Matiyu 6
6
Tungkul sa manga Magpakaun Kuwarta sa manga Makuri
1Magkun si Hisus, “Pag-ingat kamu, danga magpakakit-kakit lang sa atubangan manga tawu kanyu buwat mayad. Nu katunda kanyu buwat unman kamu may matanggap pirimyu ginan sa kanyu Ama sa langit.
2“Nakan ngani nu kamu mag-ayaw sa manga makuri danga niyu ipabantug tunda danga parihu sa pagbuwatun manga tawu magpabalhinguun kuntay mayad ati sa simbahan manga Hudiyu hanggan sa manga baklayan. Pagbuwatun nida tunda sa dayawun sida manga tawu. Ungud duy kang pagsabihun sa kanyu, natanggap yi nida kanda pirimyu. 3Dapat nu kawu mag-ayaw danga nimu ipamalay sa kanmu wala kamang ti pagbuwatun nimu sikun kamang, 4hampay unman maalaman kanmu nagpakaun. Gantihan kawu nimu Ama dahil siya ti nakakit sa kanmu buwat mayad unman ipinasulay nimu sa manga iba.”
Tungkul sa Magdarangin
(Lukas 11:2-4)
5Magkun si Hisus, “Nu magdarangin kamu, danga kamu maghuwad sa manga magpabalhinguun kuntay mayad. Maraibgun sida magdarangin matindugan sa manga simbahan manga Hudiyu una sa pagsangahan baklayan hampay makitan sida manga tawu. Ungud duy kang pagsabihun sa kanyu, natanggap yi nida kanda pirimyu. 6Dapat nu tabug mandarangin kamu, paslud kamu sa kanyu sulud-sulud, talakpan niyu kanyu sabian bag-u kamu mandarangin sa kanyu Ama, sa unman mag-akitan sa mata. Gantihan kamu niyu Ama, dahil siya ti nakakit sa kanyu buwat mayad unman ipinasulay niyu sa manga iba.
7“Nu magdarangin kamu danga kayamu pag bagaw unman may pulus, danga parihu sa ugali manga unman magsarig sa Diyus. Kanda isip barang patingihan sida Diyus dahil sa kayamuan nida pagbagawun imaw-imaw diman. 8Danga maghuwad sa kanda. Dahil daan alam yi niyu Ama kanyu pagkailanganun una udwaya hinagad niyu sa kanya. 9Kainda kamu nu magdarangin magkun,
‘Kanmi Ama sa langit,
mana dayawun manga tawu kanmu ngaran.
10Kawu mana ti maghari sitay sa babaw daga.
Mana tupadun kanmu kagustuhan sitay sa babaw daga parihu sa langit.
11Ipakaun nimu sa kanmi ti karan-unun
kanmi kailangan taynguna pag sirang.
12Patawada nimu kanmi manga kasalanan,
parihu sa kanmi magpatawad sa manga nagkasala sa kanmi.
13Danga ipalakaw nimu kami sa mahigpit pagsubuk,
dapat ingatan nimu kami sa May Puun Kadautan.
Dahil kawu yi ngani tig hari may kamaskihan hanggan kadayawan hanggan waya aban. Amin.’
14“Dahil nu kanyu pagpatawadun ti manga tawu nagkasala sa kanyu, patawadun diman waydi kamu niyu Ama sa langit. 15Dapat nu unman pagpatawadun niyu ti manga tawu nagkasala sa kanyu, dayu waydi kamu patawadun niyu Ama.”
Tungkul sa unman Maghandum Karan-unun
16Magkun si Hisus, “Nu kamu unman maghandum karan-unun, kanyu manga uyahun danga magmarukumaruku, danga kamu parihu sa manga magpabalhinguun kuntay mayad. Unman sida mag-ayus kanda sadili hampay makitan manga tawu sida unman maghandum karan-unun. Ungud duy kang pagsabihun sa kanyu, natanggap yi nida kanda pirimyu. 17Nu kawu unman maghandum karan-unun, paghigus dapu kanmu buhuk, pag-iram-us hanggan, 18hampay balaw mahantup manga tawu kawu unman maghandum karan-unun. Kanmu Ama lang ti unman mag-akitan nimu mata ti makaalam. Siya diman ti makakit sa mayad nimu buwat unman ipinasulay nimu sa manga iba, siya ti makabalus mayad sa kanmu.”
Ti Kayamanan sa Langit
(Lukas 12:33-34)
19Magkun si Hisus, “Danga kamu magtipun kanyu kayamanan sitay sa babaw daga. Sitay may magdaut manga talagkumang una manga tayan, may magsulud manga mananakaw. 20Ti mayad ngapu nu magtipun kamu kanyu kayamanan sa langit. Ati unman may magdaut manga talagkumang una manga tayan. Unman diman may magsulud manga mananakaw hampay magtakaw. 21Dahil nu naan kanmu kayamanan ati diman kanmu isip.”
Ti Sulu sa Kanta Bilug
(Lukas 11:34-36)
22Magkun si Hisus, “Kanmu mata ti pinagkasulu nimu bilug. Nakan ngani nu marayaw kanmu mata, marayawan ti buu nimu ginhawa. 23Dapat ay nu madlum kanmu mata, madulman ti buu nimu ginhawa. Nakan nu ti rayaw sa kanmu nagbaliw madulum, pingit yi pag dulum.”
Dayu Nita Masirbihan dungan ti Diyus hanggan ti Kayamanan
(Lukas 16:13; 12:22-34)
24Sinabi ni Hisus magkun, “Unman may makasirbi dungan sa duwa ka amu. Dahil dayuun niya ti usa, ti usa kay adiun. Sirbihan niya mayad ti usa ag pabay-anan lang kay usa. Dayu masirbihan niyu dungan ti Diyus hanggan ti kayamanan.
25“Nakan pagsabihun niku sa kanyu, danga kamu magkaarimputu tungkul sa karan-unun ag sa danum kanyu kailangan sa ikabuhi niyu, hanggan sa rutay para sa kanyu manga bilug. Unman aw ti buhi tawu mahalaga man sa karan-unun, ag ti bilug mahalaga man sa rutay? 26Bantayan niyu ti manga manuk sa tungud maglayang, unman sida magpamgas ag unman diman sida mag-ani, unman sida may tinipun sa balay haramnuan. Dapat pagpakan-an sida niyu Ama sa langit. Unman aw kamu mahalaga man sa manga manuk? 27Si unu lugud sa kanyu makapaaba kanyu buhi una ngalay lang sa panab-anan arimputu naisipan?
28“Hayga kamu magkaarimputu tungkul sa kanyu manga rutay? Isipa dapu nu kabitay ti ilamnun magbusang sa padang. Unman sida magtarabahu, unman waydi maghabul. 29Dapat kang pagsabihun sa kanyu, una paman si Sulumun unman nakasulung magilang-gilang parihu sa busang ilamnun madi masyadu marinu kay manga rutay. 30Ti manga ilamnun sa padang ga pinasulungan Diyus rutay. Tunda pag ilamnun buhi taynguna, aldaw bay ipagba. Unman aw nguna lalu kamu pag-alagaan niya? Masyadu maaw diit kanyu pagsarig sa kanya. 31Nakan danga kamu magkaarimputu sa kanyu kan-un, sa kanyu danum una sa kanyu panrutay. 32Dahil tunda pag manga bagay pagkaaburiduhan manga tawu udwaya magpasakup sa Diyus. Magkaalaman kabay niyu Ama sa langit kamu may kailangan tunda tanan pag manga bagay. 33Dapat una sa tanan hugudan niyu hampay kamu harian Diyus ag hampay mag-ugali angay sa kay kagustuhan bag-u ipakaun niya sa kanyu ti tanan niyu pangangailangan. 34Nakan ngani danga niyu ikaarimputu ti tungkul sa aldaw pag sirang, bag-u yi niyu isipun nu kainda ay yi. Kang-udyi yi sa kada sirang kay kakurian.”
Copyright © 2023 by OMF International, Philippines