Markus 7

Ti Patayak Layi Kaumputan

(Mat. 15:1-9)

1May nagluwang tag sa kan Hisus manga Parisiyu hanggan manga manugtudlu Kasuguan ginan sa Hirusalim. 2Nakitan nida kay iba manga tuludluan ni Hisus magkaun yi una unman dapu inugasan nida kanda kamang. 3Ti manga Hudiyu lalu ti manga Parisiyu pag Hudiyu, balaw kadaka sida magkaun nu unman mangugas dapu kanda manga kamang angay sa ibinilin nida manga kaumputan. 4Unman diman sida mangaun una hintay pag karan-unun kanda binili sa palingki nu unman waya maugasan kanda kamang. Aduk waya pag manga turun-anun kanda minana sa kanda manga ginurang, halimbawa tungkul nu kabitay kailangan lumpiyuhun nida kanda manga irinman, manga garapun hanggan kanda kardiru galang.

5Nakan nagpaingana ti manga Parisiyu hanggan manga manugtudlu Kasuguan sa kan Hisus magkun, “Hayga unman pagtupadun nimu manga tuludluan ti patayak layi nita manga kaumputan? Hayga sida kadaka magkaun, unman nakaugas dapu kanda manga kamang?” 6Nagsagut si Hisus magkun, “Kamu magpabalhinguun lang. Bukun ngap salan ti ipinurupita ni Isayas tungkul sa kanyu, angay sa isinurat sa Banal Kasuratan. Magkun ti Diyus,

‘Inda pag nasyun tugka lang sa bagaw kanda maggalang

sa kangku, kanda bay tagipusuun arayu di sa kangku.

7Kanda magsamba sa kangku unman may kabuluhan,

dahil ti bilin tawu kanda pag-itudlu bilin Diyus kunu.’#7:7 Bantayi diman ti Isa. 29:13.

8Dinayu niyu kay bilin Diyus bag-u kanyu ngap pagsundan ti patayak layi tawu.”

9Bag-u sinabi waya ni Hisus sa kanda magkun, “Madunung maaw kamu. Dinayu niyu kay bilin Diyus hampay kanyu tupadun ti patayak layi tawu. 10Nangus sinabi ni Muysis magkun, ‘Galangun nimu kanmu ama kanmu ina,’#7:10 Bantayi diman ti Pag. 20:12; Diyut. 5:16. ag ‘Tigmuransa sa kay manga ina manga ama kailangan matyun gid.’#7:10 Bantayi diman ti Pag. 21:17; Lib. 20:9. 11Dapat ay kanyu ngap pagsabihun, nu may tawu magkun sa kay ama sa kay ina, ‘Una hintay ti iawat mana niku sa kanyu kurban yi, kay ibug sabihun kang yi ipinakaun sa Diyus’, 12udyi niyu pagpahintulutan siya mag-awat waya sa kay ama hanggan sa kay ina. 13Udyi pagpahalgaan niyu ti Bagaw Diyus dahil sa kanyu minana patayak layi. Mayamu waya kanyu buwat parihu sa katida.”

Ti manga Magpauring sa Tawu sa kay Magbantay Diyus

(Mat. 15:10-20)

14Ipinakarani ni Hisus ti kayamuan sa kanya bag-u sinabi niya sa kanda, “Pagpatingi kamu tanan-tanan, intindiha kang pagsabihun sa kanyu. 15Balaw ti pag-isubu sa bibig tawu ti makapauring sa kanya sa magbantay Diyus. Bagkus ngap tigluwang ginan sa kay bibig imaw tigpauring sa kanya. 16Ti may tuli kailangan pagpatingi.”

17Pagka tinayakan niya ti manga tawu, nagsaka siya sa balay bag-u pinaingana siya niya tuludluan tungkul sa pahalimbawa. 18Sinabi niya sa kanda, “Kamu hanggan aw lugud unman waya may intindi? Unman aw niyu alam una hintay ti pag-isubu sa bibig tawu ginan sa luwas unman makahimu magpauring sa kanya sa kay magbantay Diyus. 19Dahil unman magsulud sa kay tagipusuun nu unman sa kay tiyan bag-u ipag-ugat.” Kay ibug sabihun unman may karan-unun makapauring sa tawu sa kay magbantay Diyus. 20Sinabi ni Hisus, “Ti magluwang ginan sa tawu imaw tigpauring sa kanya. 21Dahil ginan sa tagipusuun tawu pag magluwang ti manga daut pag naisipan, ti mag-uragin, ti magtakaw, ti maglibun sa kaparihu tawu, 22ti magpamabayi, ti magpanlalaki, ti maghirak, ti manga kadautan, ti magdaya, ti pasay daut pag kagustuhan, ti daut pag naisipan ginan sa kahirakan, ti manga magmuransa, ti palabi-labihun, ti kalukuhan. 23Ti tanan pag manga kadautan tunda ginan sa tagipusuun tawu imaw tigpauring ngani sa kanya sa kay magbantay Diyus.”

Ti Babayi Daka kay Sarig

(Mat. 15:21-28)

24Nighit si Hisus ati ginan, nag-atag siya sa manga daga sa kay manga kalibut banwa Tiru. Nagdayun siya sa usa ka balay ati. Kay gustu mana danga maalaman manga tawu siya rinmas-ug. Dapat balaw makapatagu siya. 25Ati may usa ka babayi kay diit anak babayi inapuan labang. Pagka nabaritaan niya, kadaka nagpakarani ag yinmuk-ub sa kay atubangan ni Hisus. 26Tunda pag babayi Giriyigu, taga Syria-Pinisya kay ginurang. Nagpakihampang siya sa kan Hisus hampay ipalwas niya ti labang ginan sa kay anak. 27Dapat sinabi ni Hisus sa kanya magkun, “Pabay-ani nimu dapu ti manga anak hampay mabsug. Unman kailangan bul-un ti karan-unun manga anak bag-u ibahug sa manga idu.” 28Dapat ay nagsagut ti babayi magkun, “Ungud gid duy dapat una manga idu magkaun diman manga rukruk nalagpak sa magkaun manga anak.” 29Magkun si Hisus sa kanya, “Dahil sa kanmu sinabi inda, mahimu kawu pag-uli yi. Nighit yi duy ti labang ginan sa kanmu anak.” 30Nuli ngani ti babayi. Pagka nagras-ug siya sa kay balay, maigyaan ti anak sa kay amak. Linmuwas yi ngani ti labang.

Nagpaayad si Hisus sa Tawu Bungul ag Buyun waya

31Nighit si Hisus maan ginan sa kalibut banwa Tiru, sinarak niya ti banwa Sidun, linakawan niya ti daga Dikapulis bag-u nag-atag siya sa danaw Galiliya. 32Dinara nida tag sa kan Hisus usa ka lalaki bungul ag buyun waya. Nagpakihampang sida sa kan Hisus hampay kup-an niya kamang ti may dahilan. 33Tinaban siya ni Hisus tag sa luwas kayamuan. Itinumbak ni Hisus kay ituturu sa baliw-baliw tuli tawu. Pagka nakabuga si Hisus, bag-u inigpilan niya kay dila tawu dahil bungul ag buyun waya siya. 34Pagka nagtangda si Hisus sa langit, naghangus siya bag-u sinabi niya, “Ipata”, kay ibug sabihun pagmabukasan. 35Bag-u nakadnug yi kay tuli, udyi siya buyun, makabagaw yi mayad. 36Kay sinabi ni Hisus sa manga tawu danga pagsabiha nida una sa kantapu. Dapat madi abinandu niya sa kanda, lalu ngap itinultul nida sa manga iba. 37Masyadu yi gid sida magkadulaw magkun, “Kay pagkaayad tanan kay binwat niya. Magpaayad siya sa manga bungul, magpaayad waydi sa manga buyun.”

Currently Selected:

Markus 7: HNN

Highlight

Copy

Compare