Ruma 10
10
1Manga patar-ari, imaw diman kang pagpakaisip-isipun hanggan pag-idarangin sa Diyus hampay miribri kang manga kaparihu kanasyun. 2Mapatutuuhanan niku sida nanipag hampay pagbayaun mana sida Diyus, dapat nagsalan sida sa kanda pag-intindi. 3Dahil unman naintindihan nida kay paraan Diyus hampay kay pagkilalan-un niya ti manga tawu kuntay manga matadlung. Unman nida sinunud ti paraan Diyus. Bagkus ngap nanipag sida sa kanda sadili paraan hampay pagkilalan-un sida Diyus kuntay manga matadlung. 4Si Kiristu ti katugkaan Kasuguan ni Muysis. Nakan ngani una si unu ti sumarig sa kanya kilalan-un Diyus kuntay matadlung.
Ti Karibrihan para sa Tanan Tawu
5Kainda kay sinurat ni Muysis tungkul sa kay pagkilala Diyus sa tawu kuntay matadlung nu sida magtupad sa Kasuguan. Magkun siya, “Ti tawu nu magtupad sa Kasuguan, may buhi siya sa panab-anan waydi Kasuguan.”#10:5 Bantayi diman ti Lib. 18:5. 6Dapat tungkul sa kay pagkilala Diyus sa tawu kuntay siya matadlung dahil sa kay pagsarig, kainda ti pagsabihun sa Banal Kasuratan magkun, “Danga isipa nimu sa kanmu sadili magkun, ‘Si unu ti makaatag sa langit?’ ” Nu katida bilang ga ipadugsun maan si Kiristu. 7“ ‘Danga diman waydi nimu pagsabiha, si unu ti dumugsun tag sa kaabasad-basadan?’ ” Nu katida bilang ga bul-un si Kiristu ginan sa namatay. 8Dapat inda kay pagsabihun magkun, “Arani yi sa kanmu ti bagaw Diyus, sa kanmu yi bibig ag sa kanmu tagipusuun.”#10:8 Bantayi diman ti Diyut. 30:12-14. Imaw yi ngani pag manga bagaw kanmi pag-itudlu tungkul sa pagsarig. 9Nu itultul nimu magkun, “Si Hisus imaw ti Panginuun,” ag nu sumarig kawu buu tagipusuun siya binuhi uman Diyus ginan sa kamatayan, nu katunda miribri kawu. 10Dahil ginan sa kanta tagipusuun kita pag magsarig sa Panginuun bag-u kita pagkilalan-un Diyus kuntay kita matadlung. Ag nu pag-itultul nita kanta pagsarig, miribri kita. 11Pagsabihun sa Banal Kasuratan, “Balaw mibuyu una si unu pag tawu nu sumarig sa kanya.” #10:11 Bantayi diman ti Isa. 28:16. 12Balaw may nagtuhay ti kahamtangan una Hudiyu una balaw Hudiyu. Usa lang ti Panginuun tanan tawu. Siya tigpakaun kay manga kaayadan sa tanan manga magdangup sa kanya. 13Dahil pagkumnun sa Banal Kasuratan, “Maribri ti kada tawu nu magdangup sa kay ngaran Panginuun.”#10:13 Bantayi diman ti Huwil 2:32. 14Dapat kabitay pag dumangup ti manga tawu sa kay ngaran Panginuun nu unman kanda pagsarigan siya? Kabitay sida pag sumarig nu unman waya sida may nadnugan barita tungkul sa kanya? Kabitay sida pag makadnug nu unman may magtudlu? 15Kabitay pag makatudlu una si unu nu unman siya pagsuguun? Angay sa nisurat magkun,
“Anung, pag mangarinu pag lulud ti magdara Mayad pag Barita.”#10:15 Bantayi diman ti Isa. 52:7.
16Dapat unman tanan nagsunud sa Mayad pag Barita. Kainda kay sabi ni Isayas magkun,
“Panginuun, si unu ti naniwala sa kanmi sinabi?”#10:16 Bantayi diman ti Isa. 53:1.
17Ti tawu dayu waya sumarig nu unman nakadnug siya sa Mayad pag Barita. Makadnug lang ti tawu nu may manudlu tungkul sa kan Kiristu.
18Dapat kang paingana, unman aw nguna sida nakadnug? Nakadnug yi waydi sida. Dahil magkun sa Banal Kasuratan,
“Ras-ug yi sa tanan rugar kanda bagaw,
kanda bagaw nilantag yi sa kalibutan.”#10:18 Bantayi diman ti Kanta 19:4.
19Inda waya kang paingana, unman aw nguna nakaintindi ti nasyun Israil? Kaybi waya nasagut yi tunda ni Muysis magkun,
“Ti manga tawu balaw paman masabi kuntay usa ka nasyun imaw ngap ti gamitun niku aban
hampay sida pumahirak sa kanyu.
Gamitun niku ti usa ka nasyun tawu unman may kadunungan hampay paisugun nida kamu.”#10:19 Bantayi diman ti Diyut. 32:21.
20Itinapat yi gid ni Isayas kay pagsabihun magkun,
“Magkun ti Panginuun, nakilala aku manga tawu madi unman maghanap sida sa kangku.
Aku nagpakakit sa manga tawu madi unman magpaingana tungkul sa kangku.”#10:20 Bantayi diman ti Isa. 65:1.
21Dapat sinabi niya tungkul sa Israil magkun,
“Ginan surip hanggan malambung aku magpakapatigagad sa usa ka nasyun tawu maganit kay ulu ag maglaban sa kangku.”#10:21 Bantayi diman ti Isa. 65:2.
Copyright © 2023 by OMF International, Philippines