Markus 9

1Bag-u magkun si Hisus sa kanda, “Ungud duy kang pagsabihun sa kanyu, ti iba sa kanyu sitay dayu mamatay hanggan sa udwaya makitan nida rumas-ug kay paghari Diyus may kamaskihan.”

Si Hisus Nagtuhay Kay Histuda

(Mat. 17:1-13; Lukas 9:28-36)

2Pagka nakalawuy unum ka sirang, tinaban ni Hisus si Pidru hanggan sida ni Santiyagu ni Huwan. Sida upat nag-atag sa bantud abwat. Pagka sida siyun nakitan nida nagtuhay kay histuda ni Hisus. 3Kay manga rutay pasay marakintab, malagti gid masyadu. Una hintay tigpalagti sa rutay sitay sa babaw daga udyi may humuwad katida kay kalagti. 4Bag-u napakakit sa kanda ni Pidru si Ilyas hanggan si Muysis maghampang sa kan Hisus. 5Nakan ngani magkun si Pidru tabug sa kan Hisus, “Maisturu, mayad gid duy kita sitay. Bumuwat kami tulu ka payag, kay usa sa kanmu, kay usa kan Muysis, kay usa kan Ilyas.” 6Unman magkaalaman ni Pidru kay pagsabihun. Subra yi gid masyadu kanda dala. 7Bag-u may rurum hinmamuy sa kanda, may nagbagaw ginan sa rurum magkun, “Inda kang pagmayadun pag Anak, patingihi gid niyu siya.” 8Bag-u kadaka namarantayun kay manga tuludluan ni Hisus, unman yi sida may nakitan tawu nu unman si Hisus lang kanda kaibahan.

9Sa kanda maglus-ug ginan sa bantud, sinabi ni Hisus sa kanda magkun, “Danga dapu sabihun niyu una sa kantapu ti kanyu nakitan hanggan sa udwaya mabuhi uman ti Anak Tawu.” 10Hinamnu nida tunda pag binagaw ni Hisus. Dapat magparaingan-an sida nu hintay kay ibug sabihun sa kay pagkabuhi uman.

11Pinaingana siya niya manga tuludluan magkun, “Hayga duy pagsabihun manga manugtudlu Kasuguan kailangan sumitay dapu si Ilyas?” 12-13Sinmagut si Hisus magkun, “Sumitay ngani dapu si Ilyas hampay kay ialistu ti tanan manga bagay. Dapat kang pagsabihun sa kanyu, nagsitay yi ginan si Ilyas ag binwat yi manga tawu sa kanya ti nagustuhan nida angay sa isinurat sa Banal Kasuratan tungkul sa kanya. Dapat hayga pagsabihun Banal Kasuratan magkun aban ti Anak Tawu kailangan umagwanta waydi sa mayamu kakurian ag dayuun siya manga tawu?”

Pinaayad ni Hisus ti Anak Inapuan Labang

(Mat. 17:14-21; Lukas 9:37-43)

14Pagka sida ni Hisus rinmas-ug maan sa lawud, nakitan nida kay iba manga tuludluan linibut kayamuan tawu paglabanan sida manga manugtudlu Kasuguan. 15Pagka nakitan manga tawu si Hisus, nadulaw gid sida masyadu. Nalagiw sida tanan-tanan atag sa kanya nagbaya sa kanya. 16Bag-u pinaingana niya sida magkun, “Hintay kanyu pag-ikadaut sa kanda?” 17Ti usa ka tawu sa kayamuan nagsagut sa kanya magkun, “Maisturu, dinara niku sa kanmu kang anak lalaki inapuan labang magpabuyun sa kanya. 18Kada siya pagsuldun, pagpagpuun siya labang, magbura kay bibig, magngarut kay manga ngipun ag lagat-lagat magpan-gaw gid. Sinabi niku sa kanmu manga tuludluan, ipalwas mana nida ti labang. Dapat unman nakaya nida.”

19Nagsagut si Hisus magkun, “Kamu katna pag manga tawu unman may pagsarig. Kabitay kadugay kailangan aku kanyu kaibahan? Kabitay waya lugud kadugay kamu kang pagtiisan? Daraha niyu ti anak sitay tag.”

20Dinara ngani nida ti anak tag sa kan Hisus. Pagka nakitan niya si Hisus, kadaka pinatigbak labang ti anak ag siya nilugmuk sa daga, napalilid-lilid waya magbura kay bibig. 21Pinaingana ni Hisus kay ama magkun, “Kapira di waya pag inapuan siya labang?” Sinabi niya ama, “Ginan sa kay diit waya daan di. 22Pirmi yi ti anak pag-ipalugmuk sa apuy, pag-italgub sa danum hampay siya matyun. Dapat nu may mabuwat kawu, kaawai duy nimu kami awati.” 23Sinabi ni Hisus sa kanya, “Hayga kanmu sabi, ‘Nu may mabuwat kawu’? Ti tanan pag manga bagay kaya mabuwat Diyus sa tawu nu siya magsarig.” 24Kadaka nagtawag ti ama anak magkun, “Magsarig duy aku. Awati nimu aku, kurang waya kang sarig.”

25Pagka nakitan ni Hisus ti kayamuan tawu nandurunganan nalagiw atag sa kanya, sinungyaw niya ti labang magkun, “Kawu pag labang tigpabungul magpabuyun, pagsuguun niku kawu pagluwas yi kawu ginan sa kanya ag danga yi kawu magsulud uman sa kanya.” 26Namagrit ti labang, pinatigbak niya gid masyadu ti anak bag-u nagluwas siya. Ag ti anak bilang ga namatay yi. Nakan mayamu ti nagsabi, “Siya tigbak yi.” 27Dapat hiniyaptan ni Hisus kay kamang bag-u kay binangun. Bag-u nagtindug yi ti anak.

28Pagka nagsulud maan si Hisus sa balay, nagpaingana kay manga tuludluan sa unman may magdungug iba magkun, “Hayga nguna duy unman nakaya nimi nipalwas tunda pag labang?” 29Nagsagut si Hisus magkun, “Inda pag kalasi labang unman mipalwas nu unman sa panab-anan lang darangin.”

Kas-a maan Pinat-ama ni Hisus Kay Kamatayan

(Mat. 17:22-23; Lukas 9:43-45)

30Nighit sida ati bag-u pinalibut nida ti daga Galiliya. Kay gustu mana danga maalaman manga tawu siya sitay. 31Dahil nagtudlu siya sa kay manga tuludluan magkun, “Aban ti Anak Tawu ipahintulut yi sa manga tawu bag-u kanda matyun siya. Pagka minatay yi siya, nu makalawuy yi tulu ka sirang, mabuhi maan siya uman.” 32Dapat ay unman magkaintindihan nida tunda pag hampang, magkadala sida magpaingana sa kanya kay ibug sabihun.

Si Unu ti Lalu Mataas?

(Mat. 18:1-5; Lukas 9:46-48)

33Rinmas-ug sida ni Hisus sa Kapirnaum. Pagka sa balay yi, nagpaingana si Hisus sa kay manga tuludluan magkun, “Hintay kanyu birirbahan kis-ab sa dalan?” 34Dapat unman sida nag-ingay. Dahil sida nagparadayawan sa dalan nu hintay sa kanda ti mataas. 35Tinmukaw si Hisus bag-u tinawag niya kay sampulu may duwa ka tuludluan. Sinabi niya sa kanda, “Una hintay tigkaibug magpangulu sa kanyu, kailangan siya ngap ti sa uryan ag ti manugsirbi sa tanan.”

36Bag-u bin-ul niya ti usa ka diit pag anak, kay ipinatindug sa kanda karaw-an bag-u kay hinagkung. Magkun siya sa kanda, 37“Una si unu pag tawu ti magsunud sa kangku ag pakan-an niya halaga ti usa sa manga kainda pag diit anak, aku di ngap kay pinakan-an halaga. Una si unu pag tawu nu pakan-an niya halaga aku, balaw lang aku kay pinakan-an halaga nu unman ti nagsugu diman ngap sa kangku.”

Ti Unman Maglaban sa Kanta, Minsan diman sa Kanta

(Lukas 9:49-50)

38Sinabi ni Huwan, “Maisturu, kami may nakitan tawu magpalwas labang ginan sa tawu sa kanmu ngaran. Kanmi inirangan siya, dahil siya unman magkuyug sa kanta.” 39Dapat sinabi ni Hisus, “Danga pag-irangi. Dahil ti tawu nu magbuwat makamaskihan buwat sa ngaran niku, dayu kadaka magbagaw daut laban sa kangku. 40Dahil ti unman maglaban sa kanta, kakampi diman nita. 41Ungud duy kang pagsabihun sa kanyu, una si unu tigpainum danum sa kanyu dahil kamu sakup sa Pinili Diyus Manugribri pag Hari,#9:41 Pinili Diyus Manugribri pag Hari: sa Giriyigu, Kiristu. pihu gid siya gantihan mayad.”

Ti manga Magpaturun tabug sa Kasalanan

(Mat. 18:6-9; Lukas 17:1-2)

42Sinabi ni Hisus magkun, “Mayad waya pag tawu nu higtan bitinan galingan batu kay liug bag-u iyamut sa dagat sa ud pumaturun siya atag sa kasalanan sa inda pag manga dariit anak magsarig sa kangku. 43Nu kanmu kamang tigpaturun sa kanmu tabug sa kasalanan, pulda yi nimu tunda. Mayad waya nu rumas-ug kawu sa langit usa lang kanmu kamang, sayang waya nu kawu may duwa ka kamang bag-u kawu atag sa impirnu. 44Ati unman mamatay kanda sapat ag unman magkapsa ti apuy.#9:44 Inda pag talata unman sa manga daan Giriyigu pag kupya. 45Nu kanmu lulud tigpaturun sa kanmu tabug sa kasalanan, pulda yi nimu tunda. Mayad waya nu rumas-ug kawu sa langit usa lang kanmu lulud, sayang waya nu kawu may duwa ka lulud bag-u iyamut sa impirnu. 46Ati unman mamatay kanda sapat ag unman magkapsa ti apuy.#9:46 Inda pag talata unman sa manga daan Giriyigu pag kupya. 47Nu kanmu mata tigpaturun sa kanmu tabug sa kasalanan, luwata yi nimu. Mayad waya nu sumulud kawu sa kaharian Diyus buta kanmu usa ka mata, sayang waya nu kawu may duwa ka mata bag-u iyamut sa impirnu. 48Ati unman mamatay kanda sapat ag unman magkapsa ti apuy.

49“Dahil ti kada usa paulian apuy ag asin.#9:49 Dahil ti kada usa paulian apuy ag asin: Mahimu kay ibug sabihun hampay malunsay, dapat mahimu diman parusahan. 50Mayad ti asin dapat ay nu manab-ang ti asin hintay waya kanyu itimpala? Ag nu kabitay ti asin mag-awat sa kanta, kailangan pag parihu diman kamu sa asin mag-awat sa usa kag usa hampay mayad ti magparakiusahan.”

Currently Selected:

Markus 9: HNN

Highlight

Copy

Compare