Matiyu 21

Nagras-ug si Hisus sa Banwa Hirusalim

(Mk. 11:1-11; Lukas 19:28-38; Hu. 12:12-19)

1Pagka dugay arani yi sida ni Hisus sa banwa Hirusalim. Pagka nagras-ug sida sa baryu Bitpagi sa bantud Ulibu, sinugu ni Hisus kay duwa ka tuludluan. 2Sinabi niya sa kanda, “Pag-ati kamu sa usa waya ka baryu. Susun makitan niyu ati ti usa ka inaan asnu mahigtan hanggan kay anak. Lubada niyu tunda bag-u daran-a sitay tag sa kangku. 3Ag nu may magpaingana sa kanyu, pagkumun kamu, ‘Pagkailanganun duy Panginuun.’ Bag-u balaw yi irangan niya.”

4Nangyari ngani tunda hampay matupad ti bagaw ipinadakit purupita magkun,

5“Sabiha niyu sa banwa Siun, ‘Atay tag yi kanmu Hari.

Maawaun siya ag masakyan sa anak asnu.’#21:5 Bantayi diman ti Sak. 9:9.”

6Nag-ati yi ngani ti manga tuludluan, binwat nida ti angay sa kay isinugu ni Hisus sa kanda. 7Kanda dinara ti inaan asnu hanggan kay anak. Pagka ihinampilu nida kanda manga rutay sa duwa ka asnu, sinakyan ni Hisus ti usa. 8Mayamu pag manga tawu ti nagsagmak manga rutay sa dalan, ti iba nagbuul labung kayu kanda ilinatag sa dalan. 9Kayamuan manga tawu ti nagkuyug sa kanya, ti iba mag-una, ti iba magdasun. Nanarawagan sida magkun,

“Dayawun ti linahi ni Dabid.#21:9 linahi ni Dabid: Inda kay tawag manga Hudiyu sa Pinili Diyus Manugribri pag Hari ngatay Kiristu dahil magpaniwala sida siya ginan sa linahi ni Hari Dabid ag imaw ti manmana sa kay kaharian.

Dayawun ti magsitay sa ngaran Panginuun.#21:9 Bantayi diman ti Kanta 118:25,26.

Dayawun siya una ati sa langit.”

10Pagka rinmas-ug sa Hirusalim si Hisus, nagkaraguluhan ti buu banwa. Namaraingan-an ti manga tawu magkun, “Si unu nguna tunda pag tawu?” 11Sinabi kayamuan, “Inda yi ti purupita si Hisus taga Nasarit sa daga Galiliya.”

Rinayawan ti Balay Diyus

(Mk. 11:15-19; Lukas 19:45-48; Hu. 2:13-22)

12Sinmaka si Hisus sa Balay Diyus. Tinulak niya sa karagasyun ti manga magbili, manga magpabili sa sulud Balay Diyus. Linikwang niya ti manga burugtangan kuwarta manga manugbalyu hanggan ti manga tukawan manugtinda kalampati. 13Sinabi ni Hisus sa kanda, “Nisurat sa Banal Kasuratan magkun, ‘Kang balay ingarnan balay darangin.#21:13 Bantayi diman ti Isa. 56:7. Dapat binwat ngap niyu paratag-an manga mananakaw!’#21:13 Bantayi diman ti Hir. 7:11.”

14Nagpakarani sa kan Hisus sa Balay Diyus ti manga buta hanggan pilay bag-u sida kay pinaayad. 15Dapat nagalit ti manga pangulu manughandug hanggan ti manga manugtudlu Kasuguan dahil nakitan nida kay manga binwat makadululaw ag dahil nadnugan nida ti manga anak sa Balay Diyus nanarawagan magkun, “Dayawun ti linahi ni Dabid!” 16Nakan ti manga pangulu manughandug hanggan ti manga manugtudlu Kasuguan magkun sa kan Hisus, “Nadnugan aw nimu ti manga pagsabihun nida?” Magkun si Hisus sa kanda, “Hu. Unman waya aw lugud kanyu binasa ti isinurat magkun, ‘Ginan sa bibig manga lapsag hanggan magsusu waya pag manga anak kinamhan nimu ti pagdayaw sa kanmu.’#21:16 Bantayi diman ti Kanta 8:2.”

17Bag-u nagpatawas si Hisus sa kanda, linmakaw siya tag sa luwas banwa tabug sa baryu Bitanya, ati siya pag nigya.

Sinaadan ni Hisus ti Puun Igus

(Mk. 11:12-14,20-24)

18Pagka surip linmakaw maan si Hisus tabug sa banwa Hirusalim, linun-us siya sa dalan. 19Pagka nakitan niya ti usa ka puun igus sa saruy dalan kay dinuawan, dapat ud may nakitan siya burak, nu ud manga labung lang. Sinmabi siya sa igus, “Kainda ginan danga yi lang kawu magburak una hanggan aban.” Susun nalayung yi ngap ti puun igus. 20Pagka nakitan manga tuludluan, naglingut gid sida magkun, “Hayga kadaka nalayung ti puun igus?”

21Sinmagut si Hisus magkun, “Ungud duy kang pagsabihun sa kanyu, nu kamu may sarig ag unman mag-alinlangan, kanyu mabuwat balaw lang ga nangyari sa puun igus. Nu kanyu sabihun sa bantud inda, ‘Pag-ighit yi kawu, ati pag mipadna yi sa dagat’, mangyari yi tunda. 22Ag nu kamu may sarig, una hintay kanyu hagadun sa kanyu darangin, pihu matanggap niyu.”

Ti Karampatan ni Hisus

(Mk. 11:27-33; Lukas 20:1-8)

23Pagka sinmaka si Hisus sa Balay Diyus, nagpakarani sa kanya ti manga pangulu manughandug hanggan ti manga paggurangunun manga Hudiyu sa kay katpung magtudlu. Sinabi nida sa kanya magkun, “Naan ginan kanmu karampatan nakan kanmu pagbuwatun inda pag manga bagay? Hintay ti nagpakaun karampatan sa kanmu?” 24Sinmagut si Hisus magkun, “Paingan-un waydi niku kamu usa ka paingana. Nu kanyu masagut inda, sabihun diman waydi niku sa kanyu nu naan ginan kang karampatan hampay mabuwat niku inda pag manga bagay. 25Naan ginan nguna kay pahintulut kan Huwan para mantulbaw? Ginan aw sa langit aw ngatay sa manga tawu?”

Nagharampangan dapu sida magkun, “Nu sabihun nita, ginan sa langit, sabihun niya sa kanta, ‘Hayga unman naniwala kamu sa kanya?’ 26Dapat nu sabihun nita, ginan sa manga tawu, magkadala kita sa kayamuan, dahil nakilala tanan tawu si Huwan purupita Diyus.” 27Nakan nagsagut sida sa kan Hisus magkun, “Unman duy nimi alam.” Sinabi ni Hisus sa kanda, “Unman diman niku sabihun sa kanyu nu naan ginan kang karampatan hampay mabuwat niku inda pag manga bagay.”

Ti Pahalimbawa tungkul sa Duwa ka Magtar-ari Lalaki

28Sinabi ni Hisus sa kanda magkun, “Hintay nguna kanyu isip? May tawu duwa kay anak lalaki. Nagpakarani siya sa kay usa ka anak akaan bag-u kay sinabi magkun, ‘Anak, pag-atag kawu pagtarabahu taynguna sa ubasan.’ 29Sinmagut kay anak, ‘Dayu duy.’ Dapat pagka dugay nag-isip ti anak, atag yi lang aku. Bag-u nag-ati diman. 30Bag-u kanda ama nagpakarani sa ikadwa pag anak, katunda diman kay sinabi. Sinmagut kay anak magkun, ‘Aku duy Amang, atag.’ Bag-u unman ngap siya nag-atag. 31Naan sa duwa ka anak ti nagtupad sa kagustuhan niya ama?” Sinabi manga manugpatingi magkun, “Ti un-an.”

Sinabi ni Hisus sa kanda, “Ungud duy kang pagsabihun sa kanyu, ti manga manunukut buhis ag ti manga uragin umuna waya sa kanyu pumasakup sa kay paghari Diyus. 32Dahil nagsitay si Huwan sa kanyu, ipinakilala niya ti matadlung pag ugali, dapat unman kanyu pinaniwalaan. Dapat pinaniwalaan ngap siya manga manunukut buhis hanggan manga uragin. Pagka nakitan niyu tunda, unman diman kamu nagbag-u kanyu pag-iisip, hampay mana kamu magpaniwala waydi sa kan Huwan.”

Ti Pahalimbawa sa Ubasan ag sa manga Manug-alaga

(Mk. 12:1-12; Lukas 20:9-19)

33Magkun si Hisus, “Patingihi niyu inda may usa waya ka pahalimbawa. May usa ka may puun balay, nagtanum ubas, inaladan niya bag-u nagbuwat siya pirigsan ubas. Nagpatindug waya siya usa ka balay abwat hampay bantayan kay ubasan. Bag-u iinintirga niya ti ubasan sa kay manga manugtarabahu bag-u napaiba siya rugar. 34Pagka arani yi tigpuruti, sinugu niya kay manga panawuhun tabug sa kay manga manugtarabahu hampay bul-un yi kay kaparti burak ubas. 35Dapat ay dinuksulan manga manugtarabahu kay manga panawuhun, binakul nida kay usa, minatay kay usa, kay ikatlu binatu nida. 36Bag-u sinugu maan niya kay iba maan pag manga panawuhun, balaw lang ga kay kabag-u sinugu kay kaaduk. Dapat katida diman waydi ti binwat manga manugtarabahu. 37Pagka dugay kay sinugu niya kay anak lalaki tag sa kanda. Magkun siya, ‘Pihu galangun nida kang anak.’ 38Dapat pagka nakitan manga manugtarabahu ti anak nida amu, nagharampangan sida magkun, ‘Inda aban ti mumana ubasan, kanta yi matyun hampay kanta yi apuun kay ama pamana.’ 39Nakan kanda dinakup siya, bag-u kanda dinara tag sa luwas ubasan ag kanda yi ngani minatay.

40“Nu rumas-ug kay apu ubasan, hintay nguna kay buwatun sa tunda pag manga manugtarabahu?” 41Sinabi manga manugpatingi sa kan Hisus, “Papasun unman may awa tunda pag manga tawu daut, bag-u iintirga maan niya ti ubasan sa iba pag manga manugtarabahu, sa manga magpakaun sa kay apu nu udas tig bururak.” 42Kay sabi ni Hisus sa kanda, “Udwaya aw gid nabasa niyu sa Banal Kasuratan magkun,

‘Ti batu dinayu manga manugbuwat balay,

binwat ngap mahalaga pag kalap.

Panginuun ti may buwat tunda,

tutuu ungud makadululaw.’#21:42 Bantayi diman ti Kanta 118:22,23.

43“Nakan ngani kang pagsabihun sa kanyu, bul-un ginan sa kanyu ti kaharian Diyus bag-u ipakaun sa usa ka nasyun tawu magtupad sa kagustuhan Diyus. 44Una si unu nu malagpak tag sa babaw batu inda, marunut gid. Dapat una waydi hintay ti madugsakan mapisi.”

45Pagka nakadnug ti manga pangulu manughandug hanggan ti manga Parisiyu kay manga pahalimbawa ni Hisus, kanda naintindihan, sida yi ti nasakpan niya bagaw. 46Nakan naghanap sida paraan hampay madakup si Hisus, dapat nadala sida sa kayamuan tawu dahil kanda pagkilalan-un si Hisus purupita.

Currently Selected:

Matiyu 21: HNN

Highlight

Copy

Compare