Matiyu 5
5
Kay Tudlu ni Hisus
(Lukas 6:20-23)
1Pagka nakitan ni Hisus ti kadamlan tawu, nag-atag siya sa bungtud. Siyun pag tinmukaw siya bag-u nagpakarani sa kanya kay manga tuludluan. 2Bag-u tinudluan niya sida magkun,
3“Papaladan Diyus ti manga tawu nu udyi may pagsarigan sa kanda sadili,
dahil sa kanda ti kaharian langit.
4Papaladan Diyus ti manga may karukuan,
dahil sida pakan-an di niya kabayaan.
5Papaladan Diyus ti magpanagunsirung,
dahil maapu nida ti kalibutan.
6Papaladan Diyus ti tawu nu ga magkalun-us
ag magkauwaw kay magpatigagad makatupad sa kagustuhan Diyus,
dahil ipakaun sa kanda ti kanda paggagadun.
7Papaladan Diyus ti manga maawaun,
dahil sida aban ti kaawaan Diyus.
8Papaladan Diyus ti manga malumpiyu kay tagipusuun,
dahil makitan nida aban ti Diyus.
9Papaladan Diyus ti manga tawu madunung magpanab-anan sa mayad pag kasunduan,
dahil sida ingarnan gid manga anak Diyus.
10Papaladan Diyus ti manga tawu pag-unuunuhun dahil sa kanda pagtupad sa kagustuhan Diyus,
dahil sa kanda ti kaharian langit.
11“Papaladan kamu Diyus nu pagmuransahun una hanggan pag-unuunuhun, una pagbagawan kamu una lang hintay pag daut pasay kapudilan dahil sa kanyu magpasakup sa kangku.
12“Pagbaya gid ungud kamu pagmasulung kanyu naisipan, daka nakan kay pirimyu aban sa kanyu ati sa langit. Dahil katunda diman waydi kanda nag-unuunu kaybi sa manga purupita, sa manga un-an man sa kanyu.”
Ti Asin ag ti Sulu
(Mk. 9:50; Lukas 14:34-35)
13“Kamu manga suruguun niku, ti ga asin sa kalibutan. Dapat ti asin nu tumab-ang, udyi may paraan hampay bumalik maan kay pagkamaasin. Udyi gid may kabuluhan tunda nu unman iyamut yi lang ag tat-an manga tawu.
14“Kamu ti ga sulu sa kalibutan. Ti banwa nu nikana sa babaw bantud balaw mitagu. 15Unman may nagsulu sulul-an bag-u ipauli sa sirung salupan, nu unman sa kay gid palaulian sulul-an hampay marayawan ti tanan tawu sa sulud balay. 16Katunda diman waydi iparayaw niyu kanyu sulu sa atubangan tanan tawu hampay makitan nida kanyu manga mayad buwat bag-u kanda dayawun kanyu Ama sa langit.”
Tungkul sa Kasuguan
17Magkun si Hisus, “Danga isipun niyu aku nagsitay hampay bul-un niku ti Kasuguan ni Muysis, una ti tudlu manga Kasuratan Purupita. Balaw aku nagsitay hampay bul-an halaga niku tunda, bagkus ngap hampay kang tupadun. 18Ungud duy kang pagsabihun sa kanyu, madura di ti langit hanggan ti daga, dapat una lang usa ka pinakadiit pag bahagi Kasuguan ud madura hanggan sa ud matupad ti tanan-tanan manga isinurat siti.#5:18 hanggan sa ud matupad ti tanan-tanan manga isinurat siti: Mahimu kay ibug sabihun, hanggan sa ud matupad ti tanan sinabi sa Kasuguan; ngatay, hanggan sa ud matupad ti tanan magpangyari sa aratubangun. 19Nakan una si unu ti magpasipala sa una lang diit pag sugu inda, bag-u nu magtudlu waya siya magkun dag paniwala sa sugu, kilalan-un siya pinakaababa sa kaharian langit. Dapat una si unu ti magtupad sa Kasuguan bag-u kay pag-itudlu sa manga tawu, siya ingarnan mahalaga pag tawu nu sa kaharian langit. 20Nakan kang pagsabihun sa kanyu, nu balaw niyu mahigitan ti pagtupad manga manugtudlu Kasuguan hanggan manga Parisiyu, dayu kamu makapasakup sa kaharian langit.”
Tungkul sa Pangagalit
21Magkun si Hisus, “Nadnugan yi niyu ti ibinilin sa kanta manga ginurang magkun, ‘Danga kawu maglibun sa kanmu kaparihu. Una si unu ti maglibun sa kay kaparihu, parusahan.’ 22Dapat kang pagsabihun sa kanyu, ti kada magkutub daut sa kay patar-ari, parusahan diman. Una si unu ti magpuya sa kay patar-ari, daka kay saragtun sa atubangan Katipunan manga Pinunu. Una si unu ti magsabi sa kay patar-ari, ‘Buang kawu’ iyamut gid siya sa impirnu. 23Nakan ngani nu magtibu kawu kanmu handug sa Diyus tag sa harandugan bag-u maalaala nimu may daut naisipan kanmu patar-ari sa kanmu, 24tayaki dapu nimu kanmu handug sa arani harandugan sa Diyus, pag-ati dapu sa kanmu patar-ari pagpakihampang sa kanya. Bag-u pagbalik maan kawu, bag-u di maghandug sa Diyus.
25“Nu may magdimanda laban sa kanmu sa atubangan husgadu, paghurusayan dapu kamu mintaras may rugar waya hanggan sa udwaya nakaaput sa husgadu. Nu bay unman maghurusayan kamu, ipabahala kawu sa husgadu. Siya tig-intirga maan sa kanmu sa guwardiya ag kawu ipapirisu. 26Ungud duy kang pagsabihun sa kanyu, dayi kawu makaluwang ati ginan hanggan sa udwaya mabayadan nimu kay multa.”
Tungkul sa Mag-uragin
27Magkun si Hisus, “Nadnugan niyu may ibinilin sa manga tawu kaybi magkun, ‘Danga kawu mag-uragin.’#5:27 Bantayi diman ti Pag. 20:14; Diyut. 5:18. 28Dapat pagsabihun niku sa kanyu, ti kada magsinuk sa usa ka babayi may tapil yi ibug, nagkasala yi ngap siya nag-uragin yi sa kay tagipusuun. 29Nu kanmu sikun mata ti magpatalang sa kanmu naisipan atag sa kasalanan, luwata nimu bag-u yamtan. Dahil mayad waya ti madura kanmu usa ka gamit bilug, danga lang ngap kanmu buu bilug ti miyamut sa impirnu. 30Nu kanmu sikun kamang waydi ti magpatalang sa kanmu tag sa kasalanan, pulda yi lang bag-u yamtan. Dahil mayad waya ti madura kanmu usa ka gamit bilug, danga lang kanmu buu bilug ti miyamut sa impirnu.”
Tungkul sa Magtarayakan
(Mat. 19:9; Mk. 10:11-12; Lukas 16:18)
31Magkun si Hisus, “May ibinilin diman waydi magkun, ‘Nu pagtulakun yi lalaki kay asawa, kailangan pakan-an kasuratan ti babayi tungkul sa kanda magtarayakan.’#5:31 Bantayi diman ti Diyut. 24:1. 32Dapat ay kang gid pagsabihun sa kanyu, nu tinulak niya kay asawa babayi balaw waydi ginan sa panlalaki, itinulak niya kay asawa tag ngap sa panguragin nu umasawa maan uman sa iba. Ag una si unu ti umasawa sa tunda pag babayi ginan yi sa asawahan, tunda pag lalaki nagkasala sa magpanguragin.”
Tungkul sa Magsumpa
33Magkun si Hisus, “Kanyu diman waydi nadnugan may ibinilin kaybi sa manga ginurang magkun, ‘Nu ti tawu nagsumpa sa ngaran Panginuun, kailangan tupadun niya inda.’#5:33 Bantayi diman ti Lib. 19:12; Bil. 30:2; Diyut. 23:21. 34Dapat ay kang gid pagsabihun sa kanyu, danga yi lang kamu magsumpa nu magtaratu. Danga paghinangbita ti langit, dahil imaw ti ulian Diyus. 35Danga paghinangbita ti daga, dahil imaw ti tarat-an niya manga lulud. Danga waydi paghinangbita ti Hirusalim, dahil imaw ti banwa makapangyarihan pag Hari. 36Danga waydi pagsabiha magkun, ‘Matay waya’, dahil una lang usa ka buhuk sa kanmu ulu balaw kawu pumalagti ngatay pumabiru. 37Dapat ay kang-ud yi ti sabihun nimu ‘Hu ngani’ nu hu. Sabihun nimu ‘Unman’ nu unman waydi. Ti lumabis siti ginan yi gid sa kan Satanas pag kadautan.”
Tungkul sa Magganti
(Lukas 6:29-30)
38Magkun si Hisus, “Nadnugan niyu may ibinilin magkun, ‘Nu mata, kay balus mata waydi. Nu ngipun, kay balus ngipun waydi.’#5:38 Bantayi diman ti Pag. 21:24; Lib. 24:20; Diyut. 19:21. 39Dapat kainda kang pagsabihun sa kanyu, danga niyu paggantihi ti daut pag tawu. Nu sampalun tawu kanmu sikun pingi, iatubang maan nimu kay baliw pingi. 40Nu kawu ipaatubang tawu sa husgadu hampay mab-ul niya kanmu balukas, ipakaun yi lang nimu hanggan kanmu kulimpay. 41Nu pagpilitun kawu sundalu kuntay pas-ana yi nimu kay dara tugka sa usa ka kilumitru, pas-ana waya gid nimu tugka ngap duwa ka kilumitru. 42Nu may manhagad sa kanmu, pagpakan-i nimu. Nu may mag-udam sa kanmu, danga pag-irangi.”
Mahala Niyu Kanyu Kalaban
(Lukas 6:27-28; 6:32-36)
43Magkun si Hisus, “Nadnugan yi niyu may ibinilin magkun, ‘Mahala nimu kanmu pagbayaun pag tawu ag kagalitan nimu kanmu kalaban.’ 44Dapat kainda maan kang pagsabihun, mahalun niyu kanyu manga kalaban, idarangin gid niyu ti mag-unuunu sa kanyu, 45hampay kamu tutuu gid manga anak niyu Ama sa langit. Dahil pag-ipabutlak niya ti init sa daut ag sa manga mayad. Balaw lang ti manga matadlung ti pagpakan-an uran nu unman hanggan ti manga makasalanan. 46Nu madunung kamu magmahal sa manga magmahal lang waydi sa kanyu, hintay waya pag pirimyu kanyu matanggap? Unman aw katida diman ti pagbuwatun manga manunukut buhis? 47Nu ti magtar-arian lang tigparaingan-an, hintay ti nabuwat niyu balaw lang ga iba? Una ti manga unman magsarig sa Diyus magbuwat diman katida. 48Nakan ngani kailangan ilubus niyu kanyu kaayadan parihu sa kanyu Ama sa langit.”
Copyright © 2023 by OMF International, Philippines