Matius 11

Lobuw sinuu' ni Yuanis Moongodiu'

(Luk 7:18-35)

1Notudukan-o po ni Yisus opulu om duo mompomaid Niyo ri, mulaiwo yo Iyo kiat dii om miano yo so ongo bandar so kumoronian, montuduk nu kolobuwan, om paabar nu Abar Owarong kiat so Kinoringan.

2Norongou-o po ni Yuanis Moongodiu' iri nojiil-i, abar suat so gogoma'on ni Yisus Kristus, monuuo yo sono iyo nu tinu-tinu mompomaid niyo ri mian dii si Yisus, mongoduat nu, 3“Ikau-o ka iri sinuu' nu Kinoringan notangar ni Yuanis nu indadan mai, ko' mongindad kai po nu lobuw wokon?” koo.

4Pagka soko iri, sombuti yo ni Yisus duo koyuwan sinuu' ni Yuanis iiri nu, “Uli' kou yo, om obari muyu ya iyo ontob nosiou om norongou muyu no, 5ono yo lobuw bolou nga kosiou, lobuw kakung nga kopanou, lobuw bolangon nga opoli'an, lobuw bongolon nga korongou, lobuw minatoi nga oluli'an, om Abar Owarong nituturan so lobuw omiskin.#Yis 35:5-6; 61:1 6Osanang-o lobuw dai mintoron poimaid so Aku nu kosiou nu gogoma'on Ku,” koo si Yisus.

7Nokoungkayas-o po nosiro muli', monuturano yo si Yisus so lobuw-i suat so si Yuanis nu, “Iya nu inianan muyu dii si Yuanis so padang pantai, onu ka pinokisisiowan muyu? Minokisisiou kou nu lobuw dai opiot koimaidan, soko rikut otouruk? Dai! 8Onu pinokisisiowan muyu? Minokisisiou kou nu lobuw owarong pokakas? Kolobuwan-o po owarong pinokokasan ono, polak nosiro so waloi nu raja! 9Tongaro muyu yo, onu pinokisisiowan muyu! Minokisisiou kou ka nu ido poo'abar? Oo bana ya. Ala' nai' maayo po ko' poo'abar. 10Si Yuanis-o oono su kinuan gulu ri so Buuk nu Kinoringan nu,

‘Koo Kinoringan, itu yo sinuu' Ku.

Suu'on Ku yo iyo mogulu so Ikau

monginduas nu lolanan mu,’

koo ri.#Mal 3:1 11Si Yuanis Moongodiu' oono, maayo po ko' kiawi' lobuw so wonuo tu, nga lobuw obaba' so Pogkuosaan nu Kinoringan maayo po pangkat ko' si Yuanis. 12Kiat nu tumimpuun si Yuanis potuturan nu Abar Owarong sampai kosiono tu, lobuw songapan nu Kinoringan dadan indoraayon nu lobuw mokipoponolod so nosiro kiat so Pogkuosaan Niyo. 13Kiawi' nituduk nu ongo poo'abar om Ukum ni Musa, musingkologa' ni Yuanis, momirasat-o po suat nu ourug ong wagu.#Luk 16:16 14Om pudi ko dai kou poimaid, si Yuanis-o su soko si Ilia, iri nituduk so Buuk nu Kinoringan nu lumoga'.#Mal 4:5; Mat 17:10-13; Mrk 9:11-13 15Ong kitolingo kou, rongowo muyu yo!” koo.

16Mutongaro po si Yisus nu, “Soko itu yo poinongan Ku nu kolobuwan kosiono tu. Soko kololaingan nosiro, dai oilo oinsosomodan songogoman so pasar om momaau nu kouna'an nosiro nu,

17‘Mutogunggu kai suat so kou

nga dai kou mongalai.

Mongogotuung kai

nga dai kou oupusan,’

koo kololaingan oono. 18Soko ono ya ong nokologa' si Yuanis, minupuasa iyo om dai minonginum nu anggur. Minutangar sono lobuw suang nu sinorungan iyo nu moinat. 19Nga nokologa' Aku po, Anak nu Riniba, mongokan monginum Aku soko lobuw suang om tongaron-a nu lobuw nu, ‘Siowi muyu bo, oropuk Iyo mongokan om musingowukan. Moomokimuuna'-una' Iyo nu moomumpung nu sukai om lobuw wokon iri dai mongimaid nu pontudukan nu ugama,’ koo. Soko ono pona, koo'ilo nu Kinoringan kointolang-a nu obana so gogoma'on nu lobuw poimaid so Iyo,” koo si Yisus.

Tinu-tinu bandar d'ado lobuw poimaid

(Luk 10:13-15)

20Tumimpuuno yo si Yisus monginsala' nu kolobuwan so ongo bandar pinomaalan Niyo nu koiran-iran-i, so' d'ado lobuw so bandar oono rinumorogo momaal nu koraayan. 21Mutongaro yo Iyo nu, “Aagut kou yo su lobuw nu Kurajim! Aagut kou yo su lobuw nu Baitsaida! Bang dii so Tirus om Sidun su kinourugan nu tanda' nosiou muyu oono, tantu olaid-o nosiro rinumorogo momaal nu koraayan.#Yis 23:1-18; Ijik 26:1—28:26; Yl 3:4-8; Am 1:9-10; Ja 9:2-4 22Nga bang Runat-o Pongukuman, ogaan po ukuman nu Tirus om Sidun ko' kou. 23Om kou su lobuw nu Kapornaum! Intaman muyu bo gaam ong popongkaton kou so surga! Dai! Ala' nai' niada' kou so noraka! Bang dii so Sodom su kinourugan nu tanda' nosiou muyu oono, tantu kakal-a bandar oono nu kosiono tu.#Yis 14:13-15; Pgn 19:24-28 24Obaran Ku so kou nu, Runat Pongukuman nu Kinoringan, ogaan po nai' ukuman nu bandar Sodom ko' ukuman nu bandar oono,” koo.#Mat 10:15; Luk 10:12

Lumoga' yo tuui so Aku

(Luk 10:21-22)

25Iya oono nobogdu'a si Yisus nu, “Oo Amo songapan nu tana' om langit tu, munsopot Aku so Ikau, so' kiawi' nu ono nisusut Mu so lobuw opintar om moilo, nga niintolang Mu so lobuw d'ado oilo-ilaan. 26Ono yo su koinsanang nu inawo Mu,” koo.

27Mutongaro po si Yisus nu, “Kiawi' nga nitaak-o ni Amo Ku so Aku, om d'ado ido kotondu' so Aku sondiang ko Amo Ku. Om d'ado ido kotondu' nu Amo ku sondiang ko Aku om lobuw pointolangan Niyo no.#Yns 3:35; 1:18; 10:15

28Oo su lobuw maalon om owogatan, loga' kou yo tuui so Aku. 29Waido muyu yo niongosuu' Ku so kou no, om poguru' kou yo so Aku, so' Aku yo po osolimod om obaba' inawo, om kikosonangan kou sono.#Yir 6:16 30Niongosuu' om nipogama' Ku so kou no nga oruoi-a,” koo si Yisus.

Currently Selected:

Matius 11: TomPWPgLgPn

Highlight

Copy

Compare