Bilang 32
32
Kay manga Linahi sa Butlakan Sapa Hurdan
(Diyut. 3:12-22)
1Ti manga lahi ni Rubin hanggan ni Gad mayamu gid kanda manga hayup. Nakan pagka nakitan nida mayad pag daga ti Hasir hanggan ti Gilyad para sa manga hayup, 2nag-ati sida sa kan Muysis, hanggan sa kan Iliyasar, ag sa manga takinan linahi Israil, bag-u magkun, 3“Ti Atarut, Dibun, Hasir, Nimra, Hisbun, Ilali, Sibam, Nibu, hanggan Biyun — 4ti manga rugar nasakup Panginuun sa panab-anan manga Israilita — mayad pag rugar para sa manga hayup, ag kami kanyu suruguun mayamu hayup. 5Nakan nu magbaya kamu sa kanmi, ipakaun niyu inda pag manga daga sa kanmi bilang kahuray nimi. Danga yi kami pagtabana atag sa dipay Sapa Hurdan.”
6Magkun si Muysis sa manga lahi ni Gad ag ni Rubin, “Hintay kanyu ibug sabihun, patayak lang aw kamu sitay una kanyu kaparihu manga Israilita atabug sa girahan? 7Pagpalumuyun lang niyu ti manga Israilita atabug sa ipinakaun Panginuun pag daga sa kanda. 8Katida diman ti binwat niyu manga ginurang kaybi pagka ipinadara niku sida tag sa Kadis Barnia hampay usisaun tunda pag daga. 9Pagka rinmas-ug sida sa Luung Iskul, nakitan nida ti daga, pinalumuy nida ti manga Israilita sa pag-ati sa ipinakaun Panginuun pag daga sa kanda. 10Subra gid ti pangagalit Panginuun ati katpung pag sirang ag nanumpa siya: 11‘Dahil unman sida nagsunud sa kang kagustuhan, unman gid una di usa sa kanda ti ginan sa Ihiptu may idad 20 ginan ka timpu paabwat ti makakit sa itinaratu niku pag daga sa kan Abraham, sa kan Isaak, hanggan sa kan Hakub 12purya lang sa kan Kalib anak ni Hipuni usa ka Kiniyu ag sa kan Huswi anak ni Nun, dahil nagsunud sida sa kang kagustuhan.’ 13Masyadu gid ti pangagalit Panginuun sa manga Israilita, nakan pinabuyung-buyung niya sida sa pangawakawaan sa sulud upatpulu ka timpu, tugka sa nagkaramatay ti tanan sinulput nagbuwat daut sa kay pamantay.
14“Taynguna, kamu pag manga lahi makasalanan ti inmilis sa kanyu manga ginurang, dinugangan waya gid niyu ti pangagalit Panginuun sa manga Israilita. 15Nu balaw kamu sumunud sa Panginuun, pabay-anan maan niya kamu pag manga nasakupan sitay sa pangawakawaan, ag kamu ti mabangdanan sa pagkaruris manga Israilita.”
16Dapat nagpakarani waya sida sa kan Muysis ag magkun, “Mamwat lang duy kami sitay manga tudir para sa kanmi manga hayup, hanggan manga banwa para sa kanmi manga asawa ag manga anak. 17Dapat alistu duy kami manguna sa kanmi kaparihu Israilita sa paggira tugka sa maitibu nimi sida sa kanda manga rugar. Habang maglaban kami, sitay lang kanmi manga asawa hanggan manga anak pag muli sa may alad batu pag manga banwa kanmi ibungsud, agud ribri sida sa manga mag-ulian sa inda pag daga. 18Balaw kami muli tugka sa ud maapu tanan Israilita ti maranahun nida pag daga. 19Dapat balaw kami mangapu daga maranahun kaibahan nida sa dipay Hurdan. Dahil ti daga sitay sa butlakan baliwa Hurdan imaw ti kanmi manahun.”
20Magkun si Muysis sa kanda, “Nu katida gid waydi kanyu buwatun sa atubangan Panginuun alistu kamu lumaban, 21ag dumipay kanyu manga sundalu sa Hurdan tugka sa matabug Panginuun kay manga kalaban, 22ag maapu yi ti daga, mahimu yi kamu makauli sitay tag dahil nabuwat yi niyu kanyu saragtun sa Panginuun ag sa kaparihu niyu Israilita. Ag inda pag daga maapu yi niyu sa atubangan Panginuun.
23“Dapat nu balaw katida kanyu buwatun, magkasala kamu sa Panginuun, ag pihu gid bayadan niyu kanyu kasalanan. 24Hu, pagbungsud kamu manga banwa para sa kanyu asawa ag manga anak, bag-u pagbuwat manga tudir para sa kanyu manga hayup, dapat kailangan niyu tupadun kanyu itinaratu.”
25Nagsagut ti manga lahi ni Gad ag ni Rubin sa kan Muysis, “Tupadun nimi kanmu manga sugu. 26Matayak di sitay sa manga banwa Gilyad kanmi manga asawa, manga anak, hanggan manga hayup. 27Dapat kami ti may kakayahan yi lumaban dumipay tag sa Hurdan hampay manlaban angay sa sugu nimu sa kanmi.”
28Nakan nagsugu si Muysis sa kan manughandug Iliyasar, sa kan Huswi anak ni Nun, ag sa manga takinan manga linahi Israil. 29Magkun siya, “Nu handa gid waydi sa atubangan Panginuun ti manga lahi ni Gad ag ni Rubin mandipay sa Hurdan hampay manlaban, ag nu maagaw yi niyu tunda pag daga, ipakaun niyu sa kanda ti daga Gilyad agud kanda maranahun. 30Dapat nu dayu sida mandipay hampay manlaban kaibahan niyu, kanda manahun pag daga ati diman minsan sa kanyu sa daga Kanaan.”
31Magkun ti manga lahi ni Gad ag ni Rubin, “Tupadun nimi nu hintay ti sinabi Panginuun. 32Handa kami sa atubangan Panginuun mandipay sa Hurdan atag sa Kanaan hampay manlaban, dapat kanmi maranahun pag daga inda di baliwa sa butlakan sa arani Hurdan.”
33Nakan ipinakaun ni Muysis sa manga lahi ni Gad, ni Rubin, ag sa katunga lahi ni Manasis anak Husi, ti kaharian ni Sihun, hari manga Amuriyu, hanggan ti kaharian ni Ug, hari sa Basan — ti kabuuhan daga hanggan ti manga banwa ag manga rugar sa kay sangput siyun.
34Ibinungsud maan lahi ni Gad ti Dibun, Atarut, Aruwir, 35Atrut, Supan, Hasir, Hugbiha, 36Bit Nimra ag Bit Haran. Inda pag manga banwa sinangput nida alad batu. Nagbuwat diman sida manga tudir sa kanda manga hayup. 37Ag ipinatindug maan manga lahi ni Rubin ti Hisbun, ti Ilali ag ti Kiryataim 38hanggan ti manga rugar pag-ingarnan kaybi Nibu, Baal Miyun, ag Sibma. Inilisan nida kay manga ngaran ti banwa kanda ipinatindug.
39Ginira manga lahi ni Makir anak ni Manasis ti Gilyad, ag naagaw nida inda, bag-u tinabug nida ti manga Amuriyu mag-ulian ati. 40Nakan ipinakaun ni Muysis ti Gilyad sa manga lahi ni Makir, manga lahi diman ni Manasis, ag ati sida pag nangulian. 41Si Hair lahi diman ni Manasis, nakaagaw diman siya manga baryu sa Gilyad ag iningarnan niya inda “Manga Banwa ni Hair.” 42Naagaw ni Nuba ti Kinat hanggan ti manga baryu sa kay sangput siyun ag iningarnan niya inda “Nuba” angay sa kay ngaran.
Currently Selected:
Bilang 32: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
