Matiyu 4
4
Pagtuksuhun mana si Hisus
(Mk. 1:12-13; Lukas 4:1-13)
1Bag-u dinara Ispiritu Banal si Hisus atabug sa pangawakawaan hampay tuksuhun siya diyablu. 2Unman siya naghandum karan-unun sa sulud upatpulu ka sirang may upatpulu ka yabi. Pagka lawuy upatpulu ka sirang linun-us siya. 3Nagpakarani yi ti manugtuksu, magkun sa kan Hisus, “Nu kawu ungud ti Anak Diyus, bagawi tunda pag manga batu hampay bumaliw tinapay.” 4Dapat sinmagut si Hisus magkun, “Isinurat sa Banal Kasuratan magkun, ‘Balaw lang sa karan-unun pag mabuhi ti tawu nu unman sa kada bagaw Diyus.’#4:4 Bantayi diman ti Diyut. 8:3.”
5Bag-u tinaban siya diyablu tag sa Hirusalim sa banal pag banwa,#4:5 banal pag banwa: Bantayi ti Listahan manga Bagaw sa dayu. ati sa pinakaabwat pag bahagi Balay Diyus. 6Ag magkun siya sa kan Hisus, “Nu kawu ti Anak Diyus, palagpak kawu atag sa sirung. Dahil nisurat sa Banal Kasuratan magkun, ‘Bilinan Diyus kay manga anghil hampay alagaan kawu. Sambutun nida kawu hampay balaw madayaan kanmu lulud sa batu.’#4:6 Bantayi diman ti Kanta 91:11,12.”
7Sinabi maan ni Hisus sa kanya, “Nisurat diman sa Banal Kasuratan magkun, ‘Danga pagsubuki nimu ti Diyus imaw kanmu Panginuun.’ ”#4:7 Bantayi diman ti Diyut. 6:16.
8Tinaban maan siya diyablu tag sa usa ka bantud abwat gid, pinausdung siya nakitan niya ti tanan manga kaharian sa babaw daga hanggan kanda kadayawan. 9Sinabi diyablu sa kan Hisus, “Ti tanan tunda kanmu nakitan kang ipakaun sa kanmu, nu kawu lumuhud sumamba sa kangku.” 10Bag-u sinabi ni Hisus sa kanya, “Pagpakarayu kawu, Satanas, dahil nisurat sa Banal Kasuratan, ‘Sambahun nimu ti Diyus imaw kanmu Panginuun. Siya lang kanmu sirbihan.’ ”#4:10 Bantayi diman ti Diyut. 6:13.
11Bag-u tinayakan diyablu si Hisus bag-u nagras-ug ti manga anghil kanda inalagaan siya.
Nag-umpisa si Hisus Kay Buruwatun sa Galiliya
(Mk. 1:14-15; Lukas 4:14-15)
12Pagka nadnugan ni Hisus si Huwan dinakup yi, nag-ati siya sa Galiliya. 13Nighit siya ginan sa Nasarit bag-u nag-ati sa banwa Kapirnaum ag ati pag nangulian. Inda pag banwa sa saruy danaw Galiliya, sakup daga Sabulun hanggan Niptali. 14Nangyari tunda hampay matupad ti bagaw ipinadakit ni Purupita Isayas magkun,
15“Ti daga Sabulun hanggan ti daga Niptali lalawyan atabug sa danaw, ati waya inda baliwa sa dipay Hurdan.
Inda pag manga rugar sakup Galiliya ulian manga balaw Hudiyu.
16Ti manga tawu nitukmud sa basad kaduluman may makitan aban daka pag rayaw.
Ti manga tawu sa sirung kapangyarihan kamatayan pakan-an ngap karayawan.”#4:16 Bantayi diman ti Isa. 9:1,2.
17Siyun ginan nag-umpisa yi si Hisus magtudlu. Magkun siya, “Iampu yi niyu kanyu manga kasalanan, dahil arani yi#4:17 arani yi: ngatay, rinmas-ug yi. ti kaharian langit.”
Pinili ni Hisus ti Upat ka Manug-isda hampay Kay Tuludluan
(Mk. 1:16-20; Lukas 5:1-11)
18Sa kay maglakaw sa saruy danaw Galiliya, nakitan ni Hisus si Simun, imaw ti pagkumnun si Pidru, hanggan kay patar-ari si Andiris. Manug-isda sida. Pag-itaplak nida kanda sarap sa danaw. 19Sinabi niya sa kanda, “Pagkuyug kamu sa kangku bag-u buwatun niku kamu manugtaban sa tawu.”#4:19 manugtaban sa tawu: sa litiral, mangisda sa tawu. 20Kadaka kanda tinayakan kanda manga sarap bag-u nagkuyug ngani sida sa kanya.
21Sa kay maglakaw maan ni Hisus, nakitan niya ti duwa waya ka magtar-ari, si Santiyagu hanggan si Huwan kan Sibidiyu manga anak. Sa duunduun sida kaibahan kanda ama si Sibidiyu, pagputikan nida kanda manga sarap. Tinawagan waydi ni Hisus sida. 22Kadaka tinayakan nida kanda duunduun hanggan kanda ama bag-u kinmuyug sida sa kan Hisus.
Kay manga Buruwatun ni Hisus
(Lukas 6:17-19)
23Pinalibut ni Hisus ti buu daga Galiliya, magtudlu siya sa manga simbahan manga Hudiyu. Magtultul siya Mayad pag Barita tungkul sa kay maghari Diyus. Magpaayad siya una hintay pag sakit manga tawu kanda mag-adnugan sa kanda ginhawa. 24Pagka ilinantag ti barita tungkul sa kanya sa buu daga Sirya, dinara manga taga Sirya tag sa kanya ti tanan may manga mag-adnugan, ti manga magkakuri sa kanda manga sakit tuhay-tuhay hanggan ti inapuan manga labang, ti manga magkatigbak hanggan ti manga lunu bag-u kay pinaayad sida. 25May nagkuyug sa kanya lubus kagadhan tawu ginan sa Galiliya, ginan sa Dikapulis, ginan sa Hirusalim hanggan ginan sa Hudiya, hanggan ginan waya sa dipay sapa Hurdan.
Copyright © 2023 by OMF International, Philippines