Libitiku 21
21
Ti manga Surundanun tungkul sa manga Manug-asiwa Balay Diyus
1Sinugu Panginuun si Muysis hampay sabihun inda sa manga manughandug lahi ni Aarun:
Danga pag-uringi kanyu sadili sa panab-anan pagpakarani ngatay pag-igpil sa bangkay tawu, 2purya lang nu ti namatay kanyu suud manga katawuhan halimbawa kanyu ina, ama, anak, patar-ari lalaki, 3aw ngatay patar-ari babayi udwaya may asawa ag pagsakpun waya niyu. 4Danga diman niyu pag-uringi kanyu sadili sa panab-anan magpakiusa sa paglubung sa katawuhan niyu asawa. 5Nu manruku kamu sa namatay, danga niyu pagkurida kanyu buhuk aw ngatay puldan kanyu bungut, aw ngatay biyagan kanyu bilug. 6Kailangan italaga niyu kanyu sadili para sa kangku, sa kanyu Diyus, ag danga niyu pagpakay-aha kang ngaran. Buwata niyu inda dahil kamu ti manughandug manga handug sa panab-anan apuy,#21:6 handug sa panab-anan apuy: Bantayi ti footnote sa 1:9. imaw kang karan-unun.
7Kailangan danga kamu mag-asawa sa babayi mayagting magpabili kay bilug, aw ngatay sa babayi nagbulag sa kay asawa, dahil itinalaga niku kamu para sa kangku. 8Kailangan kilalan-un kamu banal niyu kaparihu Israilita dahil kamu ti naghandug manga handug para sa kangku.#21:8 manga handug para sa kangku: sa Hibriyu, karan-unun Diyus. Bantayi ti footnote sa 1:9. Hu, kailangan gid ngap kamu kilalan-un nida banal dahil aku, ti Panginuun, banal gid, ag pagbuwatun niku banal kang manga nasakupan.#21:8 pagbuwatun niku ... nasakupan: ngatay, ipinablag niku sida para sa kangku.
9Nu kamu may anak babayi magpakay-a sa kanyu dahil sa magpabili siya kay bilug, dahil siyun pagkilalan-un siya mayagting, kailangan sunugun siya.
10Nu ti pangulu manughandug#21:10 pangulu manughandug: Sa Hibriyu makitan kay buu katawagan sa kanya: ti pangulu manughandug Balay Diyus higit sa kaparihu niya manga Israilita, imaw ti hinaplasan lana kay ulu, imaw ti pinili hampay magsulung rutay para sa pangulu manughandug Balay Diyus. manruku sa namatay, kailangan balaw niya barugaun kay buhuk ag danga niya paggisia kay rutay. 11Kailangan balaw niya mayagtingan kay sadili sa panab-anan pagpakarani sa namatay, una waya kay ama inda aw ngatay kay ina. 12Ag dahil sa itinalaga siya sa kangku tag bilang pangulu manughandug Balay Diyus sa panab-anan paghaplas lana ulibu sa kanya, balaw siya mahimu mighit ginan sa Turda Taragbuan agud makiusa sa paglubung, dahil nu buwatun niya inda mayagtingan ti Turda. Aku ti Panginuun.
13-14Ti asawan-un pangulu manughandug kailangan tugnaw pag daraga ag kaparihu niya Israilita. Danga siya mag-asawa sa buranday, una sa babayi tinayakan niya asawa, una sa babayi mayagting magpabili kay bilug. 15Sa siyun pag paraan balaw kilalan-un mayagting kay manga anak. Aku ti Panginuun ti nagtalaga sa kanya para sa kangku.
16Sinugu Panginuun si Muysis 17sabiha inda sa kan Aarun:
Unman may una si unu sa kanmu manga lahi tugka sa sunud pag manga sinulput tawu ti makahandug agud kang karan-unun, nu may alangan kay bilug. 18Balaw mahimu pumakarani sa harandugan ti buta, ti lunu, ti may daut kay uyahun, ti balaw mayad kay usa ka bahagi niya bilug, 19ti may bari kay lulud hanggan kamang, 20ti buktut, ti pandak, ti may sakit sa mata hanggan sa lukub, aw ngatay baug. 21-23Nakan nu ti usa nimu ka katawuhan may alangan, unman siya mahimu maghandug sa kangku manga pakaun sa panab-anan apuy, imaw kang karan-unun. Dayu diman siya mahimu magsulud sa Banal pag Sulud-sulud una pumakarani sa harandugan dahil mayagtingan kang Turda. Dapat mahimu siya makakaun karan-unun para lang sa manga manughandug sa banal pag pakaun hanggan sa pinakabanal pag handug. Aku ti Panginuun imaw ti nagpili sa kanyu para sa kangku.
24Sinabi inda tanan ni Muysis sa kan Aarun hanggan sa kay manga anak lalaki, ag sa tanan Israilita.
Currently Selected:
Libitiku 21: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
