Matius 13

Salig-salig suat so lobuw posasad

nu sampug

(Mrk 4:1-9; Luk 8:4-8)

1Runat-a iiri lumobuso yo si Yisus kiat so waloi-i, om miano yo mogom so imbing nu liu'. 2Pagka osuang lobuw minuimpug so pililiwut Niyo ri, sumokoyo yo Iyo so alud, om lobuw suang-i minundii so imbing-i.#Luk 5:1-3 3Osuang nituduk Niyo so nosiro maid nu salig-salig nu,

“Ido koyuwan noposasad nu sampug. 4Laid niyo posasad-i, kuwai nopitak so lalan, om lumogaa yo sono su bombolog mongaawi' moninduk. 5Kuwai ya nopitak so tana' kikowotuan. Tinumuu' ya osikap sampug oono so' onipis tana' ri, 6nga kumodato yo po, linumonot sono so' dai nokolalom su wakat. 7Kuwai ya nopitak so koruwian. Tinumuu' ya nga notopu'an nu koruwian-i, om nolonot. 8Kuwai ya nopitak so tana' owarong, om minubua' sono, kuwai ya maatus, onom nopulu, om tolu nopulu minitalan nu pinumpung,” koo.

9Nopupus-o po Iyo musalig-salig, mutongaro po Iyo nu, “Bang kitolingo kou ya, rongowo muyu yo,” koo.

Tomod ni Yisus musalig-salig

(Mrk 4:10-12; Luk 8:9-10)

10Nopupus iri, lumogaa yo mompomaid ni Yisus mongoduat so Iyo nu, “Nokuro ka su musalig-salig Ko montuduk so lobuw suang iiri?” koo.

11Sumombuto yo Iyo so nosiro nu, “Tinaakan kou nu Kinoringan nu pongoorotian suat so poomogkuasa nu Kinoringan nu lobuw poimaid so Iyo, nga nosiro dai po. 12Suat so lobuw kipongoorotian-o, taakan po nu pongoorotian su' bolabi, nga lobuw d'ado pongoorotian, insan sabat pongoorotian nai so iyo no, olapon koimbagu.#Mat 25:29; Mrk 4:25; Luk 8:18; 19:26 13Ono yo ko' musalig-salig Aku so nosiro, so' monsiou pona nosiro nga soko dai ya kotondu'. Orongou pona nosiro nga soko dai ya korongou om dai koorati. 14Nourug itu no su' monuman nu tangar nu Kinoringan nilombus nu poo'abar Niyo gulu ri si Yisaya nu,

‘Mongkinongou-a nosiro dadan,

nga dai koorati.

Mongiro-kiro ya nosiro dadan,

nga dai ya moilaan ong onu koompusan.

15So' dai yo nosiro

koilo mongiro-kiro.

Nobongol om nobolou nosiro.

Nourug soko ono

tayon ong dai nosiro kosiou, korongou om koorati,

om mululi' nosiro tuui so Aku

sampai tobangon Ku,’

koo ri.#Yis 6:9-10 16Nga owarong sobana Kinoringan so kou, so' matag kou ya monsiou om mongkinongou. 17Ondomo muyu yo nu, osuang poo'abar nu Kinoringan om lobuw wokon mokisisiou om mokirorongou nu noongosiou om noongorongou muyu nu ono sono tu, nga dai nosiro kosiou om korongou,” koo si Yisus so mompomaid Niyo ri.#Luk 10:23-24

Orati nu salig-salig suat so lobuw posasad nu sampug

(Mrk 4:13-20; Luk 8:11-15)

18Mutongaro po si Yisus nu, “Rongowo muyu yo orati nu salig-salig suat so lobuw posasad nu sampug iiri. 19Sampug nopitak so lalan-i soko lobuw mongorongou nu abar suat so Kinoringan om Pogkuosaan Niyo, nga dai koorati. Lumoga' sono Wowaidon nu Moinat monolod nu tinongaran nu Kinoringan so inawo nosiro om olupaan nosiro tinongaran iiri. 20Sampug nopitak so tana' kikowotuan-i, soko lobuw mongorongou nu tinongaran iiri om poimaid sono nu bana ko osudu' inawo, 21nga tinongaran iiri dai ya kosondot so inawo nosiro, om sontagal-o olupaan-o. Bang kikoogutan-o nosiro intawa indoraayon so' nopoimaid nu totongaran oono, dai yo sono nosiro poimaid. 22Sampug nopitak so koruwian-i, soko lobuw kuwai yo po kogogawan suat so kokoyaan om koinginan so kowiawan nosiro, olupaan-o sono nosiro tinongaran nu Kinoringan, om gogoma'on nosiro dai yo sono musuat so koinginan Niyo. 23Sampug nopitak so tana' owarong-i, soko lobuw mongorongou nu tinongaran nu Kinoringan, om koorati om gogoma'on nosiro musuat so koinginan Niyo, soko sampug nisasad om osuang pinumpung,” koo si Yisus.

Salig-salig suat nu kutad so umo

24Musolig-soligo po si Yisus so lobuw suang-i nu, “Bang mogkuasa yo Kinoringan, soko moomutanom noposasad nu sampug owarong so umo niyo. 25Ido awi, nokoturuw-o po lobuw-i, lumogaa yo alod-alod nu moomutanom iiri, posasad nu linsou nu kutad so umo niyo ri, om mulaiwo yo. 26Nokoongotuu' yo po su paroi om nokopomusit, kutad-i nga otolang-a osiou so isop nu paroi oono. 27Lumogaa yo sono kolobuwan ginumaji so moomutanom oono om mutongaro yo nu, ‘Sampug-a boto iri nu owarong nisasad mu so umo oono, om kuwai sono kutad,’ koo. 28Sumombuto yo iyo nu, ‘Ono yo po gogoma'on nu alod-alod toko no,’ koo. Mongoduato yo sono kolobuwan ginumaji oono nu, ‘Moingin ko ka ong okaton mai kutad-o?’ koo. 29Nga sumombuto yo iyo nu, ‘Adang-a, so' bang okaton kutad-o, ookat-a pudi paroi-o. 30Potuu'on-a kutad oono maid nu paroi-o. Ologa' yo poomoroyan om tongaron ku nai' lobuw momaroi-o nu, “Okaton po gulu kutad-o, ongkoson, om susulan. Oopod ono momaroi nai', om iasuw so lingkut,” k'aku,’ koo songapan nu umo ri,” koo si Yisus.

Salig-salig suat nu linsou oworos

(Mrk 4:30-32; Luk 13:18-19)

31Musolig-soligo po si Yisus so nosiro nu, “Ong mogkuasa yo Kinoringan soko raja, gama' Niyo soko linsou nisasad nu lobuw so umo. 32Pudi landu oworos linsou oono, nga bang kotuu' po, ourug-a nu kayu okutuw, osiou nu lobuw suang, om murumun#13:32: murumun; intawa: murumbun sono bombolog so raan-o,” koo si Yisus.

Salig-salig suat so pongombang nu tapung

(Luk 13:20-21)

33Musolig-soligo po si Yisus so nosiro nu, “Bang mogkuasa Kinoringan soko raja, gama' Niyo soko pongombang nu tapung. Ong pokayon nu woinoi pongogawul nu osuang tapung so sanggan, sabat pona nga okombang-a tapung-o,” koo si Yisus.

Tomod ni Yisus musalig-salig

(Mrk 4:33-34)

34Kiawi' nituduk ni Yisus so kolobuwan-i, solig-soligon Niyo, 35tayon ong otuman tinangar nu Kinoringan nituturan nu ongo poo'abar Niyo gulu ri nu,

“Koduung monuturan Aku so nosiro,

solig-soligon Ku,

om monuturan Aku

nu dai po insan kointolang

kiat nu kinourugan nu wonuo tu,”

koo ri.#Lgu 78:2

Orati nu salig-salig suat nu kutad so paroi

36Laiwi yo ni Yisus kolobuwan-i, om mulio yo. Lumogaa yo sono mompomaid Niyo ri dii so Iyo mutangar nu, “Poorotio kai po nu salig-salig suat nu kutad so paroi iiri,” koo nosiro.

37Sumombuto yo Iyo nu, “Lobuw noposasad nu sampug owarong iiri, salig-salig suat so Aku, Anak nu Riniba. 38Om umo ri, salig-salig suat so wonuo tu. Sampug owarong-i, soko kolobuwan nourug-o nu inonakan nu Kinoringan. Kutad-i, soko kolobuwan nu dai moingin maid so Kinoringan, nga moingin maid so Wowaidon nu Moinat. 39Alod-alod nopopulo nu kutad-i, ono yo su Wowaidon nu Moinat. Iya poomoroyan, ono yo pongoowi'an nu wonuo tu, om kolobuwan momaroi iiri, ono yo susuu'on nu Kinoringan. 40Soko gama' mongokat, mongongkos om monusul nu kutad-i, soko ono ya ong ologa' yo pongoowi'an nu wonuo tu. 41Suu'on nu Anak nu Riniba susuu'on Niyo no potondiang nu kiawi' lobuw oraai kiat so puimpugan nu lobuw songapan nu Kinoringan, 42om nisubo so apui dai moda'. Nai yo nosiro tumangi' osonsara'. 43Nga lobuw minongowaid nu koinginan nu Kinoringan, koworongan nosiro kointolang so wonuo owagu nu Kinoringan, Amo nosiro, soko kiawi' osiowan koonawau nu runat. Indadi, bang kitolingo kou ya, rongowo muyu yo,” koo.

Salig-salig suat nu orata' nokolobong

so tana'

44Musolig-soligo yo si Yisus koimbagu nu, “Iya mogkuasa Kinoringan soko raja, gama' Niyo soko orata' nokolobong so tana' om nooyangan nu lobuw, nipululi' yo sono niyo polobong. Tanda' nu osudu'an iyo nu iri, wolii yo sono niyo kiawi' orata' nosongapan niyo ri, om wolio nai' niyo tana' kinooyangan nu orata' oono,” koo.

Salig-salig suat so kumala boorogo

45Musolig-soligo po si Yisus nu, “Bang mogkuasa yo Kinoringan, gama' Niyo soko ido poowoli modium nu kumala nu sobana ko boorogo. 46Nokooyang-o po iyo nu kumala nu sobana ko boorogo, wolii yo sono niyo kiawi' orata' niyo ri, pinomoli nu kumala iiri,” koo.

Salig-salig suat nu pukot

47Musolig-soligo po si Yisus nu, “Bang mogkuasa yo Kinoringan, gama' Niyo soko pukot nitaan, om boroginis pait sumulung. 48Pukot ono nga pudikon-o sono nu songapan-o potindal, om pili'on niyo pait-o. Pait owarong-i niasuw so raga om oraai-i niada'. 49Soko ono ya ong pongoowi'an-o nu wonuo tu. Popinigon nu susuu'on nu Kinoringan kolobuwan oraai kiat so kolobuwan mongowaid nu koinginan nu Kinoringan. 50Opinig-o po kolobuwan oraai oono, nisubo yo so apui om nai yo tumangi' nosiro osonsara',” koo si Yisus.

Pontudukan olaid om owagu

51Mongoduato yo si Yisus so nosiro nu, “Oorotian muyu ya ka kiawi' tinangar Ku iiri?” koo.

“Oo,” koo nosiro.

52Mutongaro yo sono si Yisus so nosiro nu, “Ono yo ko' moomontuduk nu Ukum iri notudukan suat so Pogkuosaan nu Kinoringan-o, soko ido koyuwan polukan nu gonggamon olaid-o om owagu no kiat so pootou'an niyo,” koo.

Lobuw Najarit dai poimaid so si Yisus

(Mrk 6:1-6; Luk 4:16-30)

53Nopupus-o po si Yisus musalig-salig, mulaiwo yo Iyo kiat dii, 54om mulio yo so polak Niyo ri montuduk so ongo waloi sosombooyangan-i. Kiawi' lobuw nokorongou nu poomontuduk Niyo ri, noiranan om minutangar nu, “Siombo gaam pinoguru'an Niyo? Om kiat siombo kuasa Niyo momaal nu koiran-iran? 55Okon ka ko Iyo iitu anak nu tukang kayu ri? Ino yo po Niyo nga si Maria om kosusulodan Niyo si Yakubus, si Yusup, si Simun om si Yudas. 56Om tuui ya kosusulodan Niyo woinoi. Siombo kinoguru'an Niyo nu kiawi' oono?” koo. 57Indadi tinulak sono nosiro si Yisus. Mutongaro yo sono Iyo so nosiro nu, “Koduung poo'abar nu Kinoringan, orumaton so kiawi' tontong, sondiang ko so tontong Niyo om kosusulodan Niyo kondiri,” koo.#Yns 4:44 58Pagka dai ya nopoimaid nosiro, dai ya osuang winaal Niyo nu koiran-iran dii.

Currently Selected:

Matius 13: TomPWPgLgPn

Highlight

Copy

Compare