GAL 6

Sǝ kwasi ɓaatǝ

1Ɓaata ɓǝna, me sǝ wǝr atike yǝn tom mbu tenatenato ɓa, saase ɓaa Wiso ɗekɗek yǝn bǝɗsǝ ma saase ɓa, sǝsaa kang a ɗǝɗa nlaa. Pa sǝ nhii nwaa ma ɗuura saa me tom saase kǝn, sǝ kan a pǝtara ra. 2Sǝ kwasi ɓaatǝ ma lau too kongsa ɓaatǝ wa. Ma lau tommo maaso wa, kǝsǝ kung masaka Almaseho ra. 3Me yaake yǝn sen me yǝn mbuka ke, ɗǝm yǝn mbuka ke ra, yǝn nlaa ee usu. 4Pa aa lee hana yamni yǝ mǝɗkǝ tinima ima yǝ wǝrǝ. Me tommon yaɓ, kiyǝ nkaa yǝ nheu ma nkweeresi, sem me yǝ mǝɗkǝ nkweera iran ma yaake ra, 5me pamman me hana yamni, yǝ too lǝklǝkto mbu ɓaa tisǝsǝ a ɗuura ira ɓa. 6Hana yamni yaa ɓaa fǝɗkǝsǝsǝ mara Almaseho ra ya, tomsǝ ɗaɗ yǝ ɓaa mbu yaɓ ɓisa nsaad ma yaa yǝ fǝɗkǝsǝsǝ ya. 7Sǝ kong lee yaake sǝ nlaa ra, ai, aa pǝta tommo aa wee nuu Kaa ra. Nsaad mbu ete yǝ rǝksǝ ɓa, ǝn siso kiyaa ɗaɗ wa. 8Pa me ete yǝ rǝk mbuka me aa tǝǝ nɗeura maabiri isi ra, kiyǝ ɗaɗ woɗɗa. Pa me yǝ rǝk me yǝ tǝǝ Wiso, kiyǝ ɗaɗ huurtu pakarese wa. 9Me maaso, ndǝ pǝta kong ma tom mbu yǝsǝ yaɓ ɓa wa ra, ɓongtǝra me ndǝ yam ra, ferko kǝ wo u kǝnda tom ɗaɗɗa u saltǝra wa. 10Yaa me maaso, hana a fer nawa me ndǝ taa ɗǝɗan, aa lee ndǝ tom mbu yaɓ ɓa ɓeta nsaad, samto a taanta ɓan na ɓongtǝra ɓa.

Mara u feɗefeɗe wa

11Sǝ sengge nkaamǝra nyorma kwangkwang nǝ nyorsǝ ma nema sǝma ra!

12To, ɓet ɓǝn taasǝ me ɓaa ɓǝ wǝr nga ɓǝn mbuka sǝɓa, ndǝ ɓosaa ɓǝn taasǝ me ɓǝsǝ ti ɗaɗ me sǝ fir ɓa wa. Ɓǝn tomsǝ maaso, me ɓǝn kura kokto kongsa ɓǝkaa wee men kwaakǝra Almaseho ra wa. 13Ai, hana ɓaa ɓaa firɓǝsǝ ɓa, ɓǝ ding bǝɗɗa Masaka Musa wa ra. Pa ɓosa ɓǝn taa me ɓaa sǝ firi, me ɓǝ tomma nheuwo, me ndǝ ɓosa ɓǝ tisǝ ɓaa sǝ fir ɓa. 14Pa a nani, niina nǝ pǝta nheuwo ra, me sem a ɗuura kwaakǝra Ankundi Yeso Almaseho wa ra, me ma lau woɗɗo usu a kwaakǝra wa, kaɗɗo put taandi wa woɗsǝ a nanii wa, ɗǝm nase kǝn nǝ woɗɗo a kaɗɗo put taandi wa. 15Hana ma firo, hana sem ma firo ra, nsaad siso, ǝn mbuka ra, Pa mbu tǝ faɗsǝ senggo ɓa, ǝn siso yǝ kang nfiinfiira tene ran. 16Hurhurto ma manyamanyato ɓǝ kaɗ ke ma ɓaa ɓǝn bǝɗsǝ ɗǝɗa sǝra ɓa, hana ɓaa Isra'ila ɓong Kaa ɓa. 17Ɓaata ɓǝna, nii nga waso aa ko aa wiiyo, yaake yǝ ɓaarǝ yǝnǝ rǝka ma mbuka ɗǝm ra, nǝ nkee maaso me, nǝ ma lamba a maabiri yaane u weɗɗasǝ me, niina nǝn u Yeso wa. 18Ɓaata ɓǝna, aa lee kwasira Ankundi yaande Yeso Almaseho ra, yǝ kaɗ ke ma wis waaso. Aa kaɗ maaso.

Currently Selected:

GAL 6: LLA

Highlight

Copy