Ruma 9
9
Kay Nagpili Diyus sa Nasyun Israil
1Magdungug di si Kiristu tutuu kang pagsabihun, unman aku magpudil. Maghiling diman ti Ispiritu Banal lumpiyu kang tagipusuun sa kang pagsabihun sa kanyu magkun, 2-3masyadu kang karukuan balaw mab-ul kang mag-asaydan sa kang tagipusuun, tungkul sa kang manga kanasyun, sa kang manga kasimanwa. Mayad waya abi sa kangku nu saadan yi lang aku miblag ginan sa kan Kiristu basta maribri mana sida. 4Sida manga Israilita, binwat Diyus manga anak niya. Nakitan nida ti malinaw pag tanda tigpakilala kuntay ti kadayawan Diyus ngap ti kaibahan nida.#9:4 Nakitan ... nida: Mahimu kay ibug sabihun, ti tulduk rurum maggiya sa manga Israilita sa pangawakawaan. Bantayi diman ti Pag. 14:19,20. Tinalaghut Diyus kay taratu sa kanda, sa kanda diman ipinakaun niya ti Kasuguan, ti tutuu gid pag samba ati sa Balay Diyus, hanggan kay manga taratu. 5Sida minamat nida ni Abraham ni Isaak ni Hakub. Bag-u siti diman waydi ginan pag linahi si Kiristu sa kay pagkatawu, imaw ti Diyus makamaskihan sa tanan, siya ti pagdayawun hanggan waya aban. Amin.
6Balaw sa nitugka lang ti Bagaw Diyus. Dahil balaw waydi ti tanan manga linahi Israil niminsan sa kay pinili Diyus pag nasyun. 7Balaw waydi ti tanan linahi ni Abraham pagkilalan-un kuntay suud niya minamat. Sinabi Diyus sa kanya magkun, “Kan Isaak lang waydi pag manga linahi ti pagkilalan-un kuntay minamat nimu.”#9:7 Bantayi diman ti Gim. 21:12. 8Inda kay ibug sabihun, balaw tanan manga anak ni Abraham pagkilalan-un Diyus kuntay manga anak niya. Tunda lang pag manga anak inanak angay sa kay taratu Diyus imaw ti pagkilalan-un kuntay linahi ni Abraham. 9Dahil katida kay taratu Diyus magkun, “Pagka aku aban bumalik maan sa kang taning pag kaudasan, pihu may anak yi si Sara.”#9:9 Bantayi diman ti Gim. 18:10,14.
10Dapat balaw lang waydi tunda. Dahil kan Ribika manga anak duwa ka bilug usa-usa kanda ama si Isaak kanta ginurang kaybi. 11-12Ipinakilala Diyus kay nagpili sa usa lang ka anak sa kan Hakub angay sa kay sadili gayak Diyus, balaw angay sa buwat tawu. Dahil nu udwaya inanak ti manga anak, ag udwaya nakabuwat una daut una mayad, daan yi sinabi Diyus sa kan Ribika magkun, “Sumirbi ti aka sa kay ari.”#9:11-12 Bantayi diman ti Gim. 25:23. 13Angay sa isinurat sa Banal Kasuratan magkun, “Pinili niku si Hakub, dinayu niku si Isaw.”#9:13 Bantayi diman ti Mal. 1:2,3.
14Nu katunda masabi aw nita kuntay unman matadlung ti Diyus? Bukun ngap unman matadlung ti Diyus. 15Dahil kainda kay sinabi niya sa kan Muysis magkun, “Naawa aku sa gustu niku pagkaawaan, naluuy aku sa gustu niku pagkaluuyan.”#9:15 Bantayi diman ti Pag. 33:19. 16Nakan ngani kay magpili Diyus angay gid sa kay pangaawa, balaw angay sa kagustuhan una kasipagan tawu. 17Dahil sa Banal Kasuratan kay sabi Diyus sa hari Ihiptu,#9:17 hari Ihiptu: sa Giriyigu, Paraun. “Binwat niku kawu hari hampay sa panab-anan nimu pag-ipakakit niku kang kamaskihan ag hampay milantag kang ngaran sa usa ka kalibutan.”#9:17 Bantayi diman ti Pag. 9:16. 18Nakan ngani pagkaawaan Diyus nu kay gustu niya kaawaan, ag pagpaganitun niya ti tagipusuun tawu nu kay gustu niya paganitun.
Kay Galit ag kay Pangaawa Diyus
19Magkumun kawu sa kangku, “Hayga pagsisihun waya Diyus ti tawu? Si unu ti umampara sa kay kagustuhan Diyus?” 20Dapat kawu duy tawu lang, si unu lugud kawu nakan nagsagut katida sa Diyus? Masabi aw lugud anglit sa nagpanday sa kanya magkun, “Hayga binwat nimu aku kainda?” 21Unman aw madunung ti manugpanday anglit magbuwat usa ka mahalaga pag anglit, bag-u kay usa basta-basta lang, ginan sa usa lang ka pinkul daga?
22Katunda diman kay binwat Diyus. Madi kaybi gustu gid niya ipakakit kay pangagalit hanggan kay kamaskihan, dapat lubus inagwanta lang niya ti manga tawu kay pagkagalitan, kay ihinanda hampay parusahan ag tudasun. 23Gustu diman niya ipakakit kay unman may pumarihu pag kamaskihan sa manga tawu kay pagkaawaan ag kay ihinanda ginan waya kaybi para tabug sa kadayawan. 24Kita yi paman tunda pag manga tawu kay pinili niya balaw lang ginan sa manga Hudiyu, ginan diman hanggan sa manga balaw Hudiyu. 25Kainda kay sinabi Diyus sa ribru ni purupita Husyas magkun,
“Tunda pag manga tawu balaw daan pinili niku pag nasyun, kang gid ngap ingarnan Kang yi Nasyun.
Ti balaw daan niku pagmahalun pag nasyun, kang gid ngap ingarnan Mahal Niku.#9:25 Bantayi diman ti Husyas 2:23.
26Nu naan sida pagsabihun magkun, ‘Kamu bukun Nasyun niku’, siyun ngap ingarnan sida manga anak Diyus buhi.”#9:26 Bantayi diman ti Husyas 1:10.
27Ainalsa kay busis ni purupita Isayas kay nagtultul tungkul sa taga Israil magkun, “Una ga baras dagat kay kayamu ti manga linahi ni Israil, pira-pira lang sa kanda ti maribri. 28Dahil mahigpit ag bigla pag tupadun Diyus ti sintinsiya sa kalibutan.”#9:28 Bantayi diman ti Isa. 10:22,23. 29Si Isayas diman ti may sabi magkun,
“Ti Panginuun makamaskihan sa tanan nagsawad di kay iba sa kanta lahi.
Nakan kita unman niparihu ga Suduma ag ga Gumura.”#9:29 Bantayi diman ti Isa. 1:9.
Ti Mayad pag Barita para diman sa Israil
30Kainda ti gustu niku sabihun, ti manga balaw Hudiyu una unman nanipag sa mayad pag buwat hampay sida mahimu pagkilalan-un Diyus kuntay manga matadlung, lalu ngap kinilala niya sida kuntay manga matadlung dahil sa kanda pagsarig sa Diyus. 31Dapat ti Israil lalu ngap nanipag hampay matupad nida ti Kasuguan ni Muysis hampay pagkilalan-un mana sida Diyus kuntay manga matadlung, dapat sa kay magbantay Diyus kurang di kanda magtupad. 32Hayga nguna katida? Nakan katida dahil nanipag sida sa kanda sadili buwat lang ag balaw angay sa kanda pagsarig sa Diyus. Ga nadayaan sida sa batu karadayaanun, 33imaw ti nisurat sa Banal Kasuratan magkun,
“Nagpauli aku sa banwa Siun usa ka batu karadayaanun,
laun pag batu kanda matalakpahan.
Dapat balaw mibuyu una si unu pag tawu nu sumarig sa kanya.”#9:33 Bantayi diman ti Isa. 8:14; 28:16.
Copyright © 2023 by OMF International, Philippines