Matiyu 20

Manga Magtarabahu sa Ubasan

1Sinabi ni Hisus magkun, “Ti kaharian langit parihu sa usa ka may puun ubasan linmakaw nanurip hampay manhanap manga manugtarabahu sa kay ubasan. 2Pagka nagkasundu yi sida sa ati paghalaga kay upa sa usa ka sirang, sinugu niya sida sa kay ubasan. 3Pagka abwat yi ti init linmakaw maan ti may puun ubasan, nakitan niya may manga matindugan sa palingki unman may buwat. 4Sinabi niya sa kanda magkun, ‘Pag-atag kamu sa ubasan, pakan-an diman kamu niku sab sa katamtaman.’ 5Nag-ati ngani sida sa ubasan. Pagka karaw-an yi sirang, linmakaw maan ti may puun ubasan, kas-a maan pagka palis yi ti init. Katunda diman kay binwat pagdugangan di niya kay manga manugtarabahu. 6Pagka arani yi malambung, linmakaw maan ti may puun ubasan. Nakitan niya may manga matindugan waya. Magkun siya sa kanda, ‘Hayga kamu matindugan lang sitay usa ka sirang ud may buwat?’ 7Sinabi nida sa kanya magkun, ‘Dahil unman may pinmatarabahu sa kanmi.’ Sinabi niya sa kanda magkun, ‘Pag-atag kamu sa ubasan.’

8“Pagka malambung yi, magsabi ti may puun ubasan sa kay ingkargadu, ‘Pasitaya nimu ti manga nagtarabahu, pakan-an nimu sida kanda upa. Pakan-an dap nimu ti manga nauryan bag-u ti manga un-an.’ 9Nagpakarani ngani ti manga inupahan pagka malambung yi, ti kada tawu tinmanggap angay sa napagkasunduan pag halaga. 10Pagka nagpakarani ti manga un-an kanda hantup barang tumanggap subra. Dapat sida pinakan-an diman angay sa napagkasunduan pag halaga. 11Pagka kanda tinanggap, naghampang sida laban sa may puun ubasan, 12magkun, ‘Inda pag manga nauryan usa lang ka tamaan ginatung kay kadugay kanda tarabahu, bati hayga ipinaparihu nimu kay upa sa kanmi? Inagwanta nimi ginan surip ti init hanggan malambung, madala yi mapali kanmi dayu.’ 13Dapat sinmagut ti may puun ubasan magkun sa usa sa kanda, ‘Duy, balaw linugi kawu niku. Unman aw pinagkasunduan nita kis-ab surip ti ati paghalaga kay upa? 14Bul-a yi nimu kam upa, pag-uli yi kawu. Gustu niku pakan-an ti manga nauryan parihu sa kanmu diman. 15Unman aw aku madunung diman kang kagustuhan tungkul sa kang sadili kasiyunan? Maghirak aw kawu sa kanmu magbantay sa kangku dahil aku balaw mairang?’ 16Nakan ngani ti manga nauryan umuna, ti manga nag-una mauryan.”

Pinat-ama maan ni Hisus Kay Kamatayan ag Kay Pagkabuhi Uman

(Mk. 10:32-34; Lukas 18:31-34)

17Sa kay maglakaw ni Hisus tabug sa Hirusalim, ipinablag niya kay sampulu may duwa ka tuludluan, bag-u magkun siya sa kanda, 18“Malu duy, kita sa dalan yi tag babaw, tag sa Hirusalim. Nu ati yi kita, ipabahala ti Anak Tawu sa manga pangulu manughandug hanggan sa manga manugtudlu Kasuguan, bag-u kanda sintinsiyahan siya sa kamatayan. 19Bag-u kanda ipabahala siya sa manga balaw Hudiyu, hampay kanda muransahun, hampakun, bag-u ipaku yi nida sa kurus. Dapat sa ikatlu pag sirang mabuhi maan siya uman.”

Ti Pagpamuhunun ni Sibidiyu Asawa

(Mk. 10:35-45)

20Bag-u nagpakarani sa kan Hisus kan Sibidiyu asawa hanggan kay manga anak lalaki, sida ni Huwan ni Santiyagu. Nagluhud ti babayi sa atubangan ni Hisus, may pagpamuhunun siya sa kan Hisus. 21Magkun si Hisus sa kanya, “Hintay duy kanmu kailangan?” Sinabi babayi sa kanya, “Nu kawu humari yi, pahintuluti duy nimu sa kang duwa ka anak makatukaw ti usa sa kanmu sikun, ti usa sa kanmu wala.” 22Dapat ay sinabi ni Hisus sa kanda ni Huwan ni Santiyagu magkun, “Unman niyu naintindihan ti kanyu pagpamuhunun. Kaya aw mainman niyu ti ungut may kakurian arani yi kang inman aban?” Magkun sida sa kanya, “Kaya duy nimi mainman.” 23Sinabi ni Hisus sa kanda, “Ungud gid inman niyu aban kang ungut may kakurian. Dapat balaw aku ti may karampatan magpili nu si unu ti tumukaw sa kang sikun una sa kang wala. Tunda para sa manga inalistuhan niku Ama.”

24Pagka ti sampulu ka tuludluan nakadnug tunda, magkagalit sida sa kanda duwa magtar-ari. 25Dapat sinabi ni Hisus sa kanda, “Abala dapu duy kamu.” Bag-u magkun siya, “Nadnugan niyu ti manga pinunu manga balaw Hudiyu magpalabi-labi sa kanda manga sakup. Ti may manga kangaranan sa kanda maggamit waydi kanda karampatan. 26Nu bay sa kanyu balaw mana katida. Nu si unu sa kanyu tigkaibug katungkulan, kailangan siya ngap ti manugsirbi sa kanyu. 27Una si unu tigkaibug magpangulu, kailangan bumaliw siya kanyu panawuhun. 28Katunda diman ti Anak Tawu, nagsitay balaw hampay sirbihan nu unman hampay siya magsirbi, ag hampay ipakaun niya kay buhi sa kamatayan agud mayamu ti malukat.”

Pinaayad ni Hisus ti Duwa ka Lalaki Buta

(Mk. 10:46-52; Lukas 18:35-43)

29Pagka sida ni Hisus magginan yi sa banwa Hiriku, mayamu pag tawu ti nagkuyug sa kanya. 30Sa saruy dalan may matukawan duwa ka lalaki buta. Pagka nadnugan nida si Hisus maglawuy siyun sa kanda arani, nagtawag sida magkun, “Panginuun, kawu ti linahi ni Dabid,#20:30 linahi ni Dabid: Inda kay tawag manga Hudiyu sa Pinili Diyus Manugribri pag Hari ngatay Kiristu dahil magpaniwala sida siya ginan sa linahi ni Hari Dabid ag imaw ti manmana sa kay kaharian. kaawai duy nimu kami!” 31Sinungyaw sida manga tawu magkun, “Danga kamu maingay.” Dapat lalu ngap sida nagtawag magkun, “Panginuun, kawu ti linahi ni Dabid, kaawai duy nimu kami!” 32Nagpat-ung si Hisus, tinawagan niya sida, bag-u pinmaingana siya sa kanda magkun, “Hintay duy kanyu gustu kang buwatun sa kanyu?” 33Sinabi nida sa kanya, “Panginuun, sa makakit gid duy kanmi manga mata.” 34Sa kay pangaawa ni Hisus sa kanda, inayuhap niya kanda manga mata bag-u kadaka yi makakit kanda manga mata. Nagkuyug sida sa kan Hisus.

Currently Selected:

Matiyu 20: HNN

Highlight

Copy

Compare