Bilang 25
25
Nansamba ti manga Israilita sa kan Baal
1Katpung makampuhan ti manga Israilita sa Sitim, ti manga lalaki nag-umpisa nangululid sa manga babayi Muabita. 2Ginarya sida manga babayi manhandug sa kanda manga diyus-diyusan, nangaun sida sa tunda pag manga handug ag nansamba sa tunda pag manga diyus-diyusan. 3Nakan ti manga Israilita nadara nansamba sa kan Baal Piyur. Nakan masyadu gid nagalit ti Panginuun sa kanda.
4Magkun ti Panginuun sa kan Muysis, “Bul-a ti tanan takinan sa tunda pag manga tawu, ag matya sida sa kang atubangan sa paghilingan manga tawu, hampay madura kang masyadu pag pangagalit sa Israil.” 5Nakan magkun si Muysis sa manga manughusay sa Israil, “Kailangan matyun niyu kanyu manga kaibahan magsamba sa kan Baal Piyur.”
6Bag-u may usa ka Israilita nagtaban babayi Midyanita tag sa kay magtal-anakan. Maghiling si Muysis hanggan ti buu kadamlan Israil habang mag-amiraw sida siyun sa may sabian Turda Taragbuan. 7Pagka nakitan ni Piniis anak ni Iliyasar laki ni manughandug Aarun, ginminan siya ginan sa kadamlan ag nagbuul bangkaw. 8Inusig niya ti tawu atag sa sulud turda, ag tinuhug niya bangkaw sida duwa. Bag-u di nag-apas ti sarut sa Israil, 9dapat 24,000 ti namatay dahil sa sarut.
10Magkun ti Diyus sa kan Muysis, 11“Bin-ul ni Piniis anak ni Iliyasar laki ni manughandug Aarun ti pangagalit niku sa manga Israilita, dahil parihu siya sa kangku magkagalit gid sa kasalanan. Nakan unman niku tinabu minatay ti manga Israilita, buwatun mana niku tunda sa kanda dahil sa kang pangagalit. 12Nakan sabihi siya mamuwat aku kasunduan sa kanya kuntay papaladan niku siya. 13Sa tunda pag kasunduan, siya hanggan kay manga lahi buwatun manughandug hanggan waya aban, dahil ipinakakit niya sa kangku kay magkagalit sa kasalanan, linukat niya ti manga Israilita sa kanda kasalanan.”
14Ti namatay pag Israilita kaibahan babayi Midyanita si Simri anak ni Salu, takinan usa ka magtal-anakan lahi ni Simyun. 15Ti babayi Midyanita si Kusbi anak ni Sur. Si Sur usa ka takinan sa magtal-anakan Midyanita.
16Magkun ti Diyus sa kan Muysis, 17“Baliwun niyu kalaban ti manga Midyanita, ag panmatya niyu sida, 18dahil kamu binaliw diman nida kalaban ati sa Piyur, ag dahil diman sa kan Kusbi pag babayi anak usa ka takinan Midyanita. Minatay inda pag babayi katpung nagras-ug ti sarut sa Piyur.”
Currently Selected:
Bilang 25: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
