj Ammoniti og kringsetti Jábesj í Gilead; og allir menninir í Jábesj søgdu við Náhasj: «Ger sáttmála við okkum, so vilja vit tæna tær.» 2Men Náhasj Ammoniti svaraði teimum: «Við hesum treytum skal eg gera sáttmála við tykkum, at eg stingi út á øllum tykkum høgra eyga til vanvirðingar fyri allan Ísrael.» 3Tá søgdu hinir elstu í Jábesj við hann: «Gev okkum sjey daga frest, so skulu vit lata ørindrekar fara um í øllum Ísraels landi, og kemur tá eingin okkum til hjálpar, munnu vit gevast upp til tín.»
4Og tá ið boðberarnir komu til Sáuls Gibeu og søgdu fólkinum ørindi síni, skóru tey øll í at gráta. 5Men í sama bili kom Sául úr bønum við oksunum, og hann spurdi: «Hví grætur fólkið?» Teir søgdu honum tá ørindi Jábesjmanna. 6Men tá ið Sául hoyrdi hesi tíðindi, kom andi Guðs yvir hann, og øgilig vreiði kom í hann. 7Hann tók tveir oksar og høgdi teir í nógvar lutir, ið boðberar bóru um alt Ísraels land og søgdu: «Soleiðis skal verða gjørt við oksar alra teirra, ið ikki vilja fylgja Sáuli og Sámueli í bardaga!» Tá kom ótti Harrans á fólkið, so at teir allir fylgdu í ferðini. 8Síðan kannaði hann herliðið í Bezek; vóru tað trý hundrað túsund av Ísraelsmonnum og tríati túsund av Júdamonnum.
9Og hann segði við boðberarnar, ið komnir vóru: «Sigið Jábesjmonnum í Gilead: Í morgin, tá sólin tekur at brenna, fáa tit hjálp.» Tá ið Jábesjmenn frættu hesi tíðindi av boðberunum, vórðu teir glaðir 10og søgðu við Náhasj: «Í morgin geva vit okkum upp til tykkara; gerið tá við okkum, sum tykkum lystir.» 11Morgunin eftir skifti Sául herliðið sundur í tríggjar bólkar; teir brutu síðan á morgunvøkuni inn í herbúðirnar og feldu Ammonitar alt at hádegi; og teir, ið komust undan, spjaddust í allar ættir, so ikki tveir av teimum vóru saman.
12Tá segði fólkið við Sámuel: «Hvørjir vóru teir, ið søgdu: Eigur Sául at vera kongur yvir okkum? Flýggið okkum teir menn, so vilja vit týna teimum av lívi.» 13Men Sául mælti: «Á hesum degi má eingin týna lív; tí at í dag hevur Harrin givið Ísrael sigur.» 14Sámuel segði nú við fólkið: «Komið, latum okkum fara til Gilgals og endurnýggja kongsdømið.» 15Og alt fólkið fór til Gilgals og gjørdi har Sául at kongi fyri ásjón Harrans í Gilgal; og tey ofraðu takkaroffur fyri Harranum, og Sául og allir Ísraelsmenn fegnaðust har stórliga.
Currently Selected:
Fyrra Sámuelsbók 11: FB
Highlight
Copy
Compare
Share
Want to have your highlights saved across all your devices? Sign up or sign in
©1961 Bibelselskabet, The Danish Bible Society
