GAL 5

Kaɗ ɓaa ɓaa hikɓǝsǝ a hooto ɓa ma Almaseho

1Mbu kwaasǝ Almaseho yǝ nkweetǝndǝsǝ a hooto wa, me ndǝ kaɗ ɓaa ɓaa hikɓǝsǝ a hooto ɓa. Me maaso, sǝ nǝɗ kwakwa, sǝ kong lee ɓaa ti nkweera saa a hooto ɗǝm nga ɓan tisǝ ɓot mor mbusa naa ɓa ra. 2To, sǝnǝ kura. Niina Bulus nǝn nkee me, me sǝ yauwan ɓaa sǝ firin, Almaseho yǝ tom mbu hima a saani ra. 3Nǝn nkeesǝ ɓongtǝra ɗǝm me, nsaad eɗ yǝ leesǝ ɓaa fir ya me, tomsǝn ɗaɗ me yǝ tomma bǝɗɗo nsaad masaka Musa wa. 4Saase sǝn kweetǝsǝ me sǝ taa kaɗɗo ɓaa ɓǝn tomsǝ mbu yǝsǝ keke a wiiyo a Kaa ni ɓa wa, ma lau tomma bǝɗɗo masaka Musa wa, sǝ wee hik ɗuura saa wan a bǝɗ Almaseho wa. Sǝ lee kwasira Kaa ran. 5Pa ma lau Wiso wa ɗǝm ma lau na ɓongtǝra wa, ndǝn tomsǝ waro ke ma ti kanggo wa a ɗuura taa tom mbu yǝsǝ keke a wiiyo a Kaa ni ɓa. 6Pa me ndǝ tom fin ma Almaseho Yeso nin, hana ma firo, hana sem ma firo ra, ǝn mbukake a ndani ra. Pa mbu tǝ faɗsǝ senggo ɓa, ǝn siso naɓongtǝra wa, u yǝn weɗɗasǝ nkweera ira ma lau tom yauta wa. 7A ntiiri sǝn faɗ wiiyo yaɓ. Ən yamni yǝ saasǝsǝ bǝɗ mara ɓongtǝra wau? 8Ɓongtǝra nlaata ɓaa tomsǝsǝ ta, fiɗ a Kaa ni yaa yǝ yarsǝsǝ ya ra. 9Nga ɓan nkeesǝ wa me, “Yisti ngeek yǝn ti nkaadǝng yǝ mbiti kwang.” 10Niina nǝma ɗuura naa kǝɗ, me tom tinima u Ankundi ndǝ tomsǝ ke wa, ǝn weɗɗa me sǝ pǝta bǝɗ ɗǝɗa kǝra ɓol ma waano wa ra. Ɗǝm yaa yǝn niksǝ senta saa ya, kiyǝ taa nǝng kiita wa, hanaka ndǝ yamni. 11Ɓaata ɓǝna, yaa me ding waso nǝn nkee mara a ɗuura firo ra, tomtomni ding waso ɓeta ɓǝn nanǝsǝ kongsau? Yaa me mbusa yǝ ɓongtǝra maaso, mara ɓongtǝra nǝ nkeesǝ a ɗuura woɗɗo Almaseho a kwaakǝra wa ya, yǝ sem mbu kwiɗɗa a yaake ɗǝm ra! 12Ai, ɓaa ɓǝn niksǝsǝ senta sǝɓa, para ɓǝ kang nkweera ɓora nga ɓaa ɓaa haaɓǝsǝ ɗamta ɓa.

13Ɓaata ɓǝna, ɓaa yarsǝ me sǝ kaɗ ɓaa ɓaa hikɓǝsǝ a hooto ɓa. Pa sǝ nhii nwaa ma nkamǝra kaɗɗo waaso siso ra, yǝsǝ kwaa sǝ bǝɗ kaɗɗo ete ete wa ra. Para sǝ tom hoota u ɓaatǝ wa a kaɗɗo yauta wa. 14Ɓongtǝra, nsaad masaka Musa wa, ɓaa tǝmba a mara fin, u ǝn siso, “Aa yau andansaatǝre nyaange nga nkweerange wa.” 15Pa me sǝ kong ma ɓaatǝ, sǝn rimbi ɓaatǝ, sǝn kǝu ɓaatǝ nga emnama a sanglo ɓa, sǝ nhii nwaa, me tom saase sǝ tum ɓaatǝ rǝɓǝɗ ra!

Ɓolɓolto a ɗaaso Wis Kaa wa ma kaɗɗo ete ete wa

16Senta naa ǝn siso, sǝ tom kaɗɗo ma lau Wiso wa. Me sǝ tom maaso, sǝ pǝta bǝɗ kaɗɗo ete ete wa ra. 17Mbu kwaasǝ ɓa, kaɗɗo ete ete wa yǝ yauwa ma Wiso ra, Wiso ɗǝm yǝ yauwa ma kaɗɗo ete ete wa ra. Senta raɓ sǝta ɓǝn simba ɓaatǝ. Ən siso mbu kwaasǝ sǝ nkaa sǝ tom mbu sǝn yausǝ me sǝ tom ɓa ra wa. 18Pa men Wis Kaa wa yǝn bǝɗ ma saase sase, to, sǝ sem aa kunda masaka Musa wa ra.

19Tinimsa kaɗɗo ete ete wa, yaa talte. Ən ɓosaa nga pepeto, ma tulato, ma senta tom mbu ɗuura nwaara ɓa, 20ma nyoo kwandamse wa, ma tirtirto, ma mbisi ɓaatǝ wa, ma kito, ma simba ɓaatǝ wa, ma kuɗa ɓeɓe ra, ma yau ɗuura wa, ma ɓaa ma ɓaatǝ wa, ma wo ma ɓaa ɗuuti wa a ɗaaso ɓeta wa, 21ma rǝmara, ma wee mbusa wa, ma mbukamsa wee mbusa wa, ɗǝm ma pepere mbusa ya. Nǝn wiinsǝ ngwee nga nǝ weesǝsǝ tommo tang wa me, ɓaa ɓǝn tomsǝ nkamǝra mbu sǝsa ra, ɓǝ taa kangge a kuɓsutu Kaa wa ra.

22Pa em Wis Kaa yǝn nhaasǝ ɓa, ǝn siso yauta, ma hur kuɗa wa, ma kaɗ hurhurto wa, ma sǝmmo, ma tom mbu kwalarito ɓa, ma tom mbu yǝsǝ yaɓ ɓa wa, ma tom ɓongtǝra wa, 23ma loo ɗuura wa, ɗǝm ma maɗuura wa. Ai, masaka ko yǝ saa tom mbusǝsa wa ra. 24Nsaad ɓaa ɓǝsǝn u Almaseho Yeso wa, ɓǝ kwaakǝ kaɗɗo ete ete wan, ma mbu kwalakwala ɓolɓol u maabiri yǝn kurasǝ nɗeura ɓora wa. 25Tomsǝ me ndǝ Wiso yǝ nandǝsǝ huurtu wa, aa lee Wiso yǝ bǝɗ ma ndase a kaɗɗo waando nsaad. 26Ndǝ pǝta lee ndǝ kaɗ ɓan ma nik ɗuura ɓa ra, hana ɓan nik senta ɓaatǝ ɓa ra, hana ɓan tom rǝmara ɓaatǝ ɓa ra.

Currently Selected:

GAL 5: LLA

Highlight

Copy