Bilang 24
24
1Pagka naisipan ni Balaam kay gustu Panginuun papaladan ti Israil, balaw yi siya magpanhula ga kay pagbuwatun kaybi. Bagkus ngap, napasrangu siya tag sa pangawakawaan, 2nakitan niya ti manga Israilita magkampu angay sa kada lahi nida. Bag-u sinuldan siya Ispiritu Diyus, 3ag magkun siya, “Aku si Balaam anak ni Biyur, may mayad aku pag pan-intindi.#24:3 pan-intindi: sa Hibriyu, pamantay. 4Nasaydan niku ti bagaw Diyus, ag nakakit aku usa ka pangakakitun ginan sa kanya, ti Makamaskihan pag Diyus. Napakumbaba aku sa kanya, ag pinaintindi niya aku.#24:4 pinaintindi niya aku: sa Hibriyu, binukasan kang manga mata. Kaindaay kang padakit:
5Kay ka rinu ti manga turda pag-ulian nasakupan Israil linahi ni Hakub.
6Parihu inda sa manga magharatayan palma,#24:6 magharatayan manga palma: ngatay, mayamu manga bululusan danum. ngatay manga halaman sa saruy sapa.
Parihu diman inda sa kayu aluwi itinanum Panginuun, ngatay manga kayu sidru sa saruy danum.
7Maglapwas ti danum sa kanda manga sukadan, ag magtanum sida butir sa daga abunda sa danum.
Kanda hari bumaliw mas makapangyarihan waya sa kan Agag hari Amalikita, ag kanda kaharian bumaliw bantug.
8Ipinalwas Diyus sida ginan sa Ihiptu; parihu siya sa usa ka mabisug pag tudu baka.
Panaun ag rurisun nida kanda manga kalaban; ga pagtuhugun pamana nida, ag ga pagrunutun nida kanda manga but-ul.
9Parihu sida sa liyun nu magkaturug unman may magpanghas mamulaw sa kanda.
Pagmayadun ti manga magmayad sa kanda ag saadan ti manga magsaad sa kanda.”
10Dahil siyun, masyadu gid kay pangagalit ni Balak sa kan Balaam. Sinmuntuk siya sa kay dalukap ag magkun, “Ipinatawag niku kawu hampay saadan kang manga kalaban, dapat pinapaladan waya ngap nimu sida katlu ginan. 11Pag-uli yi lang kawu! Nanaratu aku upahan niku kawu mahal, dapat balaw nagpasnu ti Panginuun matanggap nimu inda.” 12Sinmagut si Balaam sa kan Balak, “Kabay sinabi yi niku sa kanmu manga manugpadakit, 13una waya ipakaun nimu sa kangku kanmu balay punu pilak hanggan gintu, balaw aku makabuwat kang sadili kagustuhan, daut man ngatay mayad. Nu unman ti angay lang sa sabihun Panginuun sa kangku, imaw lang kang sabihun. 14Hu, mag-uli yi aku sa kang manga kasimanwa. Dapat pasandaman waya niku kawu nu hintay ti buwatun manga Israilita sa kanmu manga nasakupan sa uryan sirang.”
Kay Ikap-at pag Padakit ni Balaam
15Bag-u binagaw ni Balaam inda pag padakit: “Aku si Balaam kay anak ni Biyur, may mayad aku pag pan-intindi. 16Nasaydan niku ti bagaw Kaabwat-abwatan pag Diyus ag pinakan-an niya aku pan-intindi. Nakakit aku usa ka pangakakitun ginan sa kanya, ti Makamaskihan pag Diyus. Napakumbaba aku sa kanya, ag pinaintindi niya aku. Kaindaay kang padakit::
17“May nakitan aku sa kang pangakakitun udwaya gid nangyari. Sa aratubangun pag manga sirang, may humari#24:17 may humari: sa Hibriyu, may lumutaw pamgasan, may lumuwang sugkud hari. sa Israil ginan sa linahi ni Hakub. Rurisun niya ti manga Muabita hanggan ti tanan lahi ni Sit. 18Sakupun niya ti Idum kay kalaban, pag-ingarnan diman Siir, dapat ti Israil lalu di magrig-un. 19Mandumara ti usa ka takinan sa Israil#24:19 Israil: sa Hibriyu, Hakub. ag rurisun niya ti manga nasawad buhi sa banwa Muab.”
Ti Katapusan pag Padakit ni Balaam
20Bag-u nakitan ni Balaam sa kay pangakakitun ti nasakupan Amalik ag magkun siya: “Ti Amalik kaybi imaw tig panguna sa manga nasyun, dapat aban sa uryan maruris sida.”
21Bag-u nakitan waydi ni Balaam sa kay pangakakitun ti manga Kiniyu ag magkun siya: “Marig-un kanyu pag-ulian, dahil niuli sa babaw batu pag bungtud. 22Dapat midamhak kamu nu bihagun manga Asirya.”
23Ag sinabi waya ni Balaam sa inda pag padakit: “Malu, si unu ti mabuhi nu buwatun Diyus inda? 24Rumas-ug ti manga barku ginan sa Kitim ag sakupun nida ti nasakupan Asirya hanggan Ibir, dapat ti Kitim maruris diman.”
25Bag-u nuli si Balaam katunda diman hanggan si Balak.
Currently Selected:
Bilang 24: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
