Libitiku 19
19
Manga Tuhay-tuhay pag manga Surundanun
1Sinugu Panginuun si Muysis 2kuntay sabiha inda sa buu nasakupan Israil:
Pagpangabuhi kamu may kabanalan dahil aku, ti Panginuun kanyu Diyus, banal. 3Kailangan galangun niyu kanyu ina hanggan ama, ag kailangan diman tupadun niyu kang manga pag-isugu sa kanyu sa manga Sirang Pamahari. Aku ti Panginuun kanyu Diyus.
4Danga kamu magsamba sa manga diyus-diyusan ngatay magbuwat manga tinawu-tawu. Aku ti Panginuun kanyu Diyus.
5Nu manhandug kamu sa kangku manga handug para sa mayad pag pakiusa, ihandug niyu inda sa mayad pag paraan hampay tanggapun niku para sa kanyu. 6Kan-un niyu ti taguban sa tunda diman pag sirang ngatay sa kinaaldawan. Dapat nu may masawad waya taguban tugka sa ikatlu pag sirang kailangan sunugun yi. 7Nu kan-un waya niyu tunda sa ikatlu pag sirang, dayu niku tunda tanggapun dahil mayagting yi. 8Una si unu ti kumaun tunda may saragtun dahil kay binul-an halaga ti banal pag bagay para sa kangku, nakan inda pag tawu danga yi pagkilalan-a nasakupan niyu.
9Nu mag-ani kamu danga niyu pagtabuha ti manga sa saruy niyu tanman, ag danga yi niyu pagsagrawa kanyu nag-anihan. 10Katunda diman sa taranuman manga ubas, danga yi niyu pagbaliki ti manga nasawad pag burak ngatay ti manga naragdag. Pabay-ani yi lang niyu tunda para sa manga pugri hanggan sa manga balaw Israilita mag-ulian kaibahan niyu. Aku ti Panginuun kanyu Diyus.
11Danga kamu magtakaw, hanggan magpudil, aw ngatay magpandaya sa kanyu kaparihu.
12Danga kamu magsumpa sa kapudilan tabug sa kang ngaran, dahil nu buwatun niyu inda paglapastanganun niyu kang ngaran. Aku ti Panginuun.
13Danga niyu pagdayaa aw ngatay pagtakawi kanyu kaparihu. Danga yi niyu pagpaaldawan ti pagpakaun upa sa tawu pinatarabahu niyu.
14Danga niyu pagbagawi manga kadautan ti bungul, ag danga kamu magpauli sarad-an sa lakawan manga buta. Tupada niyu inda pag manga sugu niku hampay ipakakit niyu maggalang kamu sa kangku sa kanyu Diyus. Aku ti Panginuun.
15Kailangan hustu ag matadlung kanyu maghusay; danga niyu pagkampihi ti mayaman ngatay ti pugri.
16Danga kamu maglilibakan sa kanyu kaparihu. Danga kamu magbuwat una hintay pag ikadamhak niyu kaparihu. Aku ti Panginuun.
17Danga niyu pagkagaliti kanyu kaparihu. Paalalahani niyu siya nu nagsalan hampay unman kamu may saragtun. 18Danga kamu magbalus hanggan magdumut sa iba,#19:18 sa iba: ngatay, sa kanyu katawuhan. bagkus ngap mahalun niyu kanyu kaparihu#19:18 kaparihu: ngatay, kaparihu Israilita. parihu sa kanyu magmahal sa kanyu sadili. Aku ti Panginuun.
19Tupada niyu kang manga sugu. Danga niyu pagpalahii ti usa ka hayup sa balaw kay kaparihu pag hayup. Danga kamu magtanum duwa ka kalasi binhi sa usa ka tanman. Danga kamu magsulung rutay binwat ginan sa duwa ka kalasi pisahan.
20Nu ti usa ka lalaki mangulid sa usa ka suruguun babayi karasalun yi sa iba lalaki, dapat inda pag babayi udwaya nalukat aw ngatay napalaya,#19:20 inda pag babayi ... napalaya: Kay ibug sabihun, udwaya nabayadan niya aguman ngatay iba tawu kay amu agud mapalaya siya sa pagkasuruguun. kailangan parusahan sida. Dapat danga sida pagmatya dahil udwaya napalaya tida pag babayi. 21-22Kailangan dumara ti lalaki usa ka lalaki pag karanidu ati sa may arani sabian Turda Tiripnan bilang bayad sa kay kasalanan. Sa panab-anan paghandug manughandug sa karanidu sa kang atubangan, malukat ti lalaki sa kay kasalanan ag patawadun niku siya.
23Nu rumas-ug yi kamu sa daga ipakaun niku sa kanyu, sa sulud tulu ka timpu danga niyu pagkan-a kay manga burak kanyu itinanum. Kilalan-un niyu inda mauring.#19:23 mauring: sa litiral, unman naturi. 24Sa ikap-at pag timpu, ti tanan pag burak ihandug niyu bilang pagdayaw sa kangku nakan balaw diman niyu inda kan-un. 25Dapat sa ikalima pag timpu makakaun yi kamu manga burak. Ag nu tupadun niyu inda pag manga surundanun, umabunda gid kay manga burak kanyu manga tanum. Aku ti Panginuun kanyu Diyus.
26Danga kamu magkaun taguban may dugu waya.
Danga niyu pagbuwata ti manga pagbuwatun manughula hanggan panhirian.
27Nu manruku kamu sa namatay danga niyu pagpuldi kanyu buhuk sa sangput niyu ulu ngatay puldun kanyu bungut. 28Danga diman niyu pagbiyagi kanyu bilug. Ag danga diman kamu magpatatak sa kanyu bilug. Aku ti Panginuun.
29Danga niyu pagpakay-aha kanyu manga anak babayi sa pagpilit sa kanda kuntay ipabili nida kanda sadili pagkababayi, dahil lumantap ti kahalayan ag mapnu kadautan kanyu rugar.
30Sunda niyu kang manga pag-isugu sa kanyu sa Sirang Pamahari, ag galanga niyu ti rugar sarambahan niyu sa kangku. Aku ti Panginuun.
31Danga kamu magdangup sa manga pandaniwan maghampang sa manga karadwa namatay, dahil nu buwatun niyu inda miminsan kamu sa mayagting. Aku ti Panginuun kanyu Diyus.
32Galanga niyu ti manga gurangun, galanga diman niyu aku kanyu Diyus. Aku ti Panginuun.
33Danga niyu pag-apiha ti manga day-uhan mag-ulian asan sa kanyu. 34Tanggapa niyu sida bilang ga kanyu kaparihu, ag mahala niyu sida parihu sa kanyu magmahal sa kanyu sadili, dahil manga day-uhan diman kamu kaybi sa Ihiptu. Aku ti Panginuun kanyu Diyus.
35Danga kamu magdaya sa kanyu magkilu, ag magsukat, hanggan magtakal. 36-37Gamita niyu ti insaktu pag kiluhan, ag salupan, hanggan takalan.
Aku ti Panginuun kanyu Diyus ti nagpalwas sa kanyu ginan sa Ihiptu. Tupada niyu ti tanan niku manga surundanun hanggan manga sugu. Aku ti Panginuun.
Currently Selected:
Libitiku 19: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
