Libitiku 17
17
Ti manga Surundanun sa Rugar Harandugan
1Sinugu Panginuun si Muysis 2kuntay tultulan inda sa kan Aarun hanggan sa kay manga anak lalaki ag sa tanan Israilita:
3Una sitapu sa kanyu ti manhandug baka, karanidu, ngatay kambing sa iba rugar, 4-5ag balaw sa Turda Tiripnan pag-ingarnan diman Turda Taragbuan, parihu lang sa nakamatay siya tawu, nakan danga yi siya pagkilalan-a nasakupan niyu. Ipinatupad inda pag surundanun hampay kanyu maghandug ati niyu pag buwatun sa may arani sabian Turda ag balaw sa iba pag rugar. Kanyu manga handug para sa mayad pag pakiusa ipakaun niyu sa manughandug, siya ti manhandug sa Panginuun. 6Iwidwisik manughandug ti dugu hayup sa harandugan para sa Panginuun, baliwa sa may sabian Turda Tiripnan. Bag-u sunugun niya ti manga taba hayup; kay hungaw inda makapasulung gid sa Panginuun. 7Nakan danga yi kamu maghandug sa manga labang ga histuda kambing,#17:7 ga histuda kambing: ngatay, diyus-diyusan kambing. dahil imaw inda ti pumakarayu sa kanyu sa Panginuun. Kailangan tupadun niyu inda tugka sa sunud pag manga sinulput tawu.
8Kamu pag manga Israilita hanggan pag manga day-uhan mag-ulian kaibahan niyu, tandai gid niyu inda:
Una si unu sa kanyu ti manhandug una hintay pag handug sa iba pag rugar 9ag balaw sa may sabian baliwa Turda, danga yi pagkilalan-a nasakupan niyu.
10Una si unu sa kanyu pag manga Israilita hanggan pag manga day-uhan, ti kumaun dugu pihu bumaliw kalaban Panginuun ag danga yi pagkilalan-a nasakupan niyu. 11Dahil ti buhi kada linalang ati sa kay dugu ag isinugu Panginuun sa kanyu kuntay gamitun niyu inda hampay malukat kamu sa kanyu manga kasalanan, dahil ti dugu imaw ti magpakaun buhi, imaw ti makalukat sa tawu ginan sa kay manga kasalanan. 12Inda kay dahilan nu hayga balaw kamu dapat kumaun dugu, una Israilita hanggan pag manga day-uhan.
13Una si unu sa kanyu ngatay sa manga day-uhan mag-ulian kaibahan niyu ti dumakup hayup ngatay manuk mahimu kan-un, kailangan ipatiktik dap kay dugu bag-u tabunan daga, 14dahil ti buhi kada linalang asan sa kay dugu pag maulian. Nakan ngani magkun ti Panginuun sa kanyu danga kamu magkaun dugu sa una hintay pag linalang; una si unu ti kumaun danga yi niyu ibilang sa kanyu kasimanwa.
15Una si unu sa kanyu, Israilita man ngatay manga day-uhan mag-ulian kaibahan niyu ti kumaun sa hayup namatay ngatay minatay lang niya kaparihu hayup, kailangan pipian niya kay rutay ag marigus, dapat ibilang diman siya sa mauring tugka sa misalup ti init. 16Nu balaw niya pipian kay rutay ag unman hanggan marigus, may saragtun siya.
Currently Selected:
Libitiku 17: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
