Kanta 90
90
Kanta 90
Ti Diyus ag ti Tawu
Kay darangin ni Muysis, ti manugsirbi Diyus.
1Panginuun, kawu kanmi ulian ginan waya sa kabag-u.
2Sa udwaya nimu linalang ti manga bantud hanggan ti kalibutan, kawu yi ti Diyus,
ag kawu diman ti Diyus sa unman may katapusan.
3Kawu ti magpasya sa kamatayan tawu;
pag-ibalik nimu siya sa daga sa kay gininanan.
4Ti usa ka libu timpu sa kanmi ga usa lang ka sirang ti linmawuy sa kanmu,
ngatay ga dag-ud lang pag udas sa yabi.
5Pagpaulian nimu katapusan kanmi buhi parihu sa tagin-up
6ngatay parihu sa ilamnun magluwang ag magtubu nu surip, dapat igu malambung magkalayung ag magkamatay.
7Kanmu pangagalit magpadala ag magruris sa kanmi.
8Mag-akitan nimu kanmi manga kasalanan.
Una ti manga kasalanan nabwat nimi sa lihim, alam di nimu.
9Ungud mamatay kami dahil sa kanmu pangagalit;
umapas kanmi buhi ga usa lang ka arup.
10Ti pinakadugay nimi buhi 70 ka timpu, ngatay 80 ka timpu nu mabisug kami.
Dapat una kanmi pinakamarinu pag manga timpu mayamu kaarimputuhan ag kakurian.
Ungud gid balaw magdugay kanmi buhi ag madura kami.
11Balaw may nakalakaw kanmu lubus pangagalit.
Ag habang magdugang kanmi naalaman sa kanmu pangagalit magdugang diman kanmi paggalang sa kanmu.
12Paintindihan sa kanmi dag-ud lang kanmi buhi,
hampay dumunung kami sa kanmi magkabuhi.
13 Panginuun, tugka kapira waya lugud kanmu pangagalit sa kanmi?
Patingihi ag kaawai kami kanmu manga manugsirbi.
14Kada surip ipakakit kanmu pagmahal sa kanmi hampay manganta kami sa kabayaan ag masulung kami sa buu nimi pagbuhi.
15Pakan-i kami kabayaan parihu kay kadugay sa manga timpu pinarusahan nimu kami ag pinakurian kami.
16Pakakitan nimu sa kanmi sa kanmu manga manugsirbi, hanggan sa kanmi manga linahi, kanmu makadululaw pag buwat ag kanmu pagkamakapangyarihan.
17Panginuun nimi Diyus, mana papaladan nimu kami ag pakan-an kapanaluhan sa tanan nimi manga pagbuwatun.
Currently Selected:
Kanta 90: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
