Ruma 11
11
Kinaawaan Diyus ti Nasyun Israil
1Inda kang paingana, dinayu aw nguna Diyus kay nasyun? Unman duy dinayu niya kay nasyun. Aku kabay Israilita diman waydi, ginan sa lahi ni Abraham, sinulput sa lahi ni Binhamin. 2Unman dinayu Diyus kay nasyun, kabay sa kabag-u di waya turunu niya kay yi pinili. Unman aw lugud niyu magkaalaman ti pagsabihun sa Banal Kasuratan tungkul sa kan Ilyas? Nangungud siya sa kay darangin sa Diyus laban sa manga taga Israil. 3Kay sabi niya, “Panginuun, minatay duy nida kanmu manga purupita, dinaut nida ti handugan. Aku wadi ti nasawad dapat kanda waya gid gustu mana matyun aku.”#11:3 Bantayi diman ti I Hari 19:10,14. 4Dapat hintay kay sagut Diyus sa kanya? Magkun ti Diyus, “May sinawadan waya aku pitu ka libu lalaki unman sinamba nida si Baal pag diyus-diyusan.”#11:4 Bantayi diman ti I Hari 19:18. 5Katunda diman una kainda may imaw diman nasawad manga pinili Diyus dahil sa kay pangaawa. 6Pinili ngani sida dahil sa kay pangaawa Diyus, balaw dahil sa kanda sadili buwat. Nu abi pinili sida dahil sa kanda sadili buwat, balaw yi masabi kuntay sa kay pangaawa Diyus.
7Kabitay nguna tunda? Unman nakarubtan ti buu nasyun Israil sa kay inasahan. Dahil ti iba, maganit kanda manga tagipusuun. Kay iba lang, ti manga pinili lang Diyus, ti nakakarubut tunda. 8Kainda ti sinabi sa Banal Kasuratan magkun,
“Pinakan-an Diyus inda pag manga tawu sa unman yi lang makaintindi.
Kanda manga mata unman yi lang kumakit.
Kanda manga tuli udyi lang dumungug hanggan taynguna tugka.”#11:8 Bantayi diman ti Diyut. 29:4; Isa. 29:10.
9Sinabi diman ni Dabid,
“Mana kanda manga kapistahan ga bitik, ga bintuka yi kanda karan-an,
karadayaanun nida tag sa kaparusahan.
10Pagmandulum yi kanda mata hampay udyi lang sida makakit,
paggapang yi lang sida sa kakurian hanggan tugka sa mamatay.”#11:10 Bantayi diman ti Kanta 69:22,23.
11Kay aw ibug sabihun tunda, pagka nadayaan ti manga Hudiyu rargu yi lang nguna napulid? Balaw waydi. Dapat ay dahil nagkasala ti manga Hudiyu, nakan nagras-ug ngap ti karibrihan sa manga balaw Hudiyu. Pagka katida naghirak ti manga Hudiyu sa manga balaw Hudiyu. 12Ginan sa pagsimray manga Hudiyu may natanggap papalad ti tanan nasyun sa babaw daga, ag ginan sa kanda nibuyu, nagras-ug ti kaayadan sa manga balaw Hudiyu. Nu masakup maan aban ti tanan manga ginayak Diyus pag manga Hudiyu, mas lalu daka man pag kaayadan ti matanggap manga balaw Hudiyu.
May Karibrihan ti manga Balaw Hudiyu
13Inda maan kang pagsabihun sa kanyu sa manga balaw Hudiyu, aku kabay apustul sa manga balaw Hudiyu. Nakan pag-intindihun gid niku kang buruwatun, 14hampay humirak kang manga kaparihu Hudiyu agud may maribri waya ti iba sa kanda. 15Pagka sida dinayu Diyus bag-u pinaunyun ngap Diyus ti manga nasyun taga kalibutan tabug sa kanya. Nu bay tanggapun maan Diyus ti manga Hudiyu, tunda ga magpakaun buhi sa namatay. 16Nu ginan sa pinkul arina ti un-an binwat tinapay ipinakaun sa Diyus, dara di hanggan kay binawasan ipinasakup#11:16 ipinasakup: sa Giriyigu, hagia. Kay ibug sabihun, banal. diman sa Diyus. Nu ipinasakup ti gamut puun kayu, dara hanggan kay manga sanga ipinasakup diman sa Diyus.
17Pinlud kay iba sanga ti tanum puun ulibu ag kawu, ga sanga lang lupaw pag ulibu, pag-isugdung sa puun tanum ulibu, hampay maayawan taguk ginan sa gamut. Nakan may kabahagi kamu manga papalad Diyus para sa manga Hudiyu. 18Dapat danga kamu magpuya sa kay pinlud pag manga sanga. Isipa nimu balaw kawu tig-alaga sa kay gamut, ti gamut di tig-alaga sa kanmu.
19Sabihun waydi nimu, “Pinlud ti manga sanga hampay aku misugdung.” 20Tutuu gid tunda. Pinlud sida dahil unman sida magsarig sa Diyus. Dapat kawu isinugdung dahil magsarig kawu sa Diyus. Nakan ngani, danga kawu magpalabi-labi, bagkus ngap pag-aman kawu. 21Dahil nu unman hininayngan Diyus ti urungan pag manga sanga, ti manga Hudiyu ngani, unman waydi kawu hinayngan niya. 22Sitay pag makilala nita kay kaayadan Diyus hanggan kay kaisugan. Magpangisug siya sa manga nagkasala sa kanya, dapat mayad siya sa kanmu nu udyi kawu pablag sa kay kaayadan. Nu bay kawu pablag, puldun diman kawu. 23Ti manga Hudiyu misugdung di maan uman nu sida bumalik sa Diyus ag sumarig sa kanya, dahil may kamaskihan ti Diyus hampay isugdung maan sida. 24Nakan ngani kamu duy pag manga balaw Hudiyu ga sanga lang ulibu lupaw nisugdung sa puun tanum ulibu madi balaw angay pag buwat paraan ga baliskad. Ti manga Hudiyu mas lalu misugdung maan Diyus ti sanga alaga pag puun ulibu sa kay di gid maan puun.
Magkaawa ti Diyus sa Tanan Tawu
25Manga patar-ari, gustu niku maalaman niyu ti usa ka katutuuhanan udwaya maburayhawan, hampay balaw mag-isip kamu palabi-labi sa kanyu sadili. Ti kaganitan nasyun Israil balaw padayun-dayun, balaw hanggan aban. Inda magkadugay lang hanggan sa udwaya makapakarani sa Diyus ti tanan manga ginayak niya pag manga balaw Hudiyu. 26Nu katunda, miribri di aban ti usa ka nasyun Israil, angay sa isinurat sa Banal Kasuratan magkun,
“Aban ginan sa Siun ti Manugribri,
duraun niya ti tanan kadautan linahi ni Hakub.
27Inda aban kang taratu sa kanda nu bin-ul yi niku kanda manga kasalanan.”#11:27 Bantayi diman ti Isa. 59:20-21; 27:9; Hir. 31:33-34.
28Dinayu manga Hudiyu ti Mayad pag Barita, nakan nagbaliw sida manga kalaban Diyus. Bag-u pinakan-an ngap kamu pag manga balaw Hudiyu rugar hampay makakit karibrihan. Dapat ti manga Hudiyu pinili di Diyus, kay di gid pagmahalun sida dahil sa kay taratu sa kanda manga ginurang. 29Dahil ti Diyus unman magkauman kay inisip tungkul sa kay manga ipinakaun pag kaayadan hanggan tungkul sa kay manga pinili pag manga tawu. 30Kaybi kamu pag manga balaw Hudiyu daan di manga malaban sa Diyus, dapat taynguna pagkaawaan ngap kamu niya sa katpung kaudasan manga malaban ti manga Hudiyu. 31Katunda diman waydi sida nagbaliw manga malaban taynguna katpung kamu pagkaawaan, hampay sida kaawaan di maan waydi Diyus. 32Dahil pinahintulutan Diyus ti tanan pag manga tawu ga panawuhun yi nida ugali maglaban sa kanya hampay mipakilala waydi niya kay pangaawa sa kanda tanan.
Pagdayaw sa Diyus
33Abunda gid ungud kay kayamanan ti Diyus. Udyi kaya isipun tawu kay kadunungan hanggan kay kaalaman niya. Udyi magkatabu magkasuyasid kay manga turunu hanggan kay pamaraan. 34Parihu sa isinurat sa Kasuratan magkun,
“Unman may tawu nakaintindi sa kay inisip Panginuun.
Unman may nagpaturun sa kanya.#11:34 Bantayi diman ti Isa. 40:13.
35Unman waydi may tawu nagpakaun una lang hintay sa Diyus hampay balusan maan siya Diyus.”#11:35 Bantayi diman ti Isa. 41:11.
36Dahil Diyus ti gimpuunan tanan pag manga linalang. Tunda tanan ginan sa kanya, ag tabug diman sa kanya. Sa kanya di ti kadayawan hanggan aban. Amin.
Copyright © 2023 by OMF International, Philippines