Markus 6

Unman Tinanggap si Hisus manga Taga Nasarit

(Mat. 13:53-58; Lukas 4:16-30)

1Nighit si Hisus siyun ginan nag-atag sa kay kinadak-anan pag banwa. Nagkuyug diman sa kanya kay manga tuludluan. 2Pagka Sirang Pamahari yi nanudlu siya sa simbahan manga Hudiyu. Mayamu tawu nagpatingi sa kanya. Naglingut gid sida magkun, “Naan ginan pag bin-ul niya inda pag kapangyarihan? Hintay pag kalasi kadunungan inda ti ipinakaun sa kanya? Kabitay kay magbuwat pag makamaskihan buwat inda? 3Unman aw siya ti manugpanday, kay anak ni Mariya, ag patar-ari nida ni Santiyagu, ni Husi, ni Hudas ag ni Simun? Ag unman aw sitay sa kanta diman kay manga patar-ari babayi?” Nag-alinlangan yi ti manga tawu sa kanya. 4Nakan sinabi ni Hisus sa kanda magkun, “Ti purupita paggalangun di purya lang sa kay sadili banwa, sa kay manga katawuhan niya ag sa kay sadili balay.” 5Unman siya nakahimu nakabuwat ati una hintay pag makamaskihan buwat. Kinup-an lang niya kamang ti iba ti may manga sakit kay pinaayad. 6Naglingut siya sa kanda dahil unman sida may sarig.

Inatihan ni Hisus ti manga baryu sa kay kalibut hampay manudlu sa manga tawu.

Sinugu ni Hisus kay Sampulu may Duwa ka Tuludluan

(Mat. 10:1,5-15; Lukas 9:1-6)

7Tinipun ni Hisus kay sampulu may duwa ka tuludluan bag-u kay sinugu niya sida tigudwa tigudwa ag pinakan-an niya sida kamaskihan laban sa manga labang. 8Bag-u binilinan niya sida magkun, danga sida magbalun una lang hintay sa kanda maglakaw, una karan-unun, una bay-ung, una kuwarta sa kanda hagkus. Pagmay dara lang sugkud. 9Pagmay lapak dapat danga magsulung duwa ka balukas. 10Sinabi niya sa kanda, “Una naan pag balay kamu pag sumaka, siyun yi waydi kamu pag kidayun hanggan sa udwaya kamu umighit siti ginan pag banwa. 11Ag una naan pag banwa nu dayu kamu tanggapun hanggan patingihan, pag-ighit yi kamu siyun ginan, pagpaga ti galbuk ginan sa kanyu raprapa bilang paandam sa kanda magdayu sa Diyus.” 12Pagka nakatapus yi kan Hisus bilin sa kay manga tuludluan, linmakaw yi sida, itinudlu nida sa manga tawu pagpatawad sida sa kanda manga kasalanan. 13Mayamu pag labang kanda apinaluwas ginan sa manga tawu, ti mayamu pag may manga sakit kanda pinayidan lana, pinaayad sida.

Kay Kamatayan ni Huwan Manugtulbaw

(Mat. 14:1-12; Lukas 9:7-9)

14Nakaras-ug waydi sa kan Hari Hirudis ti barita tungkul sa kan Hisus, dahil nibantug kay ngaran niya. Magkun ti manga tawu, “Si Huwan Manugtulbaw tunda. Binuhi siya uman, nakan may kamaskihan siya magbuwat manga makadululaw.” 15Magkun ti manga iba, “Si Ilyas yi tunda.” Magkun maan ti manga iba, “Siya usa ka purupita parihu sa manga purupita kaybi.”

16Pagka naalaman ni Hirudis sinabi niya magkun, “Ipinaplud niku kay liug ni Huwan, siya maaw nabuhi uman.” 17Si Hirudis ngani ti nagpadakup, nagpagapus ag nagpapirisu sa kan Huwan, dahil sa kan Hirudiyas, kay asawa ni Pilipi kan Hirudis patar-ari. Inagaw nakan ni Hirudis si Hirudiyas ginan sa kan Pilipi. 18Magkun si Huwan sa kan Hirudis, “Unman mahimu umagaw kawu sa asawa nimu patar-ari.” 19Itinuduk kay galit ni Hirudiyas ag gustu mana niya matyun si Huwan dapat unman niya mabuwat. 20Dahil magkadala si Hirudis sa kan Huwan. Alam yi waydi niya si Huwan lalaki matadlung ag lubus sakup sa Diyus. Nakan pinabantayan niya si Huwan. Magbaya magpatingi si Hirudis sa manga bagaw ni Huwan una magkatalinduwa kay isip.

21Pagka dugay nakakit waydi si Hirudiyas kay paraan. Ati katpung pag-alalahanun ni Hirudis kay kapanganakan. Nagbuwat si Hirudis karan-an sa kay nasakupan may katungkulan, sa manga manugmandar sundalu ag sa may manga kangaranan sa Galiliya. 22Nagsiyun waydi kay anak babayi ni Hirudiyas ag nagsayaw. Pagka siya nagsayaw, binaya gid siya ni Hirudis hanggan niya manga kasaru. Nakan sinabi hari sa daraga, “Hagada nimu sa kangku una hintay ti magustuhan nimu ag ipakaun niku sa kanmu.” 23Sinmumpa waya sa kay magtaratu magkun, “Una hintay kanmu hagadun ipakaun niku sa kanmu, una kang katunga kaharian.” 24Nagluwas ti daraga nagsabi sa kay ina magkun, “Hintay nguna kang hagadun?” Sinabi niya ina, “Kay ulu ni Huwan Manugtulbaw.” 25Madali maan pag nagpakarani ti anak sa hari bag-u sinabi niya kay pagkaibgan magkun, “Gustu niku taynguna yi kanmu ipakaun sa kangku kan Huwan Manugtulbaw ulu sa basad pinggan.” 26Nagruku gid ti hari. Dapat dahil kay sumpa nadnugan niya manga bisita, dayu waydi siya umirang. 27Sinugu hari ti usa sa kay manga bantay pag sundalu kay sinabi magkun, “Daran-a sitay tag kay ulu ni Huwan.” Bag-u nag-ati ti sundalu, pinlud niya kay liug ni Huwan sa pirisuhan. 28Bag-u dinara niya ti ulu sa basad pinggan, kay ipinakaun sa daraga bag-u ipinakaun maan daraga sa kay ina. 29Pagka nabaritaan manga tuludluan ni Huwan ti nangyari, nag-ati sida, bin-ul nida ti bangkay ag kanda ipinauli sa tinaguktukan batu.

Pinakan-an Karan-unun ti Lima ka Libu Tawu

(Mat. 14:13-21; Lukas 9:10-17; Hu. 6:1-14)

30Pagka nuli maan kay manga apustul ni Hisus, itinultul nida sa kanya ti tanan nida binwat ag itinudlu. 31Bag-u sinabi niya sa kanda, “Atag yi duy kita sa pangawakawaan. Pagpahari dapu kamu.” Dahil mayamu tawu tigsaka tigdugsun ag unman sida makahimu kaun. 32Nagsakay sida ni Hisus sa duunduun atag sa pangawakawaan tawu. 33Dapat ay sa kanda magginan nakitan ag nakilala sida mayamu tawu. Nakan nag-atag waydi ti manga tawu ginan sa tanan manga banwa naglakaw madali napaagap man sa kanda ni Hisus. 34Pagka nagdugsun si Hisus ginan sa duunduun, nakitan niya ti lalu mayamu tawu. Naawa gid siya sa kanda, dahil sida parihu ga manga karanidu unman may manug-alaga. Bag-u mayamu maan kay itinudlu ni Hisus sa kanda. 35Pagka magkayabi yi napakarani sa kanya kay manga tuludluan magkun, “Pangawakawaan duy inda pag rugar ag magkayabi yi. 36Suguun duy nimu ti manga tawu atag sa manga tawu balay ag sa manga baryu sa palibut hampay makabili sida kanda makaun.” 37Dapat nagsagut siya magkun, “Kamu yi ngap duy ti pagpakaun karan-unun sa kanda.” Sinabi nida sa kanya, “Parihu sa walu ka bulan upa ti magastus hampay ipakaun sa kanda!” 38Sinabi niya sa kanda, “Pira ka bilug kanyu tinapay? Duawi dapu niyu nu pira.” Pagka dinuawan nida magkun sida, “Lima duy ka bilug ag duwa ka isda.”

39Bag-u binilinan niya kay manga tuludluan magkun, “Sabiha sa manga tawu pagtukaw sida tanan puru-puruun sa babaw ilamnun.” 40Tinmukaw ngani ti manga tawu pinuru-puru tigus-a ka gatus, may tiglimampulu. 41Bag-u bin-ul ni Hisus ti lima ka tinapay hanggan ti duwa ka isda. Nagtangda siya sa langit, nagpasalamat sa Diyus bag-u pinikapika niya ti manga tinapay bag-u ipinakaun niya sa kay manga tuludluan hampay ihayin nida sa manga tawu. Hinuray-huray niya ti duwa ka isda sa kanda tanan. 42Nagkaun sida tanan-tanan ag nangabsug. 43Bag-u tinipun maan manga tuludluan ti nasawad manga pinikapika tinapay sampulu may duwa ka luwak punu hanggan ti nasawad sa manga isda. 44Lima ka libu ka lalaki ti nagkaun bukud waya ti manga babayi ag manga anak.

Naglakaw si Hisus sa Babaw Danum

(Mat. 14:22-33; Hu. 6:15-21)

45Kadaka ipinasakay ni Hisus kay manga tuludluan sa duunduun ag ipinauna yi tag sa baliw dipay danaw, tag sa Bitsayda. Bag-u pinauli niya ti kadamlan tawu. 46Pagka pinauli niya ti manga tawu, nag-ati siya sa bantud hampay mandarangin. 47Pagka yabi yi, ti duunduun sa karaw-an danaw ag si Hisus usa-usa wadi ati sa bantud. 48Pagka tag yi magkasurip, nakitan niya sida purus yi gid sa pagbugsay dahil pagsarungsungun sida durus. Bag-u sida inusig ni Hisus lakaw sa babaw danum. Lumawuy yi mana siya sa kanda. 49Dapat ay pagka nakitan nida siya maglakaw sa babaw danum, kanda hantup mamaw, nanwarawawan sida. 50Nagkaradala gid sida igu nakitan siya. Dapat ay kadaka nagbagaw siya sa kanda magkun, “Pagmatutum kanyu naisipan, aku ngani inda. Danga kamu magkadala.” 51Nagsakay siya sa duunduun napaminsan sa kanda. Bag-u naghubung yi ti durus. Masyadu yi gid sida nadulaw. 52Dahil udwaya waydi nida naintindihan ti nangyari sa manga tinapay, udwaya nidna sa kanda manga tagipusuun.

Pinaayad ni Hisus ti may manga Sakit sa Daga Ginisarit

(Mat. 14:34-36)

53Pagka nakadipay yi sida sa danaw, nagras-ug sida sa daga Ginisarit. Ipinadagsa nida ti duunduun sa baybay. 54Pagka nagdugsun sida sa duunduun, nakilala yi si Hisus manga tawu. 55Susun yi ibinarita nida sa manga tawu sa kanda kalibut pag manga rugar kay pagras-ug ni Hisus. Bag-u dinara nida atag sa kanya ti may manga sakit maigyaan sa amak, una naan tag nu magkaalaman nida siyun siya. 56Una naan tag kay lakaw ni Hisus, una atag sa manga baryu, una atag sa manga banwa, una sa manga kalatkalat pag manga balay, ibinugtang nida sa sugkadan balay ti may manga sakit, nagpakihampang sida sa kanya hampay makaigpil lang sa sidsid niya balukas sadsad. Ti tanan nakaigpil naayadan yi ngani.

Currently Selected:

Markus 6: HNN

Highlight

Copy

Compare