Bilang 33
33
Ti Linakawan manga Israilita ginan sa Ihiptu Tabug sa Muab
1Inda ti manga rugar linakawan manga Israilita katpung nighit kanda manga ginurang ginan sa Ihiptu, sa pagpangulu ni Muysis ag ni Aarun. 2Angay sa sugu Panginuun, ilinista ni Muysis kanda nalakawan pag manga rugar ginan sa kanda gininanan. 3Ginminan sida sa Ramisis sa ika-15 pag sirang sa un-an pag bulan pagkalawuy Pista Pag-alaala sa Karibrihan. Nagginan sida may matutum pag naisipan madi maghiling ti manga Ihipsiyu 4maglubung sa tanan nida panganay lalaki minatay Panginuun, dahil kay pinarusahan sida sa kanda magsamba sa diyus-diyusan.
5Ginan sa Ramisis nagkampu sida sa Sukut.
6Ginan sa Sukut nagkampu sida sa Itam, sa saruy pangawakawaan.
7Ginan sa Itam, nagbalik sida atag sa Pi Hahirut ati sa butlakan Baal Sipun, ag nagkampu sida arani sa Migdul.
8Ginan sa Pi Hahirut nagdipay sida sa dagat ag nag-atag sa pangawakawaan. Naglakaw sida sa sulud tulu ka sirang sa pangawakawaan Itam, ag nagkampu sida sa Mara. 9Ginan sa Mara, nagkampu sida sa Ilim, sa may 12 ka bulbugan ag 70 ka puun palma.
10Ginan sa Ilim, nagkampu sida sa saruy Dagat Marara. 11Ginan sa Dagat Marara, nagkampu sida sa pangawakawaan Sin.
12Ginan sa pangawakawaan Sin, nagkampu sida sa Dupka.
13Ginan sa Dupka, nagkampu sida sa Alus.
14Ginan sa Alus, nagkampu sida sa Ripidim, sa unman may mainum danum ti manga tawu.
15Ginan sa Ripidim, nagkampu sida sa pangawakawaan Sinai.
16-36Inda waya gid ti manga rugar kanda kinampuhan katpung maglakaw sida ginan sa pangawakawaan Sinai atag sa Kadis sa pangawakawaan Sin: Kibrut Hataaba, Hasirut, Ritma, Rimun Paris, Libna, Risa, Kihilata, Bantud Sipir, Harada, Tahat, Makilut, Tira, Mitka, Hasmuna, Musirut, Bini Haakan, Hur Hagidgad, Hutbata, Abruna, Isyun Gibir, ag tugka sa nakaaput sida sa Kadis sa pangawakawaan Sin.
37Ginan sa Kadis, nagkampu sida sa Bantud Hur, sa katugkaan daga Idum. 38-39Sa sugu Panginuun nagtukad si Aarun sa Bantud Hur, ag ati siya pag namatay sa idad 123 ka timpu. Nangyari tunda sa un-an pag sirang sa ikalima pag bulan sa ika-40 pag timpu ginan sa pag-ighit manga Israilita sa Ihiptu.
40Sa tunda pag timpu, ti Kananiyu hari Arad, mag-uli sa Nigib, nakabarita sa pagras-ug nasakupan Israil.#33:40 Bantayi sa 21:1-3.
41-48Ginan sa Bantud Hur, nagparargu ti manga Israilita sa kanda maglakaw. Inda pag manga rugar kanda kinampuhan: Salmuna, Punun, Ubut, Iyi Abarim, ati sa katugkaan daga Muab, Dibun Gad, Almun Diblataim, sa manga bantud Abarim arani sa Nibu, ag tugka sa nakaaput sida sa karatagan Muab sa saruy Hurdan arani sa Hiriku. 49Nagkampu sida ati sa saruy Hurdan ginan sa Bit Hisimut tugka sa Abil Sitim, sakup diman karatagan Muab. 50Katpung sa kanda magkampu ati sa karatagan Muab, sa saruy Hurdan arani sa Hiriku, naghampang ti Panginuun sa kan Muysis, 51“Sabihi ti manga Israilita nu mandipay sida sa Sapa Hurdan atabug sa Kanaan, 52paighita nida ti tanan manga mag-uli ati bag-u dauta ti tanan-tanan nida manga diyus-diyusan binwat ginan sa manga batu, mital, hanggan ti tanan-tanan nida manga simbahan sa abwat pag manga rugar. 53Sakupa niyu tunda pag daga bag-u ati yi kamu pag-uli, dahil pag-ipakaun yi niku tunda sa kanyu. 54Huray-huraya niyu ti daga angay sa lunggungan, angay sa kayamu kada lahi. Ti mayamu kay lahi ayawi waydi kadaka, ag ti lahi pira-pira ayawi waydi kadiit. Nakan una hintay kanda mabunut imaw yi gid inda kanda kahuray. Sa kainda pag paraan, mahuray nida ti daga sa kada lahi.
55“Dapat nu balaw niyu paighitun ti manga mag-uli ati, ti manga nasawad sa kanda bumaliw pakuri ga paruk sa kanyu manga mata ag ga dugi sa kanyu manga tululnan. Pumakaun ngap sida manga kakurian sa kanyu magpangulian ati. 56Ag buwatun niku sa kanyu ti para mana sa kanda pag parusa.”
Currently Selected:
Bilang 33: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
