Libitiku 18
18
Ti manga Pag-irangan pag Buruwatun Mahalay
1Sinugu Panginuun si Muysis 2kuntay sabiha inda sa manga Israilita:
Aku ti Panginuun kanyu Diyus. 3Danga niyu paghuwada ti manga pagbuwatun manga tawu taga Ihiptu nu naan pag nangulian kamu kaybi, hanggan ti manga pagbuwatun manga taga Kanaan nu naan niku kamu pag darahun. 4-5Kailangan niyu sundun kang manga sugu hanggan manga surundanun, dahil ti magtupad inda magkaimaw buhi. Aku ti Panginuun kanyu Diyus.
6Danga kamu mag-ulid sa kanyu arani pag katawuhan. Aku ti Panginuun.
7-8Danga pagpakay-aha kanmu ama sa panab-anan pag-ulid sa kanmu ina hanggan sa iba waya niya asawa.
9Danga kawu mag-ulid sa kanmu patar-ari babayi, una patar-ari ulung lang sa ama ngatay sa ina, una nagdaka siya sa kanyu una bukun.
10Danga kawu mag-ulid sa kanmu laki babayi, dahil mamakaun inda kakay-ahan sa kanmu.
11Danga kawu mag-ulid sa anak babayi nimu ama sa iba niya asawa, dahil patar-ari diman nimu siya.
12-13Danga kawu mag-ulid sa kanmu bayi, dahil patar-ari siya nimu ama ngatay nimu ina.
14Danga pagpakay-aha kanmu bapa sa panab-anan pag-ulid sa kay asawa, dahil bayi diman nimu siya.
15Danga kawu mag-ulid sa kanmu umagad babayi dahil asawa siya nimu anak.
16Danga kawu mag-ulid sa kanmu bayaw babayi dahil makapakaun inda kakay-ahan sa kanmu patar-ari.
17Danga kawu mag-ulid sa anak ngatay idu nimu inuraginan pag babayi kaybi, dahil barang anak ngatay laki nimu siya ag makakaray-a tunda.
18Danga kawu mag-ulid sa patar-ari daraga nimu asawa habang buhi waya kanmu asawa.
19Danga kawu mag-ulid sa babayi magkadugu dahil mayagting siya.
20Danga kawu mag-ulid sa asawa iba, dahil nu buwatun nimu inda ibilang kawu sa mauring.
21Danga nimu ipakaun kanmu anak bilang handug sa diyus-diyusan si Muluk, dahil paglapastangan tunda sa kangku sa kanmu Diyus. Aku ti Panginuun.
22Danga kawu mag-ulid sa kanmu kaparihu lalaki, dahil mayagting inda.
23Danga magpanakpal ti lalaki ngatay ti babayi sa hayup, dahil daut ag mayagting inda.
24Danga niyu pagyagtingi kanyu pagkatawu sa panab-anan pagbuwat tunda pag manga buruwatun, dahil inda ti nagpayagting sa manga tawu pagpaighitun niku sa daga kang pag-ipakaun sa kanyu. 25-28Una tunda pag daga nayagtingan dahil sa kanda binwat, nakan pinadaran-an niku manga sarut tunda pag daga hampay mighit sida siyun ginan. Dapat kamu pag manga Israilita hanggan pag manga day-uhan mag-ulian kaibahan niyu, danga gid niyu pagbuwata ti mayagting pag manga bagay, bagkus ngap tupadun gid niyu kang manga surundanun hanggan manga kasuguan. Dahil nu yagtingan diman niyu ti daga sa pagbuwat mahalay, paighitun diman niku kamu siyun ginan pag daga parihu sa manga tawu un-an man sa kanyu. 29Una si unu ti bumuwat tunda pag manga mahalay pag buruwatun, danga yi pagkilalan-a nasakupan niyu. 30Nakan tupada niyu ti pag-isugu niku sa kanyu ag danga niyu paghuwada ti manga mayagting pag manga buruwatun manga tawu un-an man sa kanyu, hampay balaw niyu mayagtingan kanyu sadili dahil siyun. Aku ti Panginuun kanyu Diyus.
Currently Selected:
Libitiku 18: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
