Libitiku 20
20
Ti Parusa sa manga Kasalanan
1Sinugu Panginuun si Muysis 2kuntay sabiha inda sa manga Israilita:
Una si unu sa kanyu hanggan sa manga day-uhan mag-ulian kaibahan niyu ti manhandug kay anak sa diyus-diyusan si Muluk, kailangan bintukun banwa tugka sa mamatay. 3-4Pagkagalitan niku tunda pag tawu, danga yi siya pagkilalan-a nasakupan niyu. Dahil sa pagsagda niya kay anak sa kan Muluk, inuringan niya ti rugar sarambahan para sa kangku ag balaw iginalang kang banal pag ngaran. Nu pabay-anan lang niyu tunda pag tawu, ag balaw minatay, 5aku gid ngap ti umunu-unu sa kanya hanggan sa kay magtal-anakan ag sa tanan magsunud sa kanya sa pagsagda sa kan Muluk. Balaw niku sida kilalan-a nasakupan niyu.
6Saadan diman niku ti manga magdangup ag magsunud sa manga pandaniwan maghampang sa karadwa manga namatay. Balaw niku sida kilalan-un nasakupan niyu.
7Itigana niyu kanyu sadili para sa kangku ag pagpakabanal kamu dahil aku ti Panginuun kanyu Diyus. 8Tupada niyu kang manga surundanun dahil aku ti Panginuun ti nagtalaga sa kanyu para sa kangku.
9Una si unu ti manmuransa sa kay ama hanggan sa kay ina kailangan matyun.
10Nu ti usa ka lalaki mangulid sa asawa iba, siya hanggan ti babayi kailangan matyun.
11Nu ti usa ka lalaki mangulid sa asawa niya ama, pinakay-a niya kay ama. Nakan sida duwa hanggan ti babayi kailangan matyun. Sida di waydi kay dahilan nida kamatayan.
12Nu ti ama mangulid sa kay umagad babayi, sida duwa kailangan matyun dahil daut kanda binwat. Sida di waydi kay dahilan nida kamatayan.
13Nu ti usa ka lalaki mangulid sa kay kaparihu lalaki, sida duwa kailangan matyun dahil mahalay kanda binwat. Sida di waydi kay dahilan nida kamatayan.
14Nu ti usa ka lalaki maibug sa magtal-ina, kailangan sunugun sida tulu, dahil daut kanda binwat. Kailangan madura inda pag kadautan sa kanyu.
15-16Nu ti usa ka lalaki ngatay babayi manakpal sa usa ka hayup, kailangan diman matyun siya hanggan ti hayup. Sida di waydi kay dahilan nida kamatayan.
17Nu ti usa ka lalaki maibug bag-u mangulid sa kay patar-ari babayi, una waya patar-ari niya inda sa kay ama ngatay sa kay ina, pinakay-a niya kay patar-ari nakan may saragtun siya. Ag dahil makakaray-a kanda binwat, danga yi niyu sida pagkilalan-a nasakupan niyu.
18Nu ti usa ka lalaki mangulid sa babayi magkadugu bag-u pinmasnu ti babayi, danga yi niyu sida duwa pagkilalan-a nasakupan niyu.
19Nu ti usa ka lalaki mangulid sa kay bayi, pinakay-a niya kay bayi. May saragtun sida duwa sa kanda binwat.
20Nu ti usa ka lalaki mangulid sa asawa niya bapa, pinakay-a niya kay bapa. Sida duwa may saragtun, ag mamatay lang sida unman may anak.
21Nu ti usa ka lalaki mangulid sa asawa niya patar-ari, pinakay-a niya kay patar-ari. Ag dahil mauring kanda binwat, mamatay lang sida unman may anak.
22Tupada niyu ti tanan niku manga surundanun hanggan manga sugu hampay dayu kamu mapaighit sa daga inalistu niku sa kanyu imaw kanyu ulian. 23Ti manga paighitun niku pag tawu siyun ginan pag daga magbuwat inda pag manga daut buruwatun, ag dahil siyun pagkadat-an niku sida. Nakan danga niyu paghuwada kanda pagbuwatun. 24Ag angay diman sa kang sinabi sa kanyu, apuun niyu kanda daga. Ipakaun niku tunda pag daga sa kanyu, marinu ag abunda pag daga#20:24 marinu ag abunda pag daga: Kay ibug sabihun, daga magbulus ti gatas ag daykut. hampay kanyu apuun. Aku ti Panginuun kanyu Diyus, imaw ti nagtalaga sa kanyu ginan sa kadamlan tawu.
25Kailangan alam niyu nu hintay ti malumpiyu ag ti mauring pag manga hayup hanggan manga manuk. Danga niyu pagyagtingi kanyu sadili sa panab-anan pagkaun sa manga mayagting pag manga hayup kang pag-irangan kan-un niyu. 26Pagpangabuhi kamu may kabanalan dahil aku, ti Panginuun, banal. Itinalaga niku kamu ginan sa kadamlan tawu hampay sa kangku kamu.
27Nu may imaw sa kanyu pandaniwan maghampang sa karadwa manga namatay, kailangan gid bintukun siya tugka sa mamatay. Siya di waydi ti dahilan niya kamatayan.
Currently Selected:
Libitiku 20: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
