Bilang 23
23
Kay Un-an Padakit ni Balaam
1Magkumun si Balaam sa kan Balak, “Pabwati aku sitay pitu ka harandugan, ag alistuhi aku pitu ka turiti baka ag pitu ka tudu karanidu.” 2Sinunud ni Balak ti pagsabihun ni Balaam, sida duwa ti naghandug turiti baka hanggan tudu karanidu sa kada harandugan. 3Bag-u magkun si Balaam sa kan Balak, “Sitay lang kawu sa arani nimu handug pagsunugun. Lumakaw dap aku, barang pakakit sa kangku ti Panginuun. Tultulan lang niku kawu nu hintay kay sabihun sa kangku.” Nakan nagtukad siya atag sa katayungtungan tagudtud.
4Napakakit ti Diyus sa kanya, magkun si Balaam, “Nagpabuwat aku pitu ka harandugan, sa kada harandugan naghandug aku usa ka baka hanggan usa ka karanidu.”
5Pinakan-an Panginuun si Balaam padakit magkun, “Pagbalik kawu sa kan Balak ag itultul nimu sa kanya inda ti pagsabihun niku.” 6Nakan nagbalik ngani si Balaam sa kan Balak, ag nakitan niya siya matindugan sa arani niya handug, kaibahan ti tanan takinan Muab. 7Bag-u magkun si Balaam,
“Hari Balak taga Muab, ipinatawag nimu aku ginan sa Aram, sa kabantudan sa butlakan. Magkun kawu sa kangku, ‘Apura, saadi ti manga linahi ni Hakub para sa kangku. Saadi sida pag nasakupan Israil.’ 8Kabitay niku saadan ti manga tawu balaw pagkadat-an Diyus? Kabitay niku sumpaun ti manga tawu pagpapaladan Panginuun? 9Pagka ati aku sa katayungtungan tagudtud, nakitan niku sida. Magkabuhi diman sida una sida-sida lang, mablagan sa iba ka manga nasyun. 10Unman may bumilang sa linahi ni Hakub sa kanda kayamuun parihu sa galbuk. Pasnuan mana nimu kang kamatayan parihu sa kanda sa manga matadlung.”
11Magkun si Balak sa kan Balaam, “Hintay inda kanmu binwat sa kangku? Ipinab-ul niku kawu hampay saadan nimu kang kalaban, dapat kanmu binwat pinapaladan di ngap nimu sida!” 12Sinmagut si Balaam, “Kailangan lang sabihun niku ti pag-ipasabi Panginuun sa kangku.”
Kay Ikadwa pag Padakit ni Balaam
13Bag-u magkun si Balak sa kanya, “Pagkuyug kawu sa kangku sa usa waya ka rugar ati makitan nimu ti iba ka nasakupan Israil, dapat balaw gid tanan. Ag ati saadan nimu sida.” 14Nakan tinaban ni Balak si Balaam sa usa ka tanman sa Supim, sa katayungtungan Pisga, ag ati nagpatindug sida pitu ka harandugan ag naghandug usa ka baka ag usa ka karanidu sa kada harandugan.
15Nagbagaw si Balaam sa kan Balak, “Sitay lang kawu sa arani nimu handug pagsunugun habang magpasampak aku sa Panginuun asan-ay sa un-an.”
16Napakakit ti Panginuun sa kan Balaam ag pinakan-an niya siya padakit. Ag magkun siya, “Pagbalik kawu sa kan Balak ag sabihun nimu sa kanya inda pag padakit.”
17Nakan nagbalik si Balaam sa kan Balak, ag nakitan niya siya matindugan sa arani niya handug, kaibahan ti manga takinan Muab. Namaingana si Balak sa kan Balaam, “Unu ti sinabi Panginuun sa kanmu?”
18Magkun si Balaam, “Abala, Balak, anak ni Sipur, patingihi aku kaayad. 19Ti Diyus balaw tawu magpudil ngatay magkauman kay naisipan. Magbagaw aw siya balaw niya pagbuwatun? Magtaratu aw siya unman niya pagtupadun? 20Sinugu niya aku idarangin sida, ag nu nidarangin yi, balaw yi niku inda mabawi. 21Unman aku may nakitan kadautan ngatay kakurian rumas-ug sa Israil. Kaibahan nida ti Panginuun kanda Diyus; pagkilalan-un nida siya kanda hari. 22Ipinalwas Diyus sida ginan sa Ihiptu; parihu siya sa usa ka mabisug pag tudu baka. 23Unman may pandaniwan ngatay panhirian ti makapakuri sa kanda. Nakan sumabi ti manga tawu tungkul sa Israil, ‘Tutuu gid makadululaw ti binwat Diyus sa Israil.’ 24Inda pag nasakupan parihu sa liyun alistu maggira balaw magpahari tugka sa makaun niya kay bulay ag maigup kay dugu.”
25Bag-u magkun si Balak sa kan Balaam, “Nu balaw nimu sida saadan, danga yi lang sida pagdaranginan!” 26Sinmagut si Balaam, “Balaw aw sinabi yi niku sa kanmu kailangan niku buwatun nu hintay ti pagsabihun Panginuun sa kangku.”
Kay Ikatlu pag Padakit ni Balaam
27Magkun maan si Balak sa kan Balaam, “Abala, tabanun niku kawu sa tuhay maan pag rugar. Barang ati magpasnu yi ti Diyus saadan nimu ti Israil para sa kangku.” 28Nakan tinaban ni Balak si Balaam sa katayungtungan Piyur, siyun ginan mag-akitan ti pangawakawaan sa lawud. 29Magkun si Balaam, “Pabwati aku sitay pitu ka harandugan, ag pag-alistu kawu pitu ka tudu baka ag pitu ka lalaki karanidu para sa kangku.” 30Nakan binwat ni Balak ti pagsabihun ni Balaam, naghandug siya usa ka baka ag usa ka karanidu sa kada harandugan.
Currently Selected:
Bilang 23: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines