Ruma 8
8
Mag-ugali angay sa Ispiritu
1Nakan ngani dayi sintinsiyahan Diyus ti manga magpakiusa sa kan Kiristu Hisus. 2Udyi kita sakup sa kapangyarihan kasalanan hanggan kamatayan, dahil ti kapangyarihan Ispiritu ti nagparibri sa kanta, imaw diman ti magpakaun buhi. Inda pag kaayadan matanggap nita dahil lang sa kanta pakiusa sa kan Kiristu Hisus. 3Binwat Diyus ti unman nabuwat Kasuguan dahil sa kalumuyan nita pagkatawu. Sinugu niya kay sadili Anak ga histuda tawu makasalanan hampay ipakaun niya kay buhi sa kamatayan dahil sa kasalanan. Sa katida pag paraan nasintinsiyahan niya ti kasalanan nangulian sa tagipusuun manga tawu. 4Binwat niya ti tanan inda hampay ti pag-ibilin Kasuguan matupad sa kanta sa manga mag-ugali angay sa Ispiritu, balaw angay sa sadili lang kagustuhan nita pagkatawu. 5Dahil ti tawu nu mag-ugali angay sa hilig sadili kagustuhan niya pagkatawu imaw yi lang waydi kay pag-intindihun. Dapat ti tawu nu mag-ugali angay sa udyuk Ispiritu pagharian Ispiritu kay naisipan. 6Dahil ti tawu nu kay pag-intindihun kay sadili lang kagustuhan niya pagkatawu kay patabgan ay kadamhakan. Dapat tigmasigasid tungkul sa Ispiritu Banal imaw ti may buhi hanggan kahusayan. 7Ti tawu nu mag-intindi sa kay lang sadili kagustuhan niya pagkatawu, siya kalaban yi Diyus, dahil dayu siya magsunud sa kay manga bilin Diyus, dayu gid waydi mahimu. 8Ag dayu gid mahimu pagbayaun Diyus ti tawu nu mag-ugali angay lang sa sadili kagustuhan niya pagkatawu.
9Dapat kamu udyi mag-ugali angay sa sadili lang kagustuhan niyu pagkatawu. Bagkus ngap kamu mag-ugali angay sa Ispiritu, nu ungud nangulian yi sa kanyu ti Ispiritu Diyus. Dapat una si unu nu unman may Ispiritu ni Kiristu, unman sakup siya sa kan Kiristu. 10Nu si Kiristu nangulian yi sa kanyu, kanyu bilug ga namatay dahil sa kasalanan, dapat kanyu tagipusuun magkabuhi dahil kamu kinilala Diyus kuntay manga matadlung. 11Nu nangulian sa kanyu ti Ispiritu Diyus ti nagbuhi uman sa kan Hisus, ti Diyus ti nagbuhi uman sa kan Kiristu Hisus sa kamatayan, pumakaun waydi buhi sa kanyu manga bilug may kamatayan sa panab-anan niya Ispiritu nangulian sa kanyu.
12Nakan ngani duy manga patar-ari, danga yi mag-ugali kita angay sa kanta sadili kagustuhan pagkatawu. 13Dahil nu mag-ugali kamu angay lang sa sadili niyu kagustuhan pagkatawu pihu kamu mamatay. Dapat nu sa panab-anan kapangyarihan Ispiritu pagmatyun niyu ti buruwatun angay sa sadili kagustuhan niyu pagkatawu, magkabuhi kamu. 14Dahil ti tanan manga tuludluan Ispiritu Diyus, imaw ti manga anak Diyus. 15Ti Ispiritu kay ipinakaun Diyus sa kanyu balaw may turunu hampay kamu buwatun maan madalaun pag panawuhun. Dapat ay pagka natanggap yi niyu ti Ispiritu bag-u kamu pagbuwatun yi niya manga anak Diyus. Nakan magtawag kita sa kanya magkun, “Amang.” 16Ti Ispiritu ngani tigpatutuu minsan sa kanta tagipusuun kuntay kita manga anak Diyus. 17Nu ungud kita kay manga anak, kita yi gid ti makatanggap pamana kay ihinanda Diyus sa kay manga anak. Kita kaibahan ni Kiristu sa pagtanggap pamana. Dahil nu kita mag-agwanta kaibahan niya, kaibahan waydi niya kita sa kay kadayawan.
Tumanggap Kita Aban Kadayawan
18Sa sadili isip niku ti paglakawan nita kakurian kainda pihu unman tumimbang sa kadayawan miburayhaw aban sa kanta. 19Ti tanan linalang Diyus magpatigagad yi gid sa kaudasan nu mipaburayhaw yi Diyus aban kay manga anak niya. 20Dahil ti tanan linalang Diyus pinaunman yi may pulus, balaw buluntad nu unman sa kagustuhan Diyus. Madi katida may pag-asa waya, 21dahil ti tanan linalang Diyus iribri aban sa kay pagkasakup sa karunutan, bag-u may kabahagi sa mamaski pag karibrihan manga anak Diyus. 22Alam nita ti tanan-tanan linalang Diyus hanggan taynguna tugka mag-arunghung parihu ga babayi magpanamdam. 23Ag balaw lang sida. Una hanggan kita. Natanggap nita ti Ispiritu, ipinauna ipinakaun Diyus sa kanta. Ga mag-arunghung sa kanta tagipusuun kita sa pakaalagad sa kaudasan nu kay ipaburayhaw Diyus kanta kahamtangan bilang kay manga anak, kay ibug sabihun nu iribri yi aban kanta buu pagkatawu. 24Ribri yi kita, dapat pag-alagdun waya nita ti lubus pag karibrihan. Ti pag-asa balaw yi masabi pag-asa nu mag-akitan yi ti pag-asahan. Dahil si unu ti umasa waya nu nakitan yi. 25Dapat nu mag-asa kita sa udwaya nita mag-akitan, pihu kita manga matiniisun.
26Katunda diman kita manga malumuy pag-awatan di Ispiritu. Dahil nu kita magdarangin kurang kita sa kanta mag-intindi. Nakan ti Ispiritu magdarangin para sa kanta balaw kay pag-ibungat, may ga arunghung sa basad tagipusuun. 27Magkasalman di Diyus sa kay magsuyasid sa tagipusuun tawu nu hintay ti gustu sabihun Ispiritu, dahil ti Ispiritu magdarangin para sa manga nasakupan Diyus angay sa kay kagustuhan Diyus.
28Alam nita sa tanan manga bagay ti Diyus minsan magbuwat sa manga magmahal sa kanya sa kanda ikaayad. Dahil sida pinili niya angay sa kay turunu. 29Dahil ginan waya sa kabag-u daan di alam Diyus nu si unu pag manga tawu sa kanya. Tunda pag manga tawu hinanda niya hampay pumarihu sa kay Anak, hampay si Hisus, kay Anak Diyus, bilang ga panganay mayamu patar-ari. 30Kay manga pinili ginan waya sa kabag-u kay diman binutung. Ti manga binutung niya kay diman kinilala kuntay manga matadlung. Ag ti manga nakilala niya kuntay manga matadlung, naayawan diman waydi niya kadayawan.
Kay Pagmahal Diyus
31Taynguna, nu isipun nita inda pag manga bagay, masabi nita magbaliwa sa kanta ti Diyus, ag dahil sitay, unman may manalu laban sa kanta. 32Unman inirangan niya kay sadili Anak, bagkus ipinakaun ngap niya para sa kanta tanan. Nu kay ipinakaun kay sadili Anak sa kanta, unman aw lugud ipakaun niya sa kanta ti tanan manga bagay minsan sa kay Anak? 33Si unu lugud ti pumanghas magsumbung laban sa manga tawu pinili yi Diyus? Udyi! Diyus kabay ti magkilala sa kanda kuntay sida manga matadlung. 34Hintay waya gid ti sumintinsiya sa kanta atag sa kaparusahan? Udyi! Si Kiristu Hisus sa kay yi sikun baliwa Diyus. Siya waya ngani ti namatay bag-u binuhi uman Diyus. Taynguna siya yi ti nagbaliwa sa kanta. 35Si unu waya ti bumulag sa kanta ginan sa pagmahal ni Kiristu? Ti kakurian aw, ti pag-unuunu aw, ti lun-us aw, ngatay nu kurang yi ti panulung, kadilikaduhan aw, ngatay nu maayangan yi aw ti baladaw? 36Angay sa isinurat sa Banal Kasuratan magkun,
“Alang alang sa kanmu, madala yi lang kami matyun ginan sa surip hanggan sa malambung.
Inunu-unu kami ga manga karanidu maratyun.”#8:36 Bantayi diman ti Kanta 44:22.
37Inda tanan pag kakurian kaya di ay nita madaug dahil sa kanta Panginuun Hisus imaw tigmahal sa kanta. 38Napihu yi niku unman may bumulag sa kanta ginan sa pagmahal Diyus, una kamatayan, una buhi, una manga anghil, una manga labang, una manga paglakawan sa taynguna, una sa paratabgan waya, una manga kapangyarihan, 39una sa kaabwatan, una sa kaabasadan, una si unu waya kay linalang Diyus unman gid may bumulag sa kanta ginan sa kay pagmahal Diyus. Ipinakilala Diyus kay pagmahal sa kanta sa panab-anan ni Kiristu Hisus kanta Panginuun.
Copyright © 2023 by OMF International, Philippines