Matius 14

Kinopotoyan ni Yuanis Moongodiu'

(Mrk 6:14-29; Luk 9:7-9)

1Iya iiri norongou ni Irudis, moomogkuasa so wonuo nu Galilia, abar suat so si Yisus. 2Mutongaro yo sono iyo so ongo pogawai niyo ri nu, “Tantu lobuw oono si Yuanis Moongodiu' noluli'an. Ono yo ko' kikuasa iyo momaal nu koiran-iran,” koo.

3Gulu ri, minonuu' iyo popongaakom so si Yuanis Moongodiu', kinogosan, om jiniil mongowaid nu koinginan ni Irudias sawo niyo, baya' sawo ni Pilipus, sulod-a niyo ri. 4Kikoinginan iyo soko iri so' tinangar ni Yuanis si Irudis nu, “Dai mu kowasa ontunon si Irudias!” koo.#Luk 3:19-20 #Ot 18:16; 20:21 5Padu ri maam potoyon niyo si Yuanis nu iya ya iiri, nga linumaa' iyo nu kolobuwan-i so' si Yuanis-o po pinokopoo'abar nosiro.

6Ido runat, iya ni Irudis minurami-rami pongoondoman nu kinopuonakan so iyo ri, minonari sono roraa ni Irudias so tiningkuangon nu lobuw suang-i, om sobana ko noondayan si Irudis nu poonari niyo ri. 7Mongiboto yo sono iyo nu, onu-onu ya pokitaakon nu roraa ri tumbaidon-a niyo.

8Pagka biniatan roraa ri nu ino niyo ri, mutongaro yo sono iyo nu, “Pokitaakon ku ulu ni Yuanis Moongodiu' nu ono sono tu ya, om nisakoi so talam,” koo roraa ri.

9Norongou-o po ni Irudis pinokitaak nu roraa iiri, sobana ko olunggui iyo, nga pagka nokopongibot-o iyo so tiningkuangon nu tombuoi niyo ri, tumbaido yo niyo pinokitaak nu roraa ri. 10Monuuo yo iyo nu lobuw poian so jiil momunggol nu ulu ni Yuanis. 11Sokoyi yo nosiro ulu iiri so talam, om taaki yo so roraa ri, om owito yo nu roraa ri so ino niyo ri. 12Nopupus iri, olapo yo nu mompomaid ni Yuanis bangkai niyo ri om lobongi yo, om miano yo nosiro paabar nu iri so si Yisus.

Nopookan si Yisus nu limo noribu lobuw

(Mrk 6:30-44; Luk 9:10-17; Yns 6:1-14)

13Norongou-o po ni Yisus tuturan iiri, sumokoyo yo Iyo nu alud mian so tontong oyiyingo. Nga norongou-o po nu lobuw suang-i nu minulaiw Iyo, mulolaiwo yo nosiro kiat so kampung nosiro, om montaso ya tumarak so Iyo. 14Tumindal si Yisus so alud-i, om nosiou Niyo lobuw suang-i, sobana ko noluluudan Iyo so nosiro. Indadi, polii yo sono Niyo lobuw morosakit so nosiro ri.

15Awi-awi ri, lumogaa yo mompomaid Niyo ri dii so Iyo om mutongaro yo nu, “Oo Guru, pagka tumuong-o om oyiyingo tuui, owarong suu'on Mu nosiro mian so kampung momoli nu ingkookan,” koo.

16Sumombuto yo si Yisus nu, “Adang-a poponowon nosiro. Pookano muyu ya nosiro,” koo.

17Sumombuto yo mompomaid Niyo ri nu, “Ono yo su kuwai so kai, limo nowatu baang-baang om duo nokayu pait,” koo.

18“Owito muyu yo tuui, ontob kuwai nai so kou no,” koo si Yisus. 19Suuo yo sono Niyo poogom kolobuwan iiri so korikutan-i, om olapo yo Niyo limo nowatu baang-baang om duo nokayu pait-i, om tumingaa'o yo mongunsopot so Kinoringan. Nopupus Iyo mongunsopot, kobi-kobio yo Niyo baang-baang om pait-i, om taaki yo so mompomaid Niyo ri ipotayad-tayad so kolobuwan-i. 20Nowosugan-o po kolobuwan iiri, pumpungo yo nu mompomaid Niyo ri olu'-olu' ri, nokoponu' po opulu om duo podaka. 21Koosampuw nu lobuw minongokan iiri kiro-kiro limo noribu, sondiang po kowoinoyan om kololaingan.

Minompanou si Yisus so kulit nu sungoi

(Mrk 6:45-52; Yns 6:16-21)

22Nopupus iri, suuo yo ni Yisus ongo mompomaid Niyo ri sumakoi so alud-i, om pinopogulu ya muripau so liu' ri, nu laid Niyo monuu' pouli' nu kolobuwan-i. 23Nokouli' kolobuwan-i, tumidongo yo Iyo so ido bulud mogdu'a. Tumuong-o, kakal po Iyo dii. 24Iya oono, nokolintonga' yo mompomaid Niyo ri so liu' ri. Mulingi'-lingi' alud nosiro ri so' obasag gumbang-i, om osunsulakan nosiro uos-i.

25Duruk sumuab, momponowo yo si Yisus so kulit nu sungoi-i, lumoga' dii so nosiro. 26Nosiou-o po nosiro Iyo manou-panou so kulit nu sungoi-i, nokotigog om nokolaa' nosiro om gumonsoko yo nu, “Moinat-o!” koo.

27Nga sumombuto yo Iyo nu, “Ikod kou kigawa! Si Yisus Aku ya. Ikod kou ya kilaa'!” koo.

28Mutongaro yo sono si Pitrus nu, “Bang bana nu si Yisus ko ya, suuo aku yo mompanou so kulit nu sungoi-o mian nai so Ikau,” koo.

29Sumombuto yo si Yisus nu, “Tuui ko yo!” koo. Lumintuuno yo si Pitrus kiat so alud-i, om momponowo yo so kulit nu sungoi-i lumoga' dii si Yisus, 30nga nosiou-o po ni Pitrus nu opogon uos-i, linumaa' sono iyo, om nololok. Gumonsoko yo iyo nu, “Oo Tuhan, sopulo aku!” koo.

31Kuyuti yo iyo ni Yisus om tongaro yo nu, “Oo Pitrus, nokuro su dai ko poimaid so Aku nu otoroido inawo?” koo.

32Sumokoyo yo nosiro so alud-i, om uos-i nga miningkoyod-o. 33Sumurukudo yo sono ongo mompomaid-i so Iyo, om mutongaro yo nu, “Sobana ko Ikau-o su Anak nu Kinoringan,” koo.

Minomali' si Yisus nu ongo lobuw

so Ginisarit

(Mrk 6:53-56)

34Nokologa' yo po nosiro so sondipawon-i, tumidongo yo nosiro so Ginisarit. 35Notondu'an-o po nu kolobuwan-i nu si Yisus nokologa' ri, obari yo sono nosiro so pilolongkop nu bandar-i, om kiawi' lobuw morosakit nga, inowit nosiro dii so Iyo. 36Mokililaa yo nosiro monaambai nu insan ririg-a nu sabung Niyo ri, om kiawi' nosiro nopoli'an.

Currently Selected:

Matius 14: TomPWPgLgPn

Highlight

Copy

Compare