Bilang 34
34
Ti manga Katugkaan sa Kanaan
1Magkun ti Panginuun sa kan Muysis, 2“Sabihi ti manga Israilita nu makaslud yi sida sa Kanaan, inda ti katugkaan nida daga maranahun:
3“Ti katugkaan sa kanaway ti pangawakawaan Sin, sa may katugkaan Idum. Mag-umpisa inda sa abagatnan pag bahagi Dagat Namatay.#34:3 Dagat Namatay: sa Hibriyu, maasin gid pag dagat. Imaw diman sa talata 12. 4Bag-u paliku atabug sa kanaway Patukad sa Akrabim, tugka sa pangawakawaan Sin, ag parargu sa abagatnan Kadis Barnia. Siyun ginan parargu inda sa Hasar Adar tugka sa Asmun, 5ag paliku atabug sa Luung Ihiptu tugka sa Dagat Miditiranyu.
6“Ti katugkaan sa isalpan ti Dagat Miditiranyu.
7“Ti katugkaan sa salatan ginan sa Dagat Miditiranyu atabug sa Bantud Hur, 8ag ginan sa Bantud Hur atabug sa Libu Hamat. Rargu inda sa Sidad 9tugka sa Siprun kay katugkaan sa Hasar Inan.
10“Ti katugkaan sa butlakan ginan sa Hasar Inan atabug sa Sipam. 11Bag-u palus-ug inda atabug sa Ribla, sa butlakan baliwa Ain, ag parargu inda sa manga tagudtud sa butlakan Danaw Galiliya.#34:11 Danaw Galiliya: sa Hibriyu, Danaw Kinirit. 12Siyun ginan palus-ug inda sa Hurdan ag mitugka sa Dagat Namatay.
“Inda kanyu daga, hanggan ti manga katugkaan sa kalibut.”
13Pagkatapus, magkun si Muysis sa manga Israilita, “Huray-huraya niyu inda kanyu maranahun pag daga sa panab-anan lunggungan. Magkun ti Panginuun ipakaun inda sa siyam may tunga ka lahi, 14-15dahil ti lahi nida ni Rubin, ni Gad, ag ti katunga lahi ni Manasis nakatanggap yi kanda maranahun sa butlakan baliwa Hurdan arani sa Hiriku.”
16Sinabi Panginuun sa kan Muysis, 17“Si manughandug Iliyasar hanggan si Huswi anak ni Nun imaw ti humuray daga para sa manga tawu. 18Bag-u pagpili kawu usa ka takinan sa kada lahi hampay makaawat nida sa paghuray daga.” 19-28Inda ti manga napili pag ngaran:
| Lahi | Takinan |
|---|---|
| Huda | Kalib kay anak ni Hipuni |
| Simyun | Simwil kay anak ni Amihud |
| Binhamin | Ilidad kay anak ni Kislun |
| Dan | Buki kay anak ni Hugli |
| Manasis anak ni Husi | Hanyil kay anak ni Ipud |
| Ipraim anak ni Husi | Kimwil kay anak ni Sipan |
| Sabulun | Ilisapan kay anak ni Parnak |
| Isakar | Paltiyil kay anak ni Asan |
| Asir | Ahihud kay anak ni Silumi |
| Niptali | Pidahil kay anak ni Amihud |
29Sida ti manga pinili Panginuun hampay mangawat manhuray daga Kanaan imaw ti maranahun manga Israilita.
Currently Selected:
Bilang 34: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
