Matius 15

Suat so poroodatan nu odu aki

(Mrk 7:1-13)

1Lumogaa yo dii si Yisus tinu-tinu lobuw Parisi, om moomontuduk nu Ukum kiat so Yirusalim mongoduat nu, 2“Nokuro su dai mongowaid mompomaid Mu no nu poroodatan nu odu aki toko ri? Mongokan nosiro nga dai muugas po laid nu palad mongowaid nu adat toko,” koo.

3Sumombuto yo si Yisus nu, “Om nokuro su kou nga dai mongowaid nu ponuu'an nu Kinoringan, om toroidoon muyu ya mongowaid nu poroodatan nu odu aki muyu? 4Minutangar Kinoringan nu, ‘Orumato yo ino amo muyu no, om isai yo po pokoraai nu ino amo niyo, subai potoyon,’ koo ri.#Kin 20:12; 21:17; Ot 20:9; Pom 5:16 5Nga montuduk kou nu, bang ido koyuwan kuwai otoop nitaak so ino amo niyo, nga mutangar iyo nu, ‘Nokotaak ku yo iri so Kinoringan,’ koo, 6lobuw oono dai yo muru' monabang po nu ino amo niyo. Soko ono yo mongowaid kou ya nu poroodatan nu odu aki muyu, nga dai kou mongowaid nu ponuu'an nu Kinoringan. 7Kou yo lobuw musingkopoimaid-poimaid! Bana ya nima tinangar nu Kinoringan nilombus nu poo'abar Niyo gulu ri si Yisaya nu,

8‘Totongaron-a nu lobuw iitu no

mongusaa' so Aku,

nga ado ya pongoondom so Aku.

9D'ado ya kosudaan

nu poongusaa' nosiro so Aku,

so' oturan-a nu lobuw

nituduk nosiro no,

okon-a ko oturan Ku,’

koo ri,” koo si Yisus.#Yis 29:13

Pontudukan suat nu onu yo po koinsaim nu lobuw

(Mrk 7:14-23)

10Mutongaro po si Yisus so kolobuwan-i nu, “Rongowo om orotio muyu yo. 11Okon-a ko onu yo po ookan nu lobuw tu su koinsaim nu lobuw om dai sono otoop mongusaa' nu Kinoringan, sondiang ko onu yo po totongaron oraai-o,” koo.

12Lumogaa yo sono mompomaid Niyo potuturan so Iyo nu, “Sobana ko sinumona lobuw Parisi ri so Ikau nu pinutangar Mu iri,” koo.

13Sumombuto yo Iyo nu, “Nosiro yo po soko tonoman okon ko nitanom ni Amo Ku so surga, okaton Niyo. 14Posimaidi muyu ya lobuw Parisi no. Nosiro yo po oono bolou. Bang lobuw bolou monanud#15:14: monanud; intawa: monandan nu wokon lobuw bolou, kiduo-duo so nosiro oratu so salut,” koo.#Luk 6:39

15Mutongaro yo si Pitrus so Iyo nu, “Poorotio po so kai salig-salig Mu iiri,” koo.

16Sumombuto yo Iyo nu, “Dai po bo gaam pudi kou koorati. 17Dai muyu po oorotian totongaron Ku no. Orati yo po nu oono, onu yo po okanon nu lobuw tu niasuw so kobang, lumombus so tian om taion sono. 18Onu yo po totongaron lumabus kiat so inawo, ono yo su koinsaim nu lobuw,#Mat 12:34 19so' ungkiat-o so inawo mintolang popoduon oraai, om koowit nu lobuw tu mokipopomatoi, lumapa', sumundal, monakou, momudut, om monimbaal. 20Ono yo kiawi' su koinsaim nu lobuw tu, okon-a ko ono dai kopuugas nu palad-o,” koo si Yisus.

Koimaidan nu ido woinoi bansa Kanaan

(Mrk 7:24-30)

21Nopupus iri, mulaiwo yo si Yisus kiat dii om miano yo so ido tontong orani so bandar Tirus om Sidun. 22Lumogaa yo dii so Iyo ido woinoi nu Kanaan mokiluluudon nu, “Oo Mongkupu ni Raja Daud! Tobango aku yo! Sinorungan nu moinat anak woinoi ku ri om sobana ko osonsara',” koo.

23Nga dai ya sinombutan Niyo woinoi iiri.

Miano yo sono dii so Iyo mompomaid Niyo ri mutangar nu, “Suuo po woinoi oono popanou! Mongugangau-a iyo muut-suut so toko,” koo.

24Sumombuto yo si Yisus nu, “Sinuu' Aku popodium-a nu lobuw Israil noongopalid-i,” koo.

25Lumogaa yo woinoi oono sumurukud so tiningkuangon Niyo om mutongaro yo nu, “Oo Tuan, tobango aku yo bo!” koo.

26Sumombuto yo Iyo nu, “Dai mutoop ong nisumad so asu#15:26: Lobuw okon ko Yaudi pinokaasu nu lobuw Yaudi. ingkookan nipookan so inonakan,” koo.

27Sumombuto yo woinoi-i nu, “Bana ya ono Tuan, nga insan asu no ya mongokan-a nu pinitak nu ompuan niyo no,” koo.

28Mutongaro yo sono si Yisus so woinoi oono nu, “Sobana ko poimaid ko. Pagka soko ono, tumbaidon Ku ya koinginan mu no,” koo. Iya ya iiri nopoli'an-o anak nu woinoi-i.

Minomali' si Yisus nu lobuw suang

29Soko iri po, lumombuso yo si Yisus yumuyuw so Liu' Galilia, om tumidongo yo so ido bulud mogom. 30Lumogaa yo sono osuang lobuw dii so Iyo mongowit nu lobuw kolimpo, bolou, kimai, bongolon, om osuang po kirorooton sondiang. Nipolak nosiro so tiningkuangon ni Yisus, om polii yo Niyo nosiro. 31Noiranan sobana lobuw suang-i nu nosiou nosiro, nu lobuw bobou-i nga koputangar-o, kolimpo ri nga nopoli'an, kakung-i nga kopanou-o, om bolou-i nga kosiou-o sono. Mongorayou sono nosiro nu Kinoringan nu bansa Israil.

Nopookan si Yisus nu lobuw opat noribu

(Mrk 8:1-10)

32Nopupus iri, paawo yo ni Yisus mompomaid Niyo ri om tongaro yo nu, “Oluluudan Aku nu kolobuwan iitu no so' kotoluan-o nosiro maid-waid so Aku, om kosiono noowi'an-o nosiro nu ingkookan. Dai su moingin pouli' so nosiro ong dai po kookan, so' lumaa' Aku nu oodan nosiro so lolanon-o,” koo.

33Mongoduato yo sono mompomaid Niyo ri nu, “Siombo koolapan toko tuui nu ingkookan nu muuma' so nosiro?” koo.

34Mongoduato yo Iyo so nosiro nu, “Tinu po ka baang-baang muyu?” koo.

“Turu po om tinu-tinu gontir nu pait,” koo nosiro.

35Suuo yo sono Niyo kolobuwan iiri poogom so tana' ri. 36Olapo yo Niyo turu nowatu baang-baang om gontir nu pait-i, om mongunsopoto yo so Kinoringan. Nopupus iri, kobi-kobio yo Niyo baang-baang om pait-i, om taaki yo Niyo so mompomaid Niyo ri, nu toyad-toyadon so lobuw-i. 37Nowosugan kolobuwan ono, impugo yo nu mompomaid Niyo olu'-olu' ri turu po nopodaka suang. 38Lobuw minongokan iiri, opat noribu sampuw dai po koiap kowoinoyan om kololaingan.

39Nopupus iri, suuo yo Niyo kolobuwan ono pouli', om sumokoyo yo sono Iyo so alud mian so wonuo nu Magadan.

Currently Selected:

Matius 15: TomPWPgLgPn

Highlight

Copy

Compare