Matius 12

Pusongkiwalan suat so Runat Pongintoronan

(Mrk 2:23-28; Luk 6:1-5)

1Ido Runat Pongintoronan, laid ni Yisus tumalib so umo, minongotu' sono mompomaid Niyo ri nu paroi om okano yo, so' winitilon.#Pom 23:25 2Nosiou-o po iri nu lobuw Parisi ri, tongaro yo Iyo nu tinu-tinu koyuwan so nosiro nu, “Siowi bo! Dai mongowaid nu Ukum toko mompomaid Mu no. Mugogoma'on nosiro nu dai kowasa toko goma'on nu Runat Pongintoronan,” koo nosiro.

3Sumombuto yo si Yisus nu, “Dai kou po ka nokobasa' nu winaal ni Raja Daud gulu ri, iya nu winitilon iyo om lobuw niyo ri? 4Minasuw iyo so Waloi nu Kinoringan, om minongokan nosiro nu baang-baang nokousaa' yo so Kinoringan, om dai insan ininsala' iyo nu lobuw. Ampa, mongowaid nu Ukum toko, ongo imam-a su kowasa mongokan nu iri.#1 Som 21:1-6 #Ot 24:9 5Intawa dai kou po ka nokobasa' so Ukum ni Musa nu, koduung Runat Pongintoronan, kiawi' imam mugogoma'on so Waloi Maayo nu Kinoringan? Ono nga kosala' ya nu pongoturan nu Runat Pongintoronan, nga dai ya nosiro insola'on.#Pong 28:9-10 6Orotio muyu yo tongaron Ku iitu, tuui kuwai lobuw oogot po ko' Waloi Maayo nu Kinoringan. 7Nokosurat so Buuk nu Kinoringan nu, ‘Okon-a ko ponaak-taak su koinginan Ku, sondiang ko sian-luluud,’ koo ri. Bang oorotian muyu tinangar Ku iitu, tantu dai kou ya pokosala' nu lobuw d'ado sala'.#Mat 9:13; Us 6:6 8Mutangar Aku soko ono, so' Aku yo su Anak nu Riniba om Aku yo su kopogbaya' nu Runat Pongintoronan,” koo si Yisus.

Lobuw kimai sompodi longon

(Mrk 3:1-6; Luk 6:6-11)

9Mulaiwo yo si Yisus kiat dii, om miano yo so waloi sosombooyangan. 10Dii kuwai ido koyuwan kimai sompodi longon, om tinu-tinu koyuwan modium nu pounayan monginsala' so si Yisus. Mongoduato yo nosiro nu, “Kowasa ya ka momali' nu lobuw nu Runat Pongintoronan?” koo.

11Sumombuto yo si Yisus nu, “Bang ido so kou kikambing om noratu kambing oono so uang olalom nu Runat Pongintoronan, dai ya ka nilabus nu songapan-o kambing oono kiat so uang-i?#Luk 14:5 12Boorogo po lobuw ko' kambing. Indadi, kowasa toko ya monabang nu lobuw nu Runat Pongintoronan,” koo. 13Tongaro yo sono Niyo lobuw kimai sompodi longon iiri nu, “Kaangi yo longon mu no,” koo.

Kaangi yo nu lobuw-i longon niyo ri, om sonduun-duun-a nopoli'an. 14Mulaiwo yo sono lobuw Parisi ri kiat so waloi sosombooyangan-i, om muupokato yo nosiro nu potoyon Iyo.

Uripon pinili' nu Kinoringan

15Noilaan-a ni Yisus nu mokipopongoraai lobuw Parisi ri so Iyo, mulaiwo yo sono Iyo kiat dii, om osuang lobuw minaid so Iyo. Polii yo Niyo kiawi' lobuw morosakit-i, 16nga pinogos Niyo nosiro paabar-abar so isai-isai ya. 17Soko iri po, notuman-o tinangar nu Kinoringan nilombus nu poo'abar Niyo gulu ri, si Yisaya nu,

18“Itu yo su pinili' om sinuu' Ku.

Iyo yo su sinomodan Ku

om musuat so inawo Ku no.

Nitaak Ku Atod Ku no so Iyo,

su' koponuturan Iyo

so kiawi' bansa

nu obana Aku.

19Dai Iyo mokimudaawa,

intawa muap-luap,

om dai orongou nu lobuw

bongut Niyo so ongo lalan.

20Dai Iyo mongoraai

nu lobuw orukung om d'ado orapan.

Om sumundur-a Iyo

mugogoma'on nu ono

sampai mogkuasa Iyo

nu kiawi' bansa

maid nu kopuolukan.#Yis 42:1-4

21Kiawi' bansa umarap so Iyo,”

koo ri.

Si Yisus om si Biiljibul

(Mrk 3:20-30; Luk 11:14-23)

22Indadi owito yo sono nu lobuw ido koyuwan bolou om bobou so' sinorungan nu moinat. Polii yo ni Yisus lobuw oono om koputangar om kosiou sono. 23Osuang lobuw noiranan nu iri om minutangar nu, “Iyo yo gaam su Mongkupu ni Raja Daud nijanji nu Kinoringan-i,” koo.

24Norongou-o po iri nu lobuw Parisi ri, sumombuto yo nosiro nu, “Ono yo ko' koponusub lobuw iitu nu moinat, so' tinaakan Iyo ni Biiljibul, wowaidon nu kiawi' moinat, nu kuasa,” koo.#Mat 9:34; 10:25

25Noilaan-a ni Yisus pikiran nosiro ri, mutongaro yo sono Iyo nu, “Bang muimpolanu kolobuwan so ido tontong mualod om mutotondiang, tantu obinasa tontong oono. Om soko ono ya ong mualod sompinunguan om mususub, tantu dai tumaan nu olaid. 26Soko ono ya pudi komoinatan-o, ong mupipinig om mualod, kopogkuosaan nosiro no dai tumaan nu olaid. 27Bang soko ono, isai ka so kuasa pinakai nu mompomaid muyu no monusub nu moinat? Nosiro ya kondiri monginsala' so kou, 28so' okon ko kuasa ni Biiljibul, nga kuasa nu Atod nu Kinoringan su pinakai Ku monusub nu moinat, om ono yo pongilaan muyu nu tumimpuun-o Kinoringan mogkuasa tuui so kou.

29Wowaidon nu Moinat-i soko ido koyuwan obasag om osukup sindata nu mongipat nu waloi niyo no. Kiawi' orata' niyo no osopulan. Nga bang lumoga' lobuw obasag po ko' iyo mongodoog, osolod sono nu lobuw oono kiawi' songapan niyo no. Aku yo su soko lobuw obasag iiri.

30Isai mokimupinig so Aku, lumawan so Aku. Om isai dai tumabang mongowit nu lobuw poimaid so Kinoringan, mongogorusou nu gogoma'on Ku.#Mrk 9:40 31Ono yo ko' mutangar Aku so kou nu, kiawi' koraayan om totongaron mubaag#12:31: totongaron mubaag; intawa: totongaron mubaag nu Kinoringan. oompunan-a, nga totongaron mubaag nu Atod nu Kinoringan, dai oompunan. 32Lobuw mutotongaron lumawan so Aku, Anak nu Riniba, oompunan-a, nga bang mutotongaron iyo mubaag nu Atod nu Kinoringan, dai iyo oompunan kiat kosiono tu sampai Runat Pongukuman,” koo.#Luk 12:10

Puun om bua'

(Luk 6:43-45)

33Mutongaro po si Yisus nu, “Bang owarong puun-o, owarong-a bua' no, nga bang oraai puun-o, oraai-a bua' no. Oraai owarong puun-o, otondu'an-a ungkiat so bua' no.#Mat 7:20; Luk 6:44 34Kou lobuw oraai inowoon, dai koputotongaron nu owarong. Onu yo po kiro-kiroon muyu so inawo, ono ya su otangar muyu.#Mat 3:7; 23:33; 15:18; Luk 3:7; 6:45 35Lobuw owarong, gogoma'on niyo owarong-a so' owarong inawo niyo. Nga lobuw oraai, gogoma'on niyo oraai-a so' oraai inowoon niyo.

36Indadi ondomo muyu yo, ong ologa' Kinoringan mongukum, kiawi' lobuw koirasa ya nu ukuman suat so totongaron nosiro nu d'ado kosudaan-o. 37Totongaron mu no yo su pongilaan nu kikosola'an kou ko' d'ado ya,” koo.

Pinopomaal si Yisus nu lobuw Parisi ri

nu koiran-iran

(Mrk 8:11-12; Luk 11:29-32)

38Nopupus iri, mutongaro yo tinu-tinu moomontuduk nu Ukum om lobuw Parisi so si Yisus nu, “Oo Guru, mokisisiou kai so Ikau momaal nu koiran-iran,” koo.#Mat 16:1; Mrk 8:11; Luk 11:16

39Nga sumombuto yo si Yisus so nosiro nu, “Landu yo oraai lobuw kosiono tu. Mokisisiou kou so Aku momaal nu koiran-iran, nga dai ya su momaal, sondiang ko koiran-iran suat so si Yunus, poo'abar nu Kinoringan-i.#Mat 16:4; Mrk 8:12 40Kotoluan si Yunus so tian nu pait aayo ri. Soko ono ya pudi Aku, Anak nu Riniba, kotoluan so lobong ong wagu.#Yun 1:17 41Om so Runat Pongukuman, kolobuwan nu bandar Niniwi tumungag maid nu lobuw nu ono sono tu, mongukum nu kolobuwan iitu no, so' rinumorogo yo nosiro momaal nu koraayan om minongimaid nu niabar ni Yunus. Nga tuui kuwai oogot po ko' si Yunus!#Yun 3:5 42So Runat Pongukuman, kuwai raja woinoi gulu ri ungkiat so ido wonuo so solatan. Mundii iyo maid nu kiawi' lobuw ono sono tu, om iyo yo su pobontol nu kosola'an muyu nu dai mongimaid so Aku. Raja woinoi oono, kiat so isan nu tana' om langit tu. Minokirorongou iyo nu pontudukan olalom ni Raja Salumu gulu ri. Nga, poorati Aku so kou, tuui kuwai maayo po ko' si Salumu!” koo si Yisus.#1 Raj 10:1-10; 2 Kot 9:1-12

Minululi' koimbagu su moinat

(Luk 11:24-26)

43Mutongaro po si Yisus nu, “Kolaiw-o po moinat ono kiat so koyuwan nu lobuw, manou-panou sono iyo so tontong d'ado lobuw, modium nu intoronan. Pagka dai iyo kooyang, 44mutangar sono iyo so inawo nu, ‘Mululi' aku ya so inintoronan ku laid-i,’ koo. Minululi' yo sono moinat-i om osiou niyo d'ado asuw, oborisi om omomos inintoronan niyo gulu ri. 45Mompanou po moinat oono om mongingol nu turu komoinatan oraai po ko' iyo, om masuw sono so lobuw oono. Kogoyaan nu lobuw oono oraai po ko' togna ri. Soko ono ya ourug so lobuw oraai nu kosiono tu,” koo si Yisus.

Ino om kosusulodan ni Yisus

(Mrk 3:31-35; Luk 8:19-21)

46Laid po ni Yisus mutangar so lobuw suang-i, nokologa' yo ino om kosusulodan Niyo ri. Mundii-dii nosiro so dilabus-i mokimutangar-tangar so Iyo. 47Mutongaro yo ido koyuwan so Iyo nu, “Oo Tuan, nai so dilabus ino om kosulodan Mu no, kuwai padu tongaron so Ikau,” koo.#12:47: Tinu-tinu solinan silaid d'ado nokosurat nu ayat iitu.

48Sumombuto yo sono Iyo nu, “Isai ka su ino om kosusulodan Ku?” koo. 49Tuduko yo Niyo mompomaid Niyo ri om mutongaro yo nu, “Itu yo su ino om kosusulodan Ku. 50Isai mongowaid nu koinginan nu Amo Ku so surga, iyo yo su sulod Ku woinoi kusoi, om ino Ku,” koo si Yisus.

Currently Selected:

Matius 12: TomPWPgLgPn

Highlight

Copy

Compare