JESAJA 11
11
Oshitutuma shaIsai
1Oshitutuma otashi tsapuka moshithindi shaIsai; noshitayi omomidhi dhasho e tashi imi iiyimati.
2Ombepo yOmuwa otayi mu lambele,
ombepo yowino noyoondunge,
ombepo yomayele noyoonkondo,
ombepo yuunongo noyokutila Omuwa —
3oye nota ka nyanyukilwa etilo okutila Omuwa.
Iha pangula pakutala kwomeho,
ye iha tokola pakuuva omauvila,
4ihe ohu uthile oonakuhepa nuuyuuki
nota popile uuthemba woohepele moshilongo
Nohapu ye yoonkondo ota dhenge evi
naakolokoshi ote ya dhipaga nomufudho gwomokana ke.
5Uuyuuki owo epaya lyomombunda ye,
uudhiginini noshili omuya gwomoombwetelo dhe.
6Embungu otali ka kala pamwe nokanzigona,
nongwe tayi kala ya lala pokakombwena.
Okatana nokankoshona otau napele pamwe,
nokamati okashona take u litha.
7Ongombe onzinzi nemwanka enyali otayi napele pamwe,
noyana taa gondjo pamwe.
Nonime otayi li omwiidhi ya fa ongombe.
8Okahanona haka yamu taka dhana pomututu gwontoka,
nokamputu opo ka toyo otaka tsu oshikaha shako kokwena kwepili.
9Kondundu yandje ondjapuki
itaku ka longwa uuwinayi nenge iikolokosha,
oshoka evi otali ka udha okutseya Omuwa
kwa fa omeya ga siikila efuta.
Aapongekwa taa ka galuka
10Esiku otali ya, uuna oshitutuma shaIsai tashi ka ninga epandela lyiigwana. Iigwana otayi ka gongalela kuye, nonkalelo ye oyi na eopalo. 11Mesiku ndyoka Omuwa ota ka ganeka okwooko kwe olutiyali, a galulile kegumbo yamwe yomaantu ye mboka ya hupile muAssur nomuEgipiti, muPatros, Etiopia, Elam, Babilonia naHamat, pominkulo nokoontuntu dhomomafuta. 12Omuwa ota ka yelutha epandela, u ulukile iigwana kutya ota gongele ishewe Aaisraeli nAajuda mboka ya halakana e te ya kongolola koombinga adhihe dhevi. 13Oshilongo shaIsrael itashi ka sila we Juda efupa, naJuda ita ka ninga omutondi gwaIsrael. 14Ayehe otaa matukile Aafilisti kuuninginino e taa ka yuga aantu yokuuzilo. Otaa ka sinda Aaedomi nAamoabi, nAayammoni otaa ka vulika kuyo. 15Omuwa ota ka kukutika Ekololo lyaSues nota pepitha ombepo ompyu kombanda yomulonga gwEufrat note gu topagula muulonga uheyali uushona tau vulu okutaagulukwa kolupadhi. 16Ogwo notagu ningi onenendjila yokweendwa kaantu ye Aaisraeli mboka ya hupu ko taa zi kuAssur, naanaa ngaashi oohekulu ya zile muEgipiti.
Currently Selected:
JESAJA 11: ONDB
Highlight
Copy
Compare
Share
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.
