Markus 10

Kay Tudlu ni Hisus tungkul sa Magtarayakan

(Mat. 19:1-12)

1Pagka nighit si Hisus ati ginan, nag-atag siya sa daga Hudiya hanggan sa dipay sapa Hurdan. Pagka ati yi pinabusul maan siya kayamuan tawu. Tinudluan maan niya sida angay sa kay ugali.

2May manga Parisiyu nagpakarani sa kan Hisus, pinaingana nida sa pahaluksu magkun, “Angay aw nguna sa Kasuguan ni Muysis nu tayakan lalaki kay asawa?” 3Nagsagut si Hisus magkun, “Hintay kay bilin ni Muysis sa kanyu?” 4Sinabi nida, “Kay bilin ni Muysis kailangan pakan-an kunu lalaki kay asawa kasuratan sa kanda magtarayakan nu tulakun yi niya ti babayi.#10:4 Bantayi diman ti Diyut. 24:1.” 5Magkun si Hisus sa kanda, “Dahil sa maganit gid waydi kanyu tagipusuun nakan katida kay bilin ni Muysis sa kanyu. 6Dapat ginan sa kabag-u, pagka linalang Diyus ti kalibutan, ‘Linalang niya sida may lalaki may babayi.#10:6 Bantayi diman ti Gim. 1:27; 5:2. 7Nakan ngani tayakan lalaki kay ama kay ina hampay magpausa sa kay asawa. 8Bag-u sida usa yi lang ka nayi.’#10:8 Bantayi diman ti Gim. 2:24. Nakan sida balaw yi duwa, nu unman usa yi lang. 9Ti pinausa Diyus, danga pagbulaga tawu.”

10Pagka sa balay yi maan, pinaingana si Hisus niya manga tuludluan tungkul tunda. 11Sinabi niya sa kanda, “Una hintay pag lalaki nu tumayak sa kay asawa bag-u umasawa sa iba, magkasala sa pamabayi sa kay un-an asawa. 12Ag ti babayi nu tinayakan niya asawa bag-u mangasawa sa iba lalaki, magkasala waydi tunda pag babayi sa panlalaki.”

Pinapaladan ni Hisus ti manga Anak

(Mat. 19:13-15; Lukas 18:15-17)

13May manga nagtaban kanda manga anak tabug sa kan Hisus hampay nangus kup-an niya kamang. Dapat sinungyaw sida niya tuludluan. 14Pagka nakitan ni Hisus, nag-isug siya. Sinabi niya sa manga tuludluan, “Pabay-ani niyu ti manga anak magpakarani sa kangku. Danga yi niyu pag-irangi. Dahil ti ga anak imaw ti pagharian Diyus. 15Ungud duy kang pagsabihun sa kanyu, una hintay pag tawu ti unman ga anak kay magpasakup sa kay paghari Diyus, balaw kabilang sa manga tawu pagharian Diyus.” 16Bag-u kay hinagkung ti manga anak, kinup-an niya manga kamang bag-u kay pinapaladan sida.

Ti Lalaki Mayaman

(Mat. 19:16-30; Lukas 18:18-30)

17Pagka magkalakaw yi maan si Hisus, may usa ka tawu nalagiw tag sa kanya, nagluhud sa kay atubangan bag-u namaingana sa kan Hisus magkun, “Mayad pag Maisturu, hintay nguna kang buwatun hampay matanggap niku ti buhi unman may katapusan?” 18Nagsagut si Hisus sa kanya, “Hayga aku pagsabihun nimu mayad? Unman may mayad nu unman ti Diyus lang. 19Alam yi nimu ti Kasuguan magkun, ‘Danga kawu maglibun sa kanmu kaparihu, danga kawu magpanguragin, danga kawu magtakaw, danga kawu magpudil sa kanmu magkastigus, danga kawu magdaya. Galanga nimu kanmu ama kanmu ina.’ ”#10:19 Bantayi diman ti Pag. 20:12-16; Diyut. 5:16-20. 20Sinabi lalaki sa kan Hisus, “Maisturu, ginan di waya sa kang diit tinupad niku tunda tanan.” 21Nagturun si Hisus sa kanya may pagmahal bag-u sinabi niya sa kanya, “Usa waya ka bagay ti kurang sa kanmu. Pag-ati kawu, pabilihan nimu ti tanan nimu kasiyunan. Ayaw-ayawa kay kabilyanan sa manga pugri hampay magkaimaw kawu kayamanan sa langit. Bag-u pagsitay maan kawu pagkuyug sa kangku.” 22Magkabayung ti lalaki sa kay sinabi ni Hisus, maruku maruku kay nighit, dahil masyadu gid siya mayaman.

23Namarantayun si Hisus sa kay manga tuludluan bag-u sinabi niya sa kanda, “Ungud kang pagsabihun sa kanyu, masyadu makuri ti manga mayaman magpasakup sa kay paghari Diyus.” 24Nadulaw kay manga tuludluan sa kay sinabi niya. Sinabi maan ni Hisus sa kanda magkun, “Duy, makuri masyadu ti tawu pumasakup sa kay paghari Diyus. 25Malpus waya ti kamilyu sumuyuk sa sulat dayum, makuri man ti mayaman magpasakup sa kay paghari Diyus.” 26Lalu naglingut kay manga tuludluan, nakan nagpaingana sida magkun, “Nu katida duy si unu nguna ti makaribri?” 27Tinurun sida ni Hisus, sinabi niya, “Dayu ngani inda mabuwat tawu. Dapat nu sa Diyus balaw katida, dahil mabuwat di Diyus ti tanan kabagayan.”

28Bag-u nagsabi si Pidru magkun, “Malu duy kami inda, kanmi tinayakan yi kanmi ulian bag-u kami kinmuyug ngani sa kanmu.” 29Sinabi ni Hisus sa kanda, “Ungud duy kang pagsabihun sa kanyu, una si unu nu magtiis magtayak sa kay ulian, sa kay manga patar-ari lalaki, sa patar-ari babayi, sa ina, sa ama, sa kay manga anak una sa kay manga daga dahil sa kangku ag dahil sa Mayad pag Barita, 30makatanggap siya usa ka gatus maan kay tulus sitay sa babaw daga, manga ulian, manga patar-ari lalaki, patar-ari babayi, manga ina, manga anak, manga daga, may patapil waya manga pag-unuunu. Ag aban makatanggap siya buhi unman may katapusan. 31Dapat mayamu ti inmuna miuryan. Mayamu ti nauryan umuna ngap.”

Pinat-ama maan ni Hisus Kay Kamatayan ag Kay Pagkabuhi Uman

(Mat. 20:17-19; Lukas 18:31-34)

32Sida ni Hisus sa dalan magtukad tabug sa Hirusalim. Si Hisus ti mag-una. Magkadulaw kay manga tuludluan. Ag ti manga tawu magdasun sa kanda magkadala. Apinablag niya kay sampulu may duwa ka tuludluan bag-u itinultul ni Hisus sa kanda ti manga mangyari sa kanya udyi dumugay. 33Magkun siya, “Malu duy kita sa dalan yi tag babaw, tag sa banwa Hirusalim. Nu ati yi, ipahintulut ti Anak Tawu sa manga pangulu manughandug hanggan sa manga manugtudlu Kasuguan. Bag-u kanda sintinsiyahan siya sa kamatayan. Bag-u kanda ipabahala siya sa manga balaw Hudiyu, 34hampay kanda muransahun, bug-anan, hampakun bag-u matyun. Dapat nu makalawuy yi tulu ka sirang mabuhi maan siya uman.”

May Kailangan sa kan Hisus Sida ni Santiyagu ni Huwan

(Mat. 20:20-28)

35Nagpakarani sa kan Hisus sida ni Santiyagu ni Huwan kay manga anak ni Sibidiyu. Sinabi nida sa kan Hisus, “Maisturu, may kailangan mana kami sa kanmu.” 36Sinabi ni Hisus magkun, “Hintay duy kanyu kailangan kang buwatun?” 37Sinabi nida sa kanya, “Pakan-an nimu kami karampatan hampay makatukaw ti usa sa kanmu sikun, ti usa sa kanmu wala nu kawu humari yi.” 38Dapat sinabi ni Hisus sa kanda, “Unman niyu naintindihan ti kanyu pagpamuhunun. Kaya aw mainman niyu ti ungut may kakurian kang inman? Kaya aw kamu pumatulbaw sa kang patulbawan?”#10:38 Kaya aw mainman niyu ... kang patulbawan: sa litiral, Inman aw niyu ti ungut kang inman, ag patulbawan aw niyu ti kang patulbawan? 39Sinabi nida sa kanya, “Kaya duy nimi.” Bag-u sinabi ni Hisus sa kanda, “Inman diman ngani niyu ti ungut may kakurian kang inman. Sa kang patulbawan aban itulbaw kamu ati. 40Dapat balaw aku ti bahala magpakaun karampatan sa tawu hampay makatukaw sa kang sikun sa kang wala. Tunda para sa manga inalistuhan yi.”

41Pagka ti sampulu ka tuludluan nakadnug tunda, magkagalit sida sa kanda ni Santiyagu ni Huwan. 42Nakan sinabi ni Hisus sa kanda, “Abala duy dapu kamu.” Bag-u kay sinabi sa kanda magkun, “Nadnugan niyu ti manga pinunu manga unman magsarig sa Diyus magpalabi-labi sa kanda manga sakup. Ti may manga kangaranan sa kanda maggamit waydi kanda karampatan. 43Nu bay sa kanyu balaw katida. Una si unu sa kanyu tigkaibug katungkulan, kailangan siya ngap ti manugsirbi sa kanyu. 44Ag una hintay tigkaibug magpangulu sa kanyu, kailangan siya alistu hampay panawuhun niyu tanan. 45Katunda diman ti Anak Tawu nagsitay balaw hampay sirbihan nu unman hampay siya magsirbi ngap ag hampay ipakaun niya kay buhi sa kamatayan agud mayamu ti malukat.”

Maghiling yi maan si Bartimiyu

(Mat. 20:29-34; Lukas 18:35-43)

46Nagras-ug sa banwa Hiriku sida ni Hisus. Pagka si Hisus hanggan kay manga tuludluan ag ti mayamu pag tawu magginan maan sa Hiriku, may lalaki buta matukawan sa saruy dalan maghagad kuwarta. Kay ngaran pag tawu si Bartimiyu, kan Timiyu anak. 47Pagka nadnugan niya si Hisus taga Nasarit ti maglawuy, inmumpisa siya tinmawag magkun, “Hisus, kawu ti linahi ni Dabid,#10:47 linahi ni Dabid: Inda kay tawag manga Hudiyu sa Pinili Diyus Manugribri pag Hari ngatay Kiristu dahil magpaniwala sida siya ginan sa linahi ni Hari Dabid ag imaw ti manmana sa kay kaharian. kaawai duy nimu aku.” 48Sinabihan siya mayamu tawu danga yi siya mag-ingay. Dapat lalu ngap siya nagtawag magkun, “Kawu ti linahi ni Dabid, kaawai duy aku.” 49Bag-u nagpat-ung ngani si Hisus ag sinabi niya, “Tawagi niyu siya.” Tinawagan ngani nida ti lalaki buta, magkun sida sa kanya, “Pagbaya yi kawu, pagtindug yi, dahil pagtawagan yi kawu ni Hisus.” 50Tinayakan ni Bartimiyu kay kulimpay, tinmindug madali ag nag-atag sa kan Hisus. 51Nagpaingana si Hisus sa kanya, magkun, “Hintay duy kanmu gustu kang buwatun sa kanmu?” Nagsagut ti buta, “Maisturu, kang gustu mana kang mata pag maghiling yi.” 52Sinabi ni Hisus sa kanya, “Pag-atag yi duy kawu. Pinaayad#10:52 Pinaayad: ngatay/ag, Ribri. yi kawu dahil kawu nagsarig sa kangku.” Susun maghiling yi ngani siya bag-u nagkuyug siya sa kan Hisus sa dalan.

Currently Selected:

Markus 10: HNN

Highlight

Copy

Compare