Bilang 22
22
Ipinatawag ni Hari Balak si Balaam
1Nagparargu ti lakaw manga Israilita tugka sa nakaras-ug sida sa karatagan Muab, ag nagkampu sida sa butlakan baliwa Sapa Hurdan, maatubang sa Hiriku.
2Naalaman ni Hari Balak taga Muab, anak ni Sipur, ti tanan binwat manga Israilita sa manga Amuriyu. 3Nadala siya hanggan ti manga Muabita dahil sa kayamuun manga Israilita.
4Magkumun ti manga Muabita sa manga manugpamahala Midyan, “Pihu rurisun nida kita, parihu sa paghirut manga baka sa ilamnun.”
Nakan si Balak anak ni Sipur, hari sa Muab sa tunda pag udas, 5pinmasugu manga manugpadakit hampay ipatawag si Balaam anak ni Biyur mag-uli sa Pitur. Siyun sa Pitur pag ilinusad si Balaam, arani sa Sapa Iyupratis. Inda ti ipinabilin ni Balak:
“May manga tawu ginan sa Ihiptu, mayamu sida mag-ulian sa kanmi arani. 6Nakan pagsitay kawu ag saadi nimu inda pag manga tawu, dahil makapangyarihan man sida sa kanmi. Barang ngani matalu niku sida ag mapaighit ginan sa kang daga. Dahil naalaman niku una si unu kanmu pag-idarangin pagpapaladan, ag ti pag saadan nimu mag-idamhak.”
7Nakan linmakaw ti manga takinan Muab hanggan Midyan may dara pamayad sa kan Balaam. Itinultul nida sa kanya ti ibinilin ni Balak. 8Magkun si Balaam sa kanda, “Sitay yi lang kamu pag katurug kainda pag yabi, ag itultul niku sa kanyu aldaw nu hintay ti sabihun Panginuun sa kangku.” Nakan siyun ngani pag naturug ti manga takinan Muab.
9Nagpaingana ti Diyus sa kan Balaam, “Si unu tunda kanmu kaibahan pag manga tawu?” 10Sinmagut si Balaam sa Diyus, “Sida ti manga manugpadakit ipinadara ni Hari Balak taga Muab, anak ni Sipur. Kaindaay kay ipinadakit: 11‘May manga tawu ginan sa Ihiptu mayamu gid sida. Nakan pag-ataytag kawu saadi inda pag manga tawu para sa kangku. Barang abi matalu niku sida ag mapaighit tag sa arayu.’ ”
12Dapat magkun ti Diyus sa kan Balaam, “Danga kawu magkuyug sa kanda. Ag danga pagsaadi ti pagsabihun nida pag manga tawu, dahil pagpapaladan niku sida.”
13Pagka nimata si Balaam sa surip, sinabihan niya ti manga takinan ni Balak, “Pag-uli yi lang kamu sa kanyu nasyun dahil balaw magpasnu ti Panginuun kumuyug aku sa kanyu.”
14Nakan binmalik ti manga takinan Muab tag sa kan Balak ag magkun, “Dayu manguyug si Balaam sa kanmi.”
15Nakan pinmadara maan si Balak manga takinan mas mayamu ag mas kagalang-galang man kaysa kabag-u. 16Nag-atag sida kan Balaam ag magkun:
“Inda ti pagsabihun ni Balak anak ni Sipur: ‘Danga nimu pagpasnui may umampara sa kanmu mag-ataytag. 17Bayadan niku kawu una mahal ag buwatun niku una hintay kanmu pagkaibgan. Pag-ataytag yi kawu, saadi inda pag manga tawu para sa kangku.’ ”
18Dapat nagsagut si Balaam sa kanda, “Una ipakaun waya ni Balak sa kangku kay balay hari punu pilak ag gintu, balaw niku mahimu labagun ti sugu Panginuun niku Diyus, una sa daka ngatay sa diit lang pag bagay. 19Dapat sitay lang dap kamu pag kiturug taynguna pag yabi parihu sa binwat niyu kaibahan, barang may tuhay waya sabihun ti Panginuun sa kangku.”
20Ati pag yabi magkumun ti Diyus sa kan Balaam, “Nagsitay gid waydi inda pag manga tawu magbuul sa kanmu, pagkuyug kawu sa kanda, dapat nu hintay lang ti sabihun niku sa kanmu imaw ti sunda.”
Kan Balaam Asnu
21Nakan pagkasurip, inalistu ni Balaam kay asnu ag nagkuyug sa manga takinan Muab 22kaibahan kay duwa ka suruguun. Dapat habang magbaklay#22:22 Dapat habang magbaklay: ngatay, Dahil linmakaw. si Balaam masakyan sa kay asnu, nagalit ti Diyus, nakan inampara siya anghil Panginuun sa dalan. 23Pagka nakitan asnu matindugan ti anghil Panginuun sa dalan may hiyaput baladaw, napalipas sa dalan ti asnu ag inmatag sa tanman. Nakan pinitusan ni Balaam ti asnu ag ipinabalik sa dalan.
24Bag-u tinmindug ti anghil Panginuun sa apiki pag dalan sa tab-anan duwa ka alad batu manga taranuman ubas. 25Pagka nakakit ti asnu sa anghil Panginuun, nangalubaybay siya sa alad batu ag nailpit kay lulud ni Balaam. Nakan pinitusan maan ni Balaam kay asnu.
26Bag-u napaagap sa unahan ti anghil Panginuun ag tinmindug sa apiki pag dalan sa balaw yi gid makapalisud sa wala una sa sikun. 27Pagka nakakit ti asnu sa anghil Panginuun nilagpi lang ti asnu, nangisug gid si Balaam ag binakul niya sugkud. 28Bag-u pinabagaw Panginuun ti asnu, ag magkun sa kan Balaam, “Unu lugud kang nabwat sa kanmu nakan binakul nimu aku katlu ginan?” 29Sinmagut si Balaam sa asnu, “Binwat nimu aku ga luku-luku! Nu may baladaw lang aku, matyun niku kawu kainda.” 30Magkun ti asnu sa kan Balaam, “Unman aw aku pag asnu ti pirmi nimu pagsakyan? May ugali aw aku maglukub parihu sa kainda?” Sinmagut si Balaam, “Unman.”
31Bag-u ipinakakit Panginuun sa kan Balaam kay anghil matindugan sa dalan may bitbit baladaw. Nakan linmuhud si Balaam sa daga.
32Namaingana sa kanya ti anghil Panginuun, “Hayga binakul nimu kanmu asnu katlu ginan? Aku inda ti mag-ampara sa kanmu dahil kanmu ugali balaw mayad sa kang magbantay. 33Nakitan aku nimu asnu napaiwas siya sa kangku katlu ginan. Nu balaw siya napaiwas, minatay yi mana niku kawu ag kanmu asnu pabay-anan niku mabuhi.”
34Magkun si Balaam sa anghil Panginuun, “Nagsalan gid aku! Balaw niku alam matindugan maaw kawu asan sa dalan mag-ampara sa kangku. Taynguna, nu daut kang binwat, para sa kanmu muli yi lang aku.”
35Magkun ti anghil Panginuun sa kan Balaam, “Pagkuyug kawu sa tunda pag manga tawu, dapat bumagaw lang kawu angay sa kang gustu ipabagaw sa kanmu.” Nakan kinmuyug ngani si Balaam sa manga takinan ni Balak.
36Pagka naalaman ni Balak arani yi si Balaam, sinulang niya siya ati sa usa ka banwa sa Muab arani sa Arnun, sa katugkaan niya sakup pag daga.
37Magkun si Balak sa kan Balaam, “Kabay madaldali kawu kang ipinab-ul? Hayga bag-u di kawu nag-ataytag? Mag-isip aw kawu barang balaw kawu kang bayadan?” 38Sinmagut si Balaam, “Inda yi aku. Dapat aku balaw may bagawun nu unman ti ipabagaw lang Diyus sa kangku.”
39Bag-u nagkuyug si Balaam sa kan Balak atag sa Kiryat Husut. 40Ati naghandug si Balak baka hanggan karanidu. Ipinakaun niya ti iba ka taguban sa kan Balaam hanggan sa kay kaibahan manga takinan. 41Pagkasurip, dinara ni Balak si Balaam sa Bamut Baal, ag ati nakitan niya sa lawud ti iba ka nasakupan Israil.
Currently Selected:
Bilang 22: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
