SOLOMON 8
8
1Nvng gas ngah ungwes yah
dyei nauh dvlom lwi dah vmang teh nghuot nhang mes.
Housoeh ngos nvng lyis talhoeu mha xauhgoh lyis bvlot yoh tanh,
hauh yvlyis hank eq cha ma nghamh.
2Ngos nvng lyis ngah ungwes yhen mha shwih loh las
nvng ngos lyis jyet goh cho yoh jyauh das.
Ngos nvng lyis xangh lhoeuq zvbiq,
tvleh shih jeis gvmshuk das.
3Nah loqwi loq gas ngos lyis loq uhkhoeuq khoeuq dyei las
nah loqyos loq yah ngos lyis po toh.
4Yerusalem vmesbih jens eh,
namoq ngamoq dah jyet cho mha ma nhauh das oen ngos lyis dangthoengh toh geh.
Lvkhyank Khyuk Vyang
Vmesbih jens
5Hai nyah hwank phoq yah
kvtoq loq gaiq las sihyos masyah los nyeis soeu ka hank nghuot?
Vmesbih
Nvng khoeu los dah joqyos
lvhomp zains khyei mha ngos nvng lyis nhauh.
6Ngos mas lai las gohyuk hank lyis eq vjyet,
ngos mas lai las gohyuk hank lyis eq vpo.
Jyet cho ka shei cho teh yomsoq bos.
Sainh twih zis eq shei cho teh yombos.
Houka nyilhyam thuq las
nyi soeh ngeh.
7Jyet cho nyi lyis jeis yah ma yoh sat.
Jeisnhauq las eq ma yoh nghop.
Nghuot laus eq dvyuk yuk nyang yohkhuiq zis yah hauh jyet cho tungh wis mes lyis,
houka jwangh nyhap zis dvxauh das.
Vmesbih dah vmang vnoeuh moq
8Ngamoq mas nauh ma buh shih dah
nhamhmuh mhauhlo dvyuk bos.
Nyang lyis los yoeuh dah loyvm bos los lyis
ngamoq nyah xiklyis khasoeh kuot das au?
9Nyang ciank nghuot ya
ngamoq nyah thoq mas ngwis tyoeuqzvm tsuk das.
Nyang khyam khomh nghuot lyis gas
arit thyeh yah gos toh das.
Vmesbih
10Ngos gas ciank nghuot,
ngah dyei nauh gas nyah tyoeuqzvm tsain nghuot.
Ngos gas nyang yah nghuot lyis nhaiq tap zis yah
nyenstap das zis ngah hwank phoq seq.
Vbusbih
11Solomon gas Bala Hamon ge joqyos mas
zvbiq dvkhyam yoh.
Houmha nyah jyank masyah khyam nghoh zwi bang bos.
Nyamoq gas ngwis kyvp dvyuk dvkhyoengh dyei.
12Solomon ngwis kyvp dvkhyoengh xauh yoeus,
khyam zwi bang eq dvyuk aiq xo xo gvmboms xauh.
Ngos gas ngvnyang dah zvbiq khyamh yoh toh.
13Ngah hwank nyhiq eh, ngos gas ngvnyang zvbiq khyam nghuot.
Hau khyam mhayah ngos nah thwe gyo mes.
Ngah lochangh jens nvng taiq das zis langh gyo nyeis.
Vmesbih
14Ngah hwank phoq eh, xangh tsain yuk dah boms jens mas dah lvlyo teh,
cvt kyoh teh, ngah jyank mas los aq.
Currently Selected:
SOLOMON 8: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.