Kanta 89
89
Kanta 89
Ti Kasunduan Diyus sa kan Dabid
Ti “maskil” ngatay tula ni Itan kay linahi ni Isra.
1 Panginuun, kantahun niku pirmi kanmu daka pag pagmahal.
Itultul niku kanmu katapatan hanggan aban.
2Ipaalam gid niku kuntay marig-un kanmu pagmahal sa unman may katapusan, ag pumarargu parihu sa langit.
3Magkun kawu, “Nagbuwat aku kasunduan sa kang manugsirbi sa kan Dabid, kang pinili hari.
Ag inda kang itinaratu sa kanya:
4Kada hari sa Israil ginan sa kanmu manga linahi tugka aban;
kanmu kaharian pumarargu sa unman may katapusan.”
5 Panginuun, ti manga taga langit pag linalang dumayaw sa kanmu makadululaw pag manga buwat ag sa kanmu katapatan.
6 Panginuun, unman may una di usa sa langit ti parihu sa kanmu.
Unman may taga langit pag linalang ti pumarihu sa kanmu.
7Paggalangun kawu sa pagtiripun taga langit pag manga linalang.
Sida tanan masangputan sa kanmu may kadalaan gid sa kanmu.
8 Panginuun Diyus Makamaskihan, unman kawu may kaparihu;
makamaskihan kawu ag magtupad sa tanan nimu pagbuwatun.
9Kawu ti maghari sa humbak dagat;
pagpahubungun nimu kay daraka pag manga humbak.
10Rinunut nimu ti daragun pag-ingarnan Rahab ag namatay inda.
Sa panab-anan nimu kamaskihan pinanwayak nimu kanmu manga kalaban.
11Kanmu ti langit ag ti kalibutan;
linalang nimu ti kalibutan ag ti tanan asan.
12Linalang nimu ti kanaway hanggan ti salatan.
Ti Bantud Tabur hanggan ti Bantud Hirmun ga manga tawu magkanta sa kanmu sa kabayaan.
13Makamaskihan gid kawu! Masyadu kawu mabaskug, kanmu sikun pag kamang maabwatan ag makamaskihan!
14Maghari kawu may matarung ag katadlungan, paggiyahan kawu pagmahal ag katapatan.
15 Panginuun, mapalad ti manga tawu nakalakaw huruyawan sa kanmu kabayaan,
magkabuhi sa rayaw nimu kamaskihan.
16Dahil sa kanmu#89:16 Dahil sa kanmu: sa Hibriyu, Sa kanmu ngaran. pirmi sida magbaya,
ag pagdayawun nida kanmu pagkamatadlung.
17Kawu ti ipagpadayaw nimi dahil kawu kanmi kabisugan;
dahil sa kanmu kaayadan manalu kami.
18 Panginuun, Banal pag Diyus Israil,
kawu ti nagpili sa kanmi hari, ag siya ti magbaliwa sa kanmi.
19Kabag-u nanpakihampang kawu sa kanmu matinupadun pag manga manugsirbi sa panab-anan pangakakitun.
Magkun kawu, “Inawatan niku ti usa ka sundalu.
Pinili niku siya ginan sa kang nasakupan hampay buwatun hari.
20Si Dabid, kang manugsirbi, imaw kang pinili pag hari
sa panab-anan pagpayid sa kanya kang banal pag lana.
21Kang kamaskihan umiba ag pumabisug sa kanya.
22Unman tumalu sa kanya kay manga kalaban;
balaw manalu sa kanya ti manga daut.
23Habang magbantay siya runutun niku kay manga kalaban tugka sa magkaramatay sida.
24Pagmahalun niku siya ag ibahan.
Ag sa panab-anan niku kamaskihan manalu siya.
25Pahariun niku siya ginan sa Dagat Miditiranyu tugka sa Sapa Iyupratis.#89:25 ginan sa ... Iyupratis: ngatay, sa manga daga hanggan sa baliw dipay dagat ag sapa.
26Sumabi siya sa kangku, ‘Kawu kang Ama ag Diyus;
kawu ti palalan-iban pag batu magribri sa kangku.’
27Kilalan-un niku siya kang panganay pag anak, ti pinakamakapangyarihan sa tanan pag hari.
28Iparargu niku kang pagmahal sa kanya tugka aban,
ag kang kasunduan sa kanya balaw gid pumalya.
29Ti kada hari sa Israil ginan sa kay manga linahi hanggan aban;
kay kaharian dumugay parihu sa langit, unman may katapusan.
30-31Dapat nu kay manga linahi balaw magsunud sa kang sugu, hanggan manga surundanun, ag manga patigayun,
32bakulun niku sida dahil sa kanda manga kasalanan.
33Dapat mahalun di niku ag ibahan si Dabid.
34Balaw niku duraun kang kasunduan sa kanya,
ag balaw niku umanun kang itinaratu sa kanya.
35Sa kang banal pag ngaran, nagtaratu yi aku balaw gid aku mamudil sa kan Dabid.
36Ti kada hari sa Israil ginan sa kay manga linahi hanggan aban.
Kay kaharian dumugay sa kang pamantay parihu sa init;
37pumarargu inda hanggan aban parihu sa bulan pag-isipun masarigan pag kastigus sa langit.”
38Dapat, Panginuun, nagalit kawu sa kanmu pinili pag hari;
pinabay-anan nimu siya ag binugyahan.
39Dinura nimu kanmu kasunduan sa kanya kanmu manugsirbi,
ag bin-ul nimu kay karampatan bilang hari.
40Tinumpag nimu ti manga alad batu niya banwa.
Dinaut nimu kay mapag-un pag paratag-an.
41Ti manga kasiyunan sa kay banwa pagbul-un tanan maglawuy.
Pinakay-a siya niya kataid pag manga nasyun.
42Ipinanalu nimu kay manga kalaban;
pinasulung nimu sida tanan.
43Binwat nimu unman may pulus kay manga armas
ag ipinatalu nimu siya sa girahan.
44Bin-ul nimu kay kapangyarihan#89:44 kapangyarihan: Balaw malinaw kay ibug sabihun sa Hibriyu inda. hanggan kay karampatan bilang hari.
45Pinagurangun nimu siya kadaka;#89:45 Pinagurangun nimu siya kadaka: ngatay, Pinadag-ud nimu kay buhi.
ag pagpakay-ahun nimu siya.
46 Panginuun, kapira waya lugud tugka kawu pag magpatagu?
Tugka aw sa unman may katapusan?
Tugka kapira waya lugud kanmu pangagalit ga apuy?
47Alalahana duy nu kabitay ka dag-ud ti buhi tawu;
alalahana binwat nimu ti tawu may kamatayan.
48Si unu lugud pag tawu ti balaw mamatay?
Makaaman aw lugud ti tawu sa kamatayan?
49Panginuun, naan yi lugud kanmu pagmahal parihu sa kabag-u, ti itinaratu nimu sa kan Dabid angay sa kanmu pagkamatinupadun sa kanya?
50Panginuun, alalahana ti magpakay-a mayamu nasyun sa kanmu manga manugsirbi,#89:50 manga manugsirbi: Mahimu kay ibug sabihun, ti nasakupan Israil. Sa iba manga kupya sa Hibriyu makitan ti “manugsirbi”, mahimu kay ibug sabihun, hari Israil. pag agwantahun lang niku.
51 Panginuun, sida kanmu pag manga kalaban, imaw ti magpuya sa kanmu pinili pag hari una naan siya tabug.
52Dayawun ti Panginuun sa unman may katapusan! Amin! Amin!
Currently Selected:
Kanta 89: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
