Markus 8

Kay Nagpakaun Karan-unun sa Upat ka Libu ka Tawu

(Mat. 15:32-39)

1Sa ati pag sirang, pagka mayamu maan ti manga tawu ag unman sida may kan-un, tinawag ni Hisus kay manga tuludluan kay sinabi, 2“Magkaawa aku sa manga tawu inda, dahil tulu yi ka sirang taynguna tugka kaibahan niku sida. Udyi sida may makaun. 3Nu pauliun niku sida sa kanda manga balay, barang nu sa dalan magpandulum yi ti mata sa lun-us. Ginan paman sa arayu ti manga iba.” 4Magkun ti manga tuludluan, “Kabitay duy kita pag makakit karan-unun kumang-ud sa kainda kay kayamu pag manga tawu sitay sa pangawakawaan?” 5Nagpaingana si Hisus sa kanda magkun, “Pira ka bilug kanyu tinapay asan?” Kay sagut nida, “Pitu duy ka bilug.” 6Pinatukaw ni Hisus ti manga tawu sa babaw daga. Bag-u bin-ul niya ti pitu ka tinapay. Pagka nakapasalamat siya sa Diyus, kay pinikapika tunda bag-u kay ipinakaun sa kay manga tuludluan hampay kanda ihayin sa manga tawu. Ihinayin ngani nida sa kayamuan. 7May dariit waya sida pag manga isda pira-pira ka bilug. Pagka nakapasalamat maan si Hisus sa Diyus bag-u ipinahayin diman niya tunda sa kay manga tuludluan. 8Nagkaun ti manga tawu nangabsug. Pagka kanda tinipun kay sawad pinikapika tinapay, punu ti pitu ka luwak daraka. 9Manga upat ka libu ka tawu ati. Bag-u di pinauli ni Hisus ti manga tawu. 10Pagka nuli ti manga tawu, nagsakay si Hisus hanggan kay manga tuludluan sa duunduun, nag-atag sa Dalmanuta pag daga.

Hinagadan tanda si Hisus

(Mat. 16:1-4)

11Nagluwang ti manga Parisiyu nagdibati sa kan Hisus. Gustu nida pasalanun siya nakan hinagadan nida siya tanda ginan sa langit. 12Nanhangus si Hisus bag-u sinabi niya, “Hayga maghanap tanda inda pag manga tinubu tawu? Ungud duy kang pagsabihun sa kanyu, unman gid may tanda ipakaun taynguna sa manga tawu.” 13Bag-u pagka tinayakan niya sida ati, nagdipay siya tag sa baliw dipay danaw.

Ugali manga Parisiyu

(Mat. 16:5-12)

14Nalimtan niya manga tuludluan kanda balun. Unman may dara nu ud usa-usa lang ka tinapay sa duunduun. 15Nagbilin si Hisus sa kanda magkun, “Pag-aman gid kamu sa pamadaka sa tinapay manga Parisiyu hanggan sa kan Hirudis pag pamadaka sa tinapay.” 16Bag-u nagharampangan kay manga tuludluan magkun sida, “Unman kita may dara kanta balun, nakan sinabi niya tunda.” 17Alam di ni Hisus kanda pag-isipun nakan pinaingana niya sida, “Hayga kamu magkaaburidu dahil unman kita may dara balun? Udwaya aw niyu nasalman, udwaya aw niyu naintindihan? Udwaya aw nidna sa kanyu naisipan? 18May manga mata kamu, unman aw kamu makakit? May manga tuli kamu, unman aw kamu makadnug? Nalimtan aw lugud niyu 19sa kang nagpika-pika lima ka tinapay hampay pakan-an ti lima ka libu ka tawu? Pira ka luwak ti napnu manga pinikapika kanyu maan bin-ul?” Magkun sida, “Sampulu may duwa ka luwak duy.” 20Sinabi maan ni Hisus, “Pagka pinikapika niku ti pitu ka tinapay hampay pakan-an ti upat ka libu ka tawu, pira ka luwak ti napnu manga pinikapika kanyu maan bin-ul?” Magkun sida, “Pitu ka luwak duy.” 21Bag-u sinabi niya sa kanda, “Nabi, udwaya aw niyu naintindihan?”

Pinaayad ni Hisus ti Tawu Buta

22Pagka rinmas-ug sida ni Hisus sa Bitsayda pag banwa, may manga tawu nagdara tag sa kan Hisus usa ka tawu buta, nagpakihampang sa kan Hisus hampay kay kup-an kamang. 23Inabat ni Hisus ti buta sa kamang atag sa luwas banwa. Binug-anan niya kay manga mata, bag-u kinup-an niya manga kamang. Kay pinaingana ni Hisus magkun, “Makakit yi aw kanmu mata?” 24Binmantay ti lalaki nagsabi, “Maghiling yi aku sa manga tawu maglakaw, dapat ay anyu ga manga puun kayu.” 25Kas-a maan ginan hinikap ni Hisus ti manga mata buta. Binmantay maan siya mayad. Naayadan yi kay mata, mayad yi kay magbantay. 26Nagsabi si Hisus sa kanya, “Pag-uli yi kawu, danga yi lakaw sa banwa.”

Kay Ipinakilala ni Pidru si Hisus

(Mat. 16:13-20; Lukas 9:18-21)

27Nag-atag si Hisus hanggan kay manga tuludluan sa manga baryu sa kay kalibut banwa Sisariya Pilipi. Pagka sa dalan waya sida, pinaingana niya kay manga tuludluan magkun, “Hintay ti hantup manga tawu nu si unu aku?” 28Nagsagut sida, “Magkun ti iba sa kanda kawu kunu si Huwan Manugtulbaw. Magkun maan ti manga iba si Ilyas kawu. May magsabi waya kawu usa sa manga purupita.” 29Nagpaingana siya sa kanda, “Nu sa kanyu waydi, hintay kanyu isip nu si unu aku?” Sinmagut si Pidru magkun, “Kawu duy ti Pinili Diyus Manugribri pag Hari.#8:29 Pinili Diyus Manugribri pag Hari: sa Giriyigu, Kiristu.” 30Bag-u mahigpit pag binilinan niya sida danga pagsabiha una sa kantapu tungkul sa kanya.

Pinat-ama ni Hisus Kay Kamatayan Aban

(Mat. 16:21-28; Lukas 9:22-27)

31Siyun ginan nag-umpisa magtudlu si Hisus sa kay manga tuludluan magkun, ti Anak tawu kailangan mag-agwanta mayamu pag kakurian. Dayuun siya aban manga paggurangunun manga Hudiyu, manga pangulu manughandug hanggan manga manugtudlu Kasuguan bag-u kanda ipamatay siya. Dapat ay pagka lawuy yi tulu ka sirang, mabuhi maan siya uman. 32Kay yi gid itinapat pag bagaw. Bag-u magkun si Pidru sa kanya, “Abala dapu duy kawu.” Bag-u sinungyaw niya si Hisus. 33Dapat ay napasrangu si Hisus sa kay manga tuludluan bag-u sinungyaw niya si Pidru magkun, “Pagpakarayu yi kawu, Satanas, danga yi kawu sa kang aday-an. Ti kanmu pag-isipun bukun angay sa Diyus nu unman angay lang sa tawu.”

34Ipinakarani niya sa kanya ti manga tawu hanggan kay manga tuludluan bag-u sinabi niya sa kanda, “Nu may tawu magkaibug magkuyug sa kangku, paglimti niya ti angay sa kay sadili, pas-ana kay kurus bag-u pagkuyug sa kangku. 35Dahil ti tawu nu magkaibug magpakalawig kay kinabuhi, maduraan ngap siya buhi. Dapat ay una hintay pag tawu ti nabul-an kay kinabuhi dahil sa Mayad pag Barita, ribri yi siya. 36Hintay ti makinabangan tawu una maapu niya ti bilug kalibutan nu kay kinabuhi ti kabaydanan? 37Hintay ti ibayad tawu hampay bawiun maan niya kay buhi? 38Dahil una hintay pag tawu sa manga uragin ag manga makasalanan pag tawu sa babaw daga nu ipaulam kay nagkilala sa kangku hanggan sa kang bagaw, ipaulam diman waydi Anak Tawu kay nagkilala sa kanya nu rumas-ug siya aban may mamaski pag kapangyarihan niya Ama, kaibahan niya ti manga banal pag anghil Diyus.”

Currently Selected:

Markus 8: HNN

Highlight

Copy

Compare